Állahat ja njuvččat buktet mielddiset giđđadálvvi: dat leat vuosttas bárbmolottit, mat bohtet davás bessensajiidasaset. Davvisámegillii “maaliskuu” lea njukčamánnu. “Huhtikuu” fas lea cuoŋománnu: beaivváža liekkas oktan biekkain ja idjabuollašiiguin garrada muohttaga – ja nu cuoŋuda. Šerres beaivvádatbeaivvit gullet alimus giđđadálvái.

Sámiid deháleamos basit deivet giđđadálvái. Márjjábeaivi lea leamaš dehálaš girkolaš bassi. Beassážiid áigge leat čoahkkanan márkanastit ja heajastallat. Giđđa lea leamaš sámiid gaskkas sosiálalaš eallima ealaskeamos áigi. Heahtá Márjjábeaivvi doaluid prográmmas leat girkostallamiid lassin sámemusihkkakonsearttat, dánsumat ja heargevuodjimat jieŋa alde.