Taina Pieski Säämimuseo Siida museohovdân

Filosofi maisteri Taina Pieski lii väljejum Säämimuseo Siida museohovdân. Sämimuseovuáđudâs stivrâ toovâi valjimmiärádâs 15.5. tollum čuákkimist.

Sämimuseovuáđudâs stiivrâ saavâjođetteijee Liisa Holmberg lii iiloost, ete mij finnip noonâ, hárjánâm jođetteijee, kiäst lii šiev ohtsâšpargoviärmádâh.

Uđâsmittum já vijđedum Säämimuseo Siida lii väldikodálâš ovdâsvástádâsmuseo já tuáimá kulttuurpirâspargoi uásild kuávlulâš ovdâsvástádâsmuseon sämmilij päikkikuávlust. Säämimuseost pargeh museohoovdâ lasseen 16 fastâ parged já sesoŋääigi suullân 30 parged. Säämimuseo toimâsaje lii Anarist Säämimuseo já Paje-Laapi luándukuávdáš Siidast, mii lii ohtâ Tave-Laapi tehálumos mađhâšemčuosâttuvâin. Siidast kuállejeh ihásávt suullân 100 000 kyessid. Säämimuseost láá lasseen Iänuduvâst Tuodâr-Laapi luándukuávdáást ohtâsâš čáitáldâh Johtti Sápmelaččat -servijn. Säämimuseo paijeentuálá meiddei Nuorttâlij ärbivyehitáálu Aanaar Čevetjäävrist.

– Mun lam valjiimist uáli iiloost. Uđâsmittum Säämimuseo Siida addel aagâ aalmuglâš čiävláávuotân. Lii kunneeäšši peessâđ jođettiđ já ovdediđ oovtâ mijjân sämmiláid tehálumos organisaatio toimâm oovtâst mättee pargovieváin. Mun anam sämmilii kulttuuräärbi siäiludem tehálâžžân, mutâ museo huksee meiddei puátteevuotâäärbi, iätá Taina Pieski.

 

Lasetiäđuh:  Sämimuseovuáđudâs stiivrâ saavâjođetteijee Liisa Holmberg,
p. +47 9 303 6145, liisa@isfi.no

Muittut, muitalusat -haavâ nettisiijđoh láá tääl áávus!

Säämimuseo Siida jođettem Muittut, muitalusat-the story of the sámi by the sámi -haavâ nettisiijđoh láá tääl áávus čujottâsâst www.muittut.com.

Muittut, muitalusat -haavâst ovdeduvvoo uđđâ sämmilâš museokielâ Taažâ, Ruotâ já Suomâ säämimuseoid kuulmâ sierâ siskáldâsâs tááhust sämikulttuurân čonâstum piiloot vievâst. Pyeremuuh puátuseh integristojeh säämimuseoi čáitálduvâi uássin.

Siijđoin kaavnah haavâ vuáđutiäđuid: mii lii haavâ ulme já maht haavâ mittomeerijd áiguh juksâđ. Mii mainâsijdgis lii haavâ logo tyehin? Meiddei äigikyevdilis uđđâseh já haahân lahtojeijee puáttee tábáhtusah almostittojeh siijđoin.

Nettisiijđoh láá eidu tääl eŋgâlâškielân. Algâive 2021 ääigi siijđoh peividuvvojeh čiččâm haavâst kevttimnáál sämikielân sehe táru- já ruotâkielân.

Säämimuseoi lasseen hahâkyeimin tuáimih Laapi ollâopâttâh sehe Luleå teknisâš ollâopâttâh. Haahâ olášuttoo ääigist 1.1.2020 – 30.09.2022 já tom ruttâd Interreg Tave.

 

Lasetiäđuh haavâst:

Eeva-Kristiina Harlin, proojeekthovdâ, eeva-kristiina.harlin(at)samimuseum.fi

Minna Lehtola, hahâčällee, minna.lehtola(at)samimuseum.fi