Majemuuh sämikuávlu hävdienâmijn koivum sämmilâšuámikkâsah čiähhojeh háávdán uđđâsist Anarist já Ucjuuvâst Sämmilij kirkkopeeivij maŋa 7.–8. porgemáánu. Uámikkâsah láá jo ovdil sivnedum háávdán, já puáttee toimâttâsâin kevttih kirholii háávdán čiehâm myenster. Uámikkâsah láá siäiluttum ive 2001 rääjist Säämimuseo Siidast.

Pasepeeivi 7.8.2022 lyeštih sämmilâšuámikkâsâid háávdán Aanaar Jaamišsuollui já vuossaargâ 8.8.2022 Ucjuv Maadâjäävri puáris hävdienâmân sehe Njellim ortodoksilii hävdienâmân.

Tilálâšvuođah

Pasepeeivi 7.8.2022 tijme 15 rääjist uárnejuvvoo Anarist Sämmiláid kirkkopeivijd väridum láávust tilálâšvuotâ, mast iärásij juávhust muštâleh uámikkâsâi historjást. Uámikkâsâid lyeštih uđđâsist háávdán Aanaar Jaamišsuollui, kuus fievrideh uámikkâsâid já miäđušteijeid. Láávust čuávuh háávdán uđđâsist lyeštim stream peht.

Tilálâšvuođah juátkojeh vuossaargâ 8.8.2022 tijme 10 Ucjuuvâst, kost lyeštih uámikkâsâid uđđâsist Maadâjäävri puáris hävdienâmân. Kirkkokiedist uárnejuvvoo miäđušteijeid káhvástâllâm- já savâstâllâmtilálâšvuotâ.

Nuorttâliih uámikkâsah hävdiduvvojeh Njeellim ortodoksilii hävdienâmân vuossaargâ 8.8.2022 tijme 15 ornimnáál tilálâšvuođâst. Miäđušteijeid uárnejuvvoo káhvástâllâm- já savâstâllâmtilálâšvuotâ Njeellim kerhotáálust.

Puoh tilálâšvuođâid puáhtá čuávvuđ káidusin stream peht.

Háávdán uđđâsist lyeštimeh láá oles syemmilii já tave-eennâmlii sämisiärvádâhân čyeccee tilálâšvuođah. Sämikuávlust siämmáálágáneh tilálâšvuođah láá uárnejum jo ovdil, ive 1995 Aanaar Jaamišsuollust, ive 1997 Taažâ Alattiäjust, ive 2011 Taažâ Njiävđámist já ive 2019 Ruotâ Lyckselest.

Toimâkodde västid orniistâlmijn

Säämimuseo Siida lii vuáđudâm toimâkode olášuttiđ uámikkâsâi háávdán uđđâsist lyeštim. Toimâkoodán kuleh Sämitigge (Leo Aikio, Anu Avaskari, Vuokko Hirvonen), Nuorttâlij sijdâčuákkim (Hanna-Maaria Kiprianoff), Suomâ evaŋgellâš-luuteerlâš kirkko (Tuomo Huusko, Erva Niittyvuopio), Suomâ evaŋgellâš-luuteerlii kirho Sämmilâšpargo ráđádâllâmkodde (Veli-Pekka Lehtola), Laapi ortodoksilâš kappelservikodde (Jaakko Vainio), Helsig ollâopâttâh (Hanna Snellman), Máttááttâs- já kulttuurministeriö (Hanna Kiiskinen) já Säämimuseo Siida (Minna Lehtola, Eija Ojanlatva).

Tuávááš

Ive 1995 Aanaar Jaamišsuollui macâttii Helsig ollâopâttuv biotalhâstiettuu lájádâs anatomia uásáduvâst 95 sämmilâšuámikkâssâd. Talle alguu häävdidmân toovâi Aanaar servikode kirkkorääđi.

Anatomia uásádâhân paccii liijká uámikkâsah, maid ollâopâttuv vuáđudem toimâkodde inventistij. Iivij 1998–1999 toimâkodde smietâi 1800- já 1900-lovoin nurrum vijđes olmooštähtinurâlduv haldâšem já tutkâmuškiävtu prinsiipijd. Sämmilâšuámikkâsâi uásild ráđádâllâmkodde poorgâi oovtâstpargo meid Sämitiggijn.

Ráđádâllâmkode iävtuttâs miäldásávt sirdii anatomia uásáduv nurâlduv sämmilâšuámikkâsâid siäiluttemnáál sämikuávlun, Aanaar Säämimuseo Siidan ive 2001. Säämimuseo lii siäiluttâm 172 uámikkâssâd ääšimiäldásávt toi luovâttem rääjist. Tego lii soppum, ton ääigi iä lah mieđettâm oovtâgin love tutkâđ uámikkâsâid.

 

Lasetiäđuh:
vs. museohovdâ Eija Ojanlatva, Säämimuseo Siida, p. 040 1676 145, eija.ojanlatva(at)samimuseum.fi

Sämimuseo já Paje-Laapi luándukuávdáš Siida Enâmeh láá mii párnááh – Nämä maat ovat meidän lapsiamme -čáitálduv lekkâm sirdoo kesimáánu aalgân.

Mij juhlop Sämimuseo já Meccihaldâttâs Luándukuávdáá ohtâsii uđđâ čáitálduv já vuáđupyeredum Siida 1.6.2022 oovtâst puásui-ive algáin. Mij halijdep sirdemáin visásmittiđ, ete mii čáitáldâh lii sesâlistum já palvâl mii kuosijd pyeremuin máhđulijn vuovvijn.

Ovdil uđđâ čáitálduv lekkâm Siida čáitáldâhfalâldâh lii ollásávt Säämimuseo olgomuseokuávlust.

Sämimuseo äššigâspalvâlem, lippuvyebdim, Siida Shop, Meccihaldâttâs äššigâspalvâlem já mađhâšemravvim palvâleh vuáđupyeredem ääigi koskâpuddâsijn viistijn Siida šiljoost já 1.4.2022 rääjist uđâsmittem vyeliviäskárist.

Raavvâdviäsu Sarrit palvâl Siida ávusorroomaaigij siste.

Mij lep áávus

Tälviv 2021-2022 (olgomuseo, äššigâspalvâlem, raavâdviäsu):
1.10.2021 – 31.3.2022 vuo – láv tme 10 – 16 (pas kiddâ)
*Juovlâ 2021: 24.12. 10-14, 25.12. 12-16)
1.4. – 31.5.2022 vuo – láv tme 10 – 17 (pas kiddâ)

Keessiv 2022 (uđđâ Siida):
1.6. – 30.9.2022 tme 9 – 18 jyehi peeivi

 

Siida lii Anarist, já tobbeen tuáimih Sämimuseo já Paje-Laapi luándukuávdáš Siida sehe Raavâdviäsu Sarrit. Sämimuseo Siida tooimâst västid Sämimuseosiäđus. Paje-Laapi luándukuávdáš Siida kulá Meccihaldâttâs väldikodálii luándukuávdášviärmádâhân.

Lasetiäđuh: Minna Muurahainen, 0405816434, minna.muurahainen(at)samimuseum.fi

 

Aanaar markkânist orroo Sämimuseo já Paje-Laapi luándukuávdáš Siida lii stuorrâ nubástusâi vyelni. Rakânâs vijđedempargoh láá joođoost já kiđđuv 2021 älgih tááláá huksimuási vuáđupyeredempargoh. Vijđedem já vuáđupyeredem ohtâvuođâst uđâduvvoo meid Sämimuseo já Luándukuávdáá ohtsâš váldučáitáldâh.

Siida-rakanâs, kote lii palvâlâm Sämimuseo, Paje-Laapi luándukuávdáá já Siida raavâdviäsu Anarist paijeel 20 ihheed, lii vijđedem vuálásâžžân. Tááláá váldurakânâs ohtâvuotân ráhtojeh Sämimuseo várás uđđâáigásiih čuágáldâhsajeh, mooid čäähih meid sämikáálvuh, moh mäccih Suomâ aalmuglâšmuseost. Raavâdviäsu várás ráhtojeh aaibâs uđđâ já pyerebeht tuáimee sajeh sierânâs suáján. Vijđedemuásih valmâštuvvojeh kiđđuv 2021.

Tááláá Siida-rakânâs vuáđutivodem álgá talle ko vijđedemuásih láá valmâšeh. Vuáđupyeredem ääigi eres pargoi lasseen Siida aula vijđeduvvoo já pargoviehâ finnee uđđâ porgâmviistijd. Tááláš vuáđučáitáldâh raččoo, já sajan ráhtoo uđđâ čáitáldâh. Siida uđđâ váldučáitáldâh lii ovddii náál Sämimuseo já Luándukuávdáá ohtsâš, já tast ovtâstuveh kulttuur- já luándusiskáldâsah ohtân ubâlâšvuottân.

Siida uđđâ čáitáldâh finnee nommâsis “Enâmeh láá mii párnááh – Nämä maat ovat lapsiamme”. Nommâ šadda aanaarlii Matti Morottaja čäällim anarâškielâlii tiivtâst Enâmeh láá mii párnááh. Čáitálduv noomâst päštih luándu- já kulttuurfáádái tehálumoseh viestah. Sämmilii ärbitiäđu mušto lii kuáddám luándu já ohtsâškode nubástusâi paijeel suhâpuolvâst nuubán. Enâduvah mii pirrâ siskeldeh luodâid miljovnij ivij ääigi. Maggaar luándu mij kyeđđip čuávuváid puolváid?

Sämimuseo Siida museohovdâ Sari Valkonen muštâl, et Siida čáitálduv kulttuursiskáldâsah kieđâvušeh tom, maht moonnâm äigi iälá mist – juáhháást iälá maaŋgâhámásâš jieškote-uv äigimudoi ärbi, mon vievâst lii máhđulâš vuáháduđ pirrâsijn šaddee nubástussáid. Uđđâ čáitáldâh lii Sämimuseo muštâlus sämmilijn. Čáitáldâhpaargon lii valdum nanosávt fáárun meid sämisiärvádâh.

Meccihaldâttâs miäcádâhhovdâ Pirjo Seurujärvi muštâl, et Luándukuávdáš Siida uáinust uđđâ čáitáldâh puáhtá oovdân eromâšávt majemuu jieŋâääigi čuávvoo šoŋŋâdâhhistorjá já kieđâvuš tom, mii šoŋŋâdâhân tábáhtuvá puátteevuođâst. Luándufáádáh kieđâvuššojeh Paje-Laapi suojâlemkuávlui sehe tain tiättojeijee jieškote-uv luándutiijpâi já iäláánšlaajâi peht. Mij anneep huolâ luándu maaŋgâpiälásâšvuođâst já kulttuuräärbist, já mii pargo puátuseh kyeddih suhâpuolvâi paijeel. Uđđâ čáitáldâh puáhtá fijnáht oovdân taam pargo, Seurujärvi juátká.

Uđđâ čáitálduv válduvuávájeijee lii Harri Koskinen Teollisuuden Ystävät Oy:st. Čáitálduv proojeekthoovdah láá Meccihaldâttâs Kirsi Ukkonen já Sämimuseo Eeva Kyllönen. Museo čáitáldâhkoordinaattor lii Darja Heikkilä.

Siida váldučáitálduv kulttuuruási uđâdem ruttâdeh Kone siäđus, Suomâ kulttuurruttârááju/Museovisio já Jenny ja Antti Wihuri ruttârááju. Sämimuseost lii joođoost meid čáitálduv uuđâdmân lohtâšuvvee Muittut, muitalusat – the story of the Sámi by the Sámi -interreghaahâ. Siida váldučáitálduv luándu-uási uuđâdmân Meccihaldâttâs finnij ruttâdem staatâ laseruttâtuáluárvuštâlmist.

Lasetiäđuh: 
Museohovdâ Sari Valkonen, p. 040 767 1052 tâi sari.valkonen(at)samimuseum.fi
Miäcádâhhovdâ Pirjo Seurujärvi, p. 0400 125 782 tâi pirjo.seurujarvi(at)metsa.fi
Proojeekthovdâ Kirsi Ukkonen, p. 0400 479 986 tâi kirsi.ukkonen(at)metsa.fi

Siida lii Anarist, já tobbeen tuáimih Sämimuseo já Paje-Laapi luándukuávdáš Siida já Raavâdviäsu Sarrit. Sämimuseo Siida tooimâst västid Sämimuseosiäđus. Paje-Laapi luándukuávdáš Siida kulá Meccihaldâttâs väldikodálii luándukuávdášviärmádâhân.

Ive 1998 lekkum Siida-rakânâs vijđeduvvoo já vuáđutivoduvvoo. Vijđedemossijd šaddeh Sämimuseo čuágáldâhsajeh já raavâdviäsu. Sämimuseo já luándukuávdáá ohtsâš vuáđučáitáldâh uđâduvvoo. Mij palvâlep ubâ uđâdempargo ääigi. Vijđedum já vuáđutivodum Siida já uđđâ čáitáldâh liäkkoo cuáŋuimáánust 2022.

 

Säämimuseo já Paje-Laapi luándukuávdáá Siida-rakânâs vijđeduvvoo uđđâ nurâldâhtiilijn já raavâdviäsutiilijn. Huksimpargo vuolgij joton vyesimáánust 2020 eennâmkuáivumpargoin. Moonnâm ohhoost kávnojii täävtih huksimsaje paaldâst orroo lieggâpocceekuáivuttuvâst. Täävtih láá viehâ vissásávt suátifaaŋgâi täävtih nube maailmsuáđi ääigist.

Siida huksimpargo vuolgij joton vyesimáánust. Siida-rakânâs kuohtuin keejijn láá joođoost viijđes eennâmsirdempargoh rakânâsâi vuáđui várás. Moonnâm ohhoost enâmist kávnojii täävtih, ko kuáivummaašin kuáivui lieggâpocceekuáivuttuvâid. Säämimuseo Siida arkeolog tuubdâi, ete täävtih láá ulmuu täävtih já kuáivumpargoid joskii tállân ton kuáivuttuvâst. Saje alne láá kavnâm kuittâg kulmâ ulmuu taavtijd. Sij láá viehâ vissásávt lamaš suátifaaŋgah.

Taavtijn almottii poolisân já museo arkeolog finnij love kuáivuđ taavtijd uáinusân. Poolis viežâi jáámmám ulmui taavtijd kuáivumpargo maŋa. Taavtijd vuolgâttii Helsigân lasetutkâmušâi já DNA-iskosij väldim várás.

Toovlášpasâttâs já faŋgâleirâ

Siida pirrâsist lii fastâ toovlášpasâttâs Saamen museo/Vuopaja aassâmsaje, mii lii äigidum keđgiääigist ryevdiááigán. Tot lii suojâlum toovlášpasâttâslavváin (295/1963). Toovlášpasâttâskuávlu vaaldij huámmášumán jo Siida uđâsrakânâsâi vuáváámist, vâi tot siäilu kuoskâmettummin puáttee suhâpuolváid.

Tiettih, ete saajeest lii lamaš meid suátiääigi Saksa suátivievâ nk. šaldefaŋgâleirâ, kost porgii ryeššiliih suátifaaŋgah. Návt Siida pirrâsist láá nube maailmsuáđi ääigi kuáivuttuvah já korsui pasâttâsah, main uási lii pááccám Siida rakânâsâi já pirâstittee luodâi vuálá. Huksimfinnoduv pargeid láá ravvim tađe várás, ete enâmist máhđulávt kávnojeh ovdâhistorjálii já historjálii ääigi tiiŋgah tâi huksiittâsah.

 

Lasetiäđuh: arkeolog Eija Ojanlatva, puh.040-1676145, eija.ojanlatv(at)samimuseum.fi

Mij lekkâp puudâ maŋa uuvsâid almugân Säämimuseo já Luándukuávdáš Siidast vu 1.6.2020 tme 9.00. Siämmást álgá tááláá Siida majemuš toimâihe. Mij uđâsmittem lii tääl vijđedemmuddoost, já kollimeh Siidast luhostuveh táválávt vala taan kollee ive ääigi kiiđâ 2021 räi.

Mii lunne lii suotâs eelliđ, ko muštep puohah puáttiđ kolliđ tiervâsin já toollâp torvokooskâ eres ulmuid.  Mij lep ornim kieđâi desinfistemsoojijd pirrâ Siida já huolâttep Siidast čurgimist THL ravvui mield.

Kesi- já čohčâpaje 2020 mij čuávvup spiekâsteijee ávusorroomaaigijd. 1.6.-30.9.20 koskâsii ääigi mij lep áávus jyehi peeivi tme 9-17. Mii ávusorroomäigi lii ehidist tiijme uánihub ko mii ovdâtiäđuin almonij. Roovvâdmáánu aalgâst mij palvâlep tälviávusorroomääigi mield ma-pa 10-17.

Ávusorroomääigi peesah uápásmiđ mii čáitálduvváid já kolliđ olgomuseokuávlust. Siida Shopist puávtáh kavpâšiđ já luándukuávdáá äššigâspalvâlmist finniih luuvijd já ravvuid sehe mađhâšeminfo. Mij lekkâp olgomuseo tállán, ko kuhes tälvi luovât já muottuuh suddeh.

Mij lekkâp mulsâšuddee čáitálduvâid mudoi mield. Čohčâmáánu loopâ räi puáhtá uáiniđ konservistum tiiŋgâid Säämimuseo čuágálduvâin čáitálduvâst “Sämmilii äärbi siäiluddijn” sehe avveellii luándukovvejeijee Pertti Turunen “Tiänu”-čuovâkovečáitálduv. Jonsahpeeivi ääigi lii Pekka Sammallahti čapisvielgis persovnkuuvij čaitâččeijee “Albma olbmot – Olmâ ulmuuh” -čáitálduv lekkâm vuáru. Taat čáitáldâh lii uáinimnáál Siidast ain kiiđâ 2021 räi.

Mij valmâštâllâp Siida Shop toimâttemvyebdim já forgâ väljejum puohtuid uážžu tiiláđ meiddei poostâ mield pááikán. Mij tieđettep uđâsmitten ovdánmist Siida Shop Instagramist já Siida Facebook-siijđost.

Raavvâdviäsu Sarritist puáhtá eelliđ virkosmuumin argâpeeivij tme 9-16. Mij faallâp peivipurrâmuš tme 11-14 já purrâmuš uážžu meiddei uástiđ fáárun. Mij lep ucedâm äššigâssoojij mere peelijn, já lekkâp teeraas ko šoŋŋâ tiptá.

Säämimuseo Siida paijeentoollâm Nuorttâlij ärbivyehitáálu Čevetjäävrist lii áávus taan keesi 1.7.-29.8. ma-lá tme 10-16. Ärbivyehitáálun lii nuuvtá siisâpeessâm. Mii čáitálduvah já olgokuávluh muštâleh nuorttâsämmilij historjást. Ärbivyehitáálu museokäävpist kaavnah ei. páihálijd kietâtuojijd.

Lieggâsávt tiervâ puáttim Siidan!

 

Puáđi Siidan tuše jis tust iä lah tavdâmeerhah.
Ana 1-2 m torvokooskâ eres kuállejeijeid já pargoviehân.
Keevti kietâtuiduu, ko puáđáh siisâ Siidan.
Mii hiivsigijn láá ravvuuh kieđâi posâmân.
Ko kuorsah tâi kašnah, suoijii iärásijd luávdimáin jieijâd njäälmi já njune kerdikiävttunjunelijnijn tâi jieijâd kietâkaaváin.
Mij porgâp čurgim THL ravvui miäldásávt.
Takkâ ko čuávuh torvoravvuid mii viäsust!

Sämimuseo já Luándukuávdáš Siida lii kiddâ 13.5.2020 räi koronavirusepidemia lavdâm tuástum já riskâjuávhui suojâlem tiet. Meid raavvâdviäsu Sarrit lii kiddâ 31.5.2020 räi.

Mij toimâp Staatârääđi ravvui mield. Mij čuávvup maht tile oovdân, já táárbu mield Siida lii kiddâ kuhheeb ääigi, ko lii almottum.

Ääigitásásâš tiätu tiileest kávnoo mii nettisiijđoin www.siida.fi sehe Facebook-siijđost já Instagramist.

Sämimuseo Siida pargeeh láá káiduspargoost já västideh tiäđustâlmijd šleđgâpoostâ já puhelin peht. Mii ohtâvuođâtiäđuh kávnojeh mii nettisijđoin www.siida.fi/anaraskiela/tiaduh-mist/ohtavuotatiaduh/.

Luándukuávdáš Siida rävvee puhelin já šleđgâpoostâ peht. Meid Aanaar kieldâ mađhâšemravvim rävvee puhelin já šleđgâpoostâ peht. Äššigâsah pyehtih väldiđ ohtâvuođâ Luándukuávdáá táválii ohtâvuođâtiäđui numeráid já šleđgâpoostân, moh kávnojeh nettisiijđoin www.siida.fi/anaraskiela/tiaduh-mist/ohtavuotatiaduh/. Huámmáš mii palvâlusâi spiekâstâhaaigijd www.siida.fi/anaraskiela/luandukuavdas/luandukuavdas-siida-assigaspalvalem/

 

Lasetiäđuh:
Museohovdâ Sari Valkonen, sari.valkonen@samimuseum.fi, puh. 040 767 1052
Miäcádâhhovdâ Pirjo Seurujärvi, pirjo.seurujarvi@metsa.fi, puh. 0400 125 782

Peividum 31.3.2020: 13.4.2020 räi –> 13.5.2020 räi
Peividum 31.3.2020: Meid raavvâdviäsu Sarrit lii kiddâ. –> Meid raavvâdviäsu Sarrit lii kiddâ tuáistáážân aainâs-uv 31.5.2020 räi .
Peividum 5.5.2020: tuáistáážân aainâs-uv 13.5.2020 räi –> 31.5.2020 räi
Peividum 5.5.2020: tuáistáážân aainâs-uv 31.5.2020 räi. –> 31.5.2020 räi.

Säämimuseo já Paje-Säämi luándukuávdáš Siida lii jotemin stuorrâ nubástusâi kulij: vijđedem, vuáđutivvoom, čáitáldâhuđâsmittem já čuágáldâhsirdemeh. Ovdil toid mij sappadijm koovjâid Siida nettisiijđoin. Mij uđâsmitijm www.siida.fi-siijđoid riskân já moobiilustevlâžžân sehe viiđâkielâlâžžân. Lasseen uđđâ siijđoin puáhtá tääl uástiđ liipuid čáitálduvváid.

Siida uđđâ nettisiijđoh láá viiđâkielâliih. Oovdeb suomâ-, eŋgâlâš- já tavesämikielâ paaldân mij lep pajedâm aanaar- já nuorttâsämikielâid. Mij toimâp jieččân aargâst puoh kuulmâ Suomâst sarnum sämikielân ei. museo- já luándušoddâdmist, čáitáldâhpargoost, projektijn.  Mij halijdep, ete taah kielah uáinojeh meiddei mii nettisiijđoin sehe lasetteh já movtijditteh sämikielâi kevttimân.

Siida nettisijđouđâsmittem mield mij njuškip Siidast mađhâšemvyebdim uđđâ junán já tuálvup jieččân lippuvyebdim meiddei neetin. Mij lep tast puoh museo- já luándukuávdái vuossâmui juávhust Suomâst. Nettikäävpist www.siida.fi-siijđoin puáhtá uástiđ Siida liipuid muuneeld. Siida nettikävppi tuhhit mäksimniävvun päikkieennâmlijd nettipaaŋkijd sehe stuárráámuu uási luáttukoortâin. Ko puáđáh Siidan, tun teivâdah ain mii äššigâspalvâleijeiguin, kiäh rävvejeh tuu čáitálduvváid já Siida palvâlussáid.

Säämimuseo já luándukuávdáš Siida sehe raavâdviäsu Sarrit uđđâ nettisiijđoh lekkâseh säämi kielâoho kunnen tu 24.10.2019.  Siijđoid lii ráhtám Advertising Kioski.

Lasetiäđuh:

Vyebdim- já markkânistemvästideijee Minna Väisänen
puh. 040 581 6434, minna.vaisanen@samimuseum.fi

Muttum 29.10.2020: Siida sisâpeessâmliipui nettikävppi muttoo. Nettilippukävppi lii tääl kiddâ já lehâstuvvoo oppeet ovdil keesi 2021.

Sämimuseo já Paje-Laapi luándukuávdáš Siida vuáđučáitáldâh uđâduvvoo já ton arkkitehtvuávájeijen lii väljejum hämivuávájeijee Harri Koskinen. Tááláš čáitáldâh uđâduvvoo Siida vijđedem já vuáđutivodem ohtâvuođâst. Uđđâ čáitáldâh valmâštuvá cuáŋuimáánust 2022.

Harri Koskisii já suu irâttâs Teollisuuden Ystävät Oy pargon lii uđđâ vuáđučáitálduv čáitáldâharkkitehtur- já graafisâš vuávám, čáitálduv huksiittem já ton kocceem, et pargoh olášuveh olmânáál. Koskisii kuhesáigásiih ohtsâšpargokyeimih láá mm. Iittala já Genelec. Sun lii porgâm Tapio Wirkkala ja Oiva Toika majemui čáitálduvâi arkkitehturijd. Pargoelimis aalgâ rääjist Koskisiist láá lamaš ennuv olgoeennâmliih äššigâsah iänáážin Japanist já Italiast. Taan ive loopâst Kiotost lekkâs suu vuávám hooteelkonsept.

• Sämimuseo já Luándukuávdáš Siida čáitáldâhuđâdem lii uáli fiijnâ já maaŋgâpiälásâš vuávámhástu sämikulttuur váimusist. Mun vuárdám moovtâ ohtsâšpargo maaŋgâi partnerijguin, iätá Harri Koskinen.

Siida čáitáldâhuđâdem lii kuávdáš já merhâšittee uási museo- já luándukuávdášrakânâs vuáđutiivoodmist já viijđedmist. Sämimuseo hovdâ Sari Valkonen lii tuđâvâš toos, et paijeel 20-ihásâš čáitáldâh uđâduvvoo, já et Koskinen poođij fáárun paargon.

• Koskinen lii olmâ valjim paargon rähtiđ pyeremusâid raamijd čáitáldâhsiskáldâssáid, nuuvtko Kansallismuseost mäccee sämikálvoid, main lii eromâš tehálâš roolâ uđđâ čáitálduvâst, iätá Valkonen.

Meccihaldâttâs Luándupalvâlusâid miäcádâhhovdâ Pirjo Seurujärvi iilood, et čáitálduv arkkitehtvuávájeijen álgá pegâlmâs hämivuávájeijee, Harri Koskinen.

• Siida tááláá váldučáitálduv vuáváin 1990-lovvoost áárvust onnum arkkitehteh Juhani Pallasmaa já Sami Wirkkala. Harri Koskisii valjim uđđâ Siida čáitálduvarkkitehtin lii šiev já árvulâš jotkâ Siida mainâsân. Koskisiist šadda leđe kuávdáš roolâ čáitálduv kulttuur- já luándusiskáldâsâi oohtân soovâtmist.

Arkkitehtvuávájeijee väljejui almolijn haahâmmonâttâlmáin. Haahâmmonâttâllâm lâi kyevtiuáság, já toos kuulâi nube muudon peessâm fällein pivdum pargočááitus.

 

Lasetiäđuh:

Museohovdâ Sari Valkonen                     040 767 1052                      sari.valkonen@samimuseum.fi

Miäcádâhhovdâ Pirjo Seurujärvi              040 767 1052                      pirjo.seurujarvi@metsa.fi

Hämivuávájeijee Harri Koskinen              040 5518160                       harri@harrikoskinen.com

 

Lasetiäđuh Harri Koskisiist:

http://www.harrikoskinen.com/

 

Siida lii Anarist, já rakânâsâst láá Sämimuseo já Paje-Laapi luándukuávdáš Siida já Raavâdviäsu Sarrit. Sämimuseo Siida tooimâst västid Sämimuseosiäđus. Paje-Laapi luándukuávdáš Siida kulá Meccihaldâttâs väldikodálii luándukuávdášviärmádâhân.

Ive 1998 lekkum Siida-rakânâs šadda vuáđulávt tivvum já tot vijđeduvvoo. Vijđedemoosijd sajaduveh Sämimuseo čuágáldâhvisteh já raavâdviäsu. Sämimuseo já luándukuávdáá ohtsâš vuáđučáitáldâh uđâduvvoo. Mij uđâdep, mut Siida lii áávus ubâ vuáđutivodem já čáitálduv uđâdem äigi. Mij lekkâp vuáđutivodum já vijđedum Siida já uđđâ čáitálduv cuáŋuimáánust 2022.