Mââimõõzz sääʹmvuuʹd ruõkkâmsõõʹjin kuaivvum sääʹmpokainiiʹǩǩi paaʒʒtõõzz ruõkkât maddu oʹđđest Aanrest da Uccjooǥǥâst Saaʹmi ceerkavpeeiʹvi mâŋŋa 7.–8. påʹrǧǧmannust. Pokainiiʹǩǩid lij papp läullam määdd rääuhu äiʹjstes, da puõʹtti tååimtõõzzin ââʹnet ceerkvallaž maddu ruõkkmõõžž kääʹv. Pokaineeʹǩǩ liâ seeiltum eeʹjjest 2001 ääʹljeeʹl Sääʹm-muʹzei Siidast.

Pâʹsspeeiʹv 7.8.2022 sääʹmpokaineeʹǩǩ ruõkkât maddu Aanar Vuäʹmmruõkkâmsââʹjjsuâllʼja da vuõssaarǥ 8.8.2022 Uccjooǥǥ Mantojäurra di Njeäʹllem ortodookslaž jaammʼji ruõkkâmsâjja.

Poodd

Pâʹsspeeiʹv 7.8.2022 čiâss 15 ääʹljeeʹl jäʹrjstet Aanrest Sääʹm ceerkavpeeiʹvid vaʹrrjum kåvvsest podd, koʹst jeäʹrbi mieʹldd mušttlet pokainiiʹǩǩi historiast. Pokaineeʹǩǩ ruõkkât oʹđđest maddu Aanar Vuäʹmmruõkkâmsââʹjjsuâllʼja, koozz pokaineeʹǩǩ da sättnarood jååʹđtet. Kåvvsest maddu oʹđđest ruõkkmõõžž seuʹrrjet striiʹmjem pääiʹǩ.

Poodd juätkkje vuõssarggân 8.8.2022 čiâss 10 Uccjooǥǥâst, koʹst pokaineeʹǩǩ ruõkkât oʹđđest Mantojääuʹr vuäʹmm ruõkkâmsâjja. Ceerkavǩeeʹddest jäʹrjstet sättnarooʹde kååʹff- da saǥstõõllâmpodd.

Nuõrttsääʹm pokaineeʹǩǩ ruõkkât Njeäʹllem ortodookslaž ruõkkâmsâjja vuõssarggân 8.8.2022 čiâss 15 jäʹrjstem pooddâst. Sättnarooʹde jäʹrjstet kååʹff- da saǥstõõllâmpodd Njeäʹllem kruuggpõõrtâst.

Pukid pooddid lij vueiʹtlvaž seuʹrrjed ougglõssân striiʹmjem pääiʹǩ.

Maddu oʹđđest ruõkkmõš lij veeʹzz lääʹdd da tâʹvvjânnmallaž sääʹmõhttsažkååʹdd toobd seʹst õõʹnni podd. Sääʹmvuuʹdest vaʹstteei pooddid liâ jäʹrjstam ääiʹjab eeʹjjest 1995 Aanar Vuäʹmmruõkkâmsââʹjjsuâllʼjest, eeʹjjest 1997 Taarr Alattiost, eeʹjjest 2011 Taarr Njauddmest da eeʹjjest 2019 Ruõcc Lyckselest.

Tåimmkåʹdd vaʹsttad jäʹrjstõõllmõõžžin.

Sääʹm-muʹzei Siida lij välddam äššan altteed tåimmkååʹdd teâuddjââʹttet pokainiiʹǩǩi maddu oʹđđest ruõkkmõõžž. Tåimmkådda koʹlle Sääʹmteeʹǧǧest (Leo Aikio, Anu Avaskari, Vuokko Hirvonen), Saaʹmi siidsåbbrest (Hanna-Maaria Kiprianoff), Lääʹdd evaŋkeel-luteerlaž ceerkvest (Tuomo Huusko, Erva Niittyvuopio), Lääʹdd evaŋkeel-luteerlaž ceerkav Sääʹmtuâj saǥstõõllâmkååʹddest (Veli-Pekka Lehtola), Lappi ortodookslaž kappelsieʹbrrkååʹddest (Jaakko Vainio), Heʹlssen universiteeʹttest (Hanna Snellman), Mättʼtõs- da kulttuurministeriast (Hanna Kiiskinen) da Sääʹm-muʹzei Siidast (Minna Lehtola, Eija Ojanlatva).

Tuâǥǥa

Eeʹjjest 1995 Aanar Vuäʹmmruõkkâmsââʹjjsuâllʼja maaccteš Heʹlssen universiteeʹtt biotaalkâstiõtti stroiʹttel anatomia juâkksest 95 sääʹmpokaineeʹǩǩ paaʒʒtõõzz. Tâʹl alttõõzz ruõkkmõʹšše tuejjii Aanar seäʹbrrkååʹdd ceerkavsuåvtõs.

Anatomia juâkksa kuâđđje kuuitâǥ pokaineeʹǩǩ, kook universiteeʹtt altteem tåimmkåʹdd inventõõʹsti. Iiʹjjin 1998-1999 tåimmkåʹdd smiõtti 1800- da 1900-lååǥǥin norrum veiddsõs ooumažtäʹhttnorldõõǥǥ vaaldšummuž da tuʹtǩǩeemââʹnnem vuâđđjurddjid. Sääʹmpokainiiʹǩǩi beäʹlnn saǥstõõllâmkåʹdd tuejjii õhttsažtuâj še Sääʹmtiiʹǧǧin.

Saǥstõõllâmkååʹdd eʹtǩǩõõzz meâldlânji anatomia juâkkaz norldõõǥǥ sääʹmpokainiiʹǩǩid siʹrddeš seeiltemnalla sääʹmvõudda Aanar Sääʹm-muʹzei Siidaaʹje eeʹjjest 2001. Sääʹm-muʹzei lij seeiltam 172 pokaineeʹǩǩ paaʒʒtõõzzid ääʹššmeâldsânji tõi luõvtummšest vueʹljeeʹl. Suåppum meâldlânji pokainiiʹǩǩi tuʹtǩǩummša ij leäkku miõttum ni õhtt lååʹpp tõn äiʹǧǧen.

Lââʹssteâđ:
vs. muʹzeijååʹđteei Eija Ojanlatva, Sääʹm-muʹzei Siida, teʹl. 040 1676 145, eija.ojanlatv(at)samimuseum.fi

Sääʹm-museo da Pâʹjj-Lappi Luâttkõõskõs Siida Enâmeh láá mii párnááh” – Jânnam lie mij päärna -čuäjtõõzz ääʹveemšõddmõš serdd ǩieʹssmannu aʹlǧǧe.

Prääzkjep Sääʹm-museo da Meäʹcchalltõõzz Luâttkõõskõõzz õhttsaž čuäjtõõzz da vuäđđpueʹruum Siida 1.6.2022 puäʒʒhåiddameeʹjj aalǥâst. Seʹrddep ääʹveemšõddmõõžž tõn diõtt, što vueiʹttep leeʹd snäätnai tõʹst, što mij čuäjtõs lij vaalmâš da kääzzkâstt kõʹllʼjeeʹjid pukin pueʹrmõsân.

Ouddâl go ođđ čuäjtõs ävvan, Siidast lie čuäjtõõzz ǩiõččâmnalla pâi Sääʹm-museo ålggmuseovuuʹdest.

Sääʹm-museo äʹššneǩ-kääzzkõs, lippkaaupšummuš, Siida Shop, Meäʹcchalltõõzz äʹššneǩ-kääzzkõs da maatkčemvuäʹpstummuš tåimmje vuâđđpueʹreem ääiʹj kõskkpoddsaž sââʹjest Siida šeelljast da 1.4.2022 rääʹjest oođuum vueʹllaulast.

Restrantt Sarrit kääzzkâstt, go Siida lij äävai.

 

Leäʹp äävai

Täʹlvvpââʹjest 2021-2022(ålggmuʹzei, äʹššneǩ-kääzzkõs, restraantâst):
1.10.2021 – 31.3.2022 vu – su 10 – 16 (pâ kättum)
*Rosttov 2021: 24.12. 10-14, 25.12. 12-16
1.4. – 31.5.2022 vu – su 10 – 17 (pâ kättum)

Ǩieʹsspââʹjest 2022 (ođđ Siida):
1.6. – 30.9.2022 č 9 – 18 juõʹǩǩ peeiʹv

 

Siida lij Aanrest, da tåʹben tåimma Sääʹm-museo da Pâʹjj-Lappi luâttkõõskõs Siida di Restrantt Sarrit. Sääʹm-museo Siida tåimmjummšest vaʹsttad Sääʹm-museofondd. Pâʹjj-Lappi luâttkõõskõs Siida kooll Meäʹcchalltõõzz väʹlddkååʹddlaž luâttkõõskõs-säimmõʹsse.

Lââʹssteâđ: Minna Muurahainen, 0405816434, minna.muurahainen(at)samimuseum.fi

Aanar ceerkavsiidâst sääʹm-muʹzei da Tâʹvv-Lappi luâttkõõskõs Siida lij kâskka jõnn muttsi. Raajâlm veeideemtuâj lie alttuum da ǩeâđđa 2021 äʹlǧǧe ânnʼjõž raajâlmvueʹzz vuâđđpueʹreemtuâj. Veeidummuž da vuâđđpueʹrummuž õhttvuõđâst ođsmââʹttet še Sääʹm-muʹzeei da Luâttkõõskõõzz õhttsaž väʹlddčuäjtõõzz.

Ååʹn leät veeideʹmmen Siida-raajâlm, kååʹtt lij kääzzkâsttam Aanrest pâʹjjel 20 eeʹǩǩed Sääʹm-muʹzeei, Tâʹvv-Lappi luâttkõõskõõzz da Siida poorrâmpääiʹǩ. Ânnʼjõž väʹlddraajâlm õhttvuõʹtte raajât Sääʹm-muʹzeeja ânnʼjõžäiggsaž norldõksõõʹjid, koid čäʹǩǩe še Lääʹddjânnam meersažmuseost maʹcci sääʹmkääuʹn. Poorrâmpäikka raajât obbnes ođđ da pueʹrben toiʹmmjeei sõõʹjid pååđvuässa. Veeideemvueʹzz valmštâʹvve ǩeâđđa 2021.

Ânnʼjõž Siida-raajâlm vuâđđteevvmõš älgg, ko veeideemvueʹzz valmštâʹvve. Vuâđđpueʹrummšest jeäʹrbi mieʹldd veeideet Siida jõnnkääʹrd da tuâjjlažkåʹdd vuäǯǯ ođđ reâuggamsõõʹjid. Ânnʼjõž vuâđđčuäjtõõzz puʹrǧǧeet, da sâjja raajât ođđ čuäjtõõzz. Siida ođđ väʹlddčuäjtõs lij mâʹte ouddâl Sääʹm-muʹzeei da Luâttkõõskõõzz õhttsaž, da tõʹst õhttâʹvve kulttuur- da luâttsiiskõõzz õhttân obbvuõttân.

Siida ođđ čuäjtõõzz kåčškuäʹđet nõõmin ”Enâmeh láá mii párnááh – Jânnam lie mij päärna”. Nõmm puätt aanrõš Matti Morottaja ǩeeʹrjtem aanrõšǩiõllsaž Enâmeh láá mii párnááh -tiivt mieʹldd. Čuäjtõõzz nõmm õhttad luâtt- da kulttuurteemai tääʹrǩmõs saaǥǥid. Sääʹm äʹrbbteâđ moštt lij kuâddam luâđ da õhttsažkååʹdd muttsi pâʹjjel puõlvvõõǥǥâst nobba. Kueʹstelm pirran âânn seʹst miljooni iiʹjji ǩiõjid. Måkam luâđ kueʹđđep mij mââipeäʹlnn pueʹttjid?

Sääʹm-muʹzei Siida muʹzeijååʹđteei Sari Valkonen maainast, što Siida čuäjtõõzz kulttuursiiskõõzzin smiõttât, mäʹhtt mõõnnâmäiʹǧǧ jeäll meeʹst. – Juõʹǩǩkast jeäll määŋghämmsaž jeeʹres äiʹǧǧpõõʹji äʹrbb, koon veäkka šiõttlõõvât muttsid pirran. Ođđ čuäjtõs lij Sääʹm-muʹzeei maainâs säʹmmlai pirr. Čuäjtõstuõjju vuässââʹttet še sääʹmõutstõõzz.

Meäʹcchalltõõzz muõrrǩeʹddvuuʹd jååʹđteei Pirjo Seurujärvi maainast, što Luâttkõõskõs Siida ǩiõččâmkuuʹlmest ođđ čuäjtõõzzâst puuʹtet ouʹdde jeäʹrben mââimõs jiõŋŋpââʹj mâŋŋa šõddâm äimmõshistoria da smiõttât, mii äimmõʹsse šâdd pueʹttiääiʹj. Luâtt-teemaid ǩiõttʼtõõlât Pâʹjj-Lappi suõjjeemvuuʹdi di tõin očndõõvvi jeeʹresnallšem luâtt-tyyppi da jeälaišlaaji pääiʹǩ. Mij ââʹnnep huõl luâđ määŋghämmsažvuõđâst di kulttuurääʹrbest, da tuâjjan puåđõõzz kueʹdde puõlvvõõǥǥi pâʹjjel. Ođđ čuäjtõs pohtt fijnnsânji ouʹdde tän tuâj, Seurujärvi juätkk.

Ođđ čuäjtõõzz väʹlddplaaneei lij Harri Koskinen Teollisuuden Ystävät Oy:st. Čuäjtõõzz projeʹkttšurrân tåimma Meäʹcchalltõõzzâst Kirsi Ukkonen da Sääʹm-muʹzeeʹjest Eeva Kyllönen. Darja Heikkilä tåimm muʹzeei čuäjtõskoordinaattoorân.

Siida väʹlddčuäjtõõzz kulttuurvueʹzz oođummuž teäggte Kone fondd, Lääʹddjânnam Kulttuurfondd / Museovisio di Jenny da Antti Wihuri fondd. Sääʹm-muʹzeeʹjest lij tuâj vueʹlnn še čuäjtõõzz ođsmâttmõʹšše õhttneei Muittut, muitalusat – the story of the Sámi by the Sámi -interreghaʹŋǩǩõs. Siida väʹlddčuäjtõõzz luâttvueʹzz ođsmâttmõʹšše Meäʹcchalltõs vuäǯǯai teäggtõõzz riikk lââʹsstäällarvvlõõzzâst.

 

Lââʹssteâđ:
Muʹzeijååʹđteei Sari Valkonen, teʹl. 040 767 1052 leʹbe sari.valkonen(at)samimuseum.fi
Muõrrǩeʹddvuuʹd jååʹđteei Pirjo Seurujärvi, teʹl. 0400 125 782 leʹbe pirjo.seurujarvi(at)metsa.fi
Projeʹkttšurr Kirsi Ukkonen, teʹl. 0400 479 986 leʹbe kirsi.ukkonen(at)metsa.fi

 

Siida lij Aanrest, da toʹben tåimma Sääʹm-muʹzei da Pâʹjj-Lappi luâttkõõskõs Siida di Poorrâmpäiʹǩǩ Sarrit. Sääʹm-muʹzei Siida toiʹmmjummšest vaʹsttad Sääʹm-muʹzeifondd. Pâʹjj-Lappi luâttkõõskõs Siida kooll Meäʹcchalltõõzz väʹlddkååddlaž luâttkõõskõs-säimmsa.

Eeʹjj 1998 ääʹvuum Siida-raajâlm veeideet da vuâđđteevat. Veeideemvueʹzzin lie Sääʹm-muʹzeei norldõksââʹj di poorrâmpäiʹǩǩ. Sääʹm-muʹzeei da luâttkõõskõõzz õhttsaž vuâđđčuäjtõõzz ođsmââʹttet. Kääzzkâʹsttep čõõđ oođeemääiʹj. Veeiduum da vuâđđtivvum Siida di ođđ čuäjtõõzz ääʹveet njuhččmannust 2022.

Ääʹveep kõõut mâŋŋa uusid kueʹssid Sääʹm-muʹzei da Luâttkõõskõs Siida vu 1.6.2020 čiâss 9.00. Seämma poodd älgg ânnʼjõž Siida mââimõs toiʹmmjemeeʹǩǩ. Oođummuž lij ååʹn šuuʹreempââʹjest da kueʹssreeis Siidast oʹnnste harjjnum maʹlle võl tän jooʹđi eeʹjj ääiʹj ǩiʹđđe 2021.

Tääiʹben lij hääʹsǩes jieʹlled, ǥu muʹšttep puk pueʹtted kueʹssjed tiõrvân da ââʹnnep staankõõsk jeeʹres oummuid. Leäʹp riâššâm ǩiõttpõõssâmpaaiʹǩid jeeʹres sõõʹjid Siidast da ââʹnnep huõl Siida čiistummšest THL vuäʹpstõõzzi meâldlânji.

Ǩieʹss- da čõhččpââʹjest 2020 jääʹǩǩtep čoʹrstemnallšmid äävaiåårramaaiʹjid. 1.6.-30.9.20 kõskksaž poodd leäʹp äävai juõʹǩǩ peeiʹv čiâss 9-17. Ouddteâđast čoʹrsteeʹl lij äävaiåårramäiʹǧǧ jeäʹǩǩääi čiâss vuäʹnkab. Kålggmannu aalǥâst ääʹljeeʹl kääzzkâʹsttep täʹlvväävaiåårramääiʹj meâldlânji mâ-pâ 10-17.

Äävaiåårramaaiʹji poodd piâzzak tobdstõõttâd čuäjtõõzzid da kueʹssjed ålggmuʹzeivuuʹdest. Siida Shopist vuäitak tuejjeed vuästtõõzzid da luâttkõõskõõzz äʹššneǩ-kääzzkõõzzâst vuäǯǯak looʹvid da vuäʹppõõzzid di turismmvuäʹpstõõzz. Ålggmuʹzei ääʹveep tâʹl, ǥu kuʹǩes täʹlvv lueʹǯǯai da muõtti soʹddje.

Vaajtõõvi čuäjtõõzzid ääʹveep podd pooddi. Čõhččmannu loopp räjja liâ vueiʹnnemnalla konservõsttum kääuʹn Sääʹm-muʹzei norldõõǥǥin čuäjtõõzzâst ”Sääʹm ääʹrbid seeilteeʹl”di âʹvvelneeʹǩǩ luâttsniimi Pertti Turunen ”Teänn” -snimldõkčuäjtõs. Evvanpeeiʹv poodd lij vuârast Pekka Sammallahti čaʹppesviõʹlǧǧes ooumažsnimldõõǥǥ čuäʹjtem ”Albmaolbmot – Grååtnâs oummu” -čuäjtõõzz ääʹvummuš. Tät čuäjtõõzzam lij vueiʹnnemnalla Siidast ǩiiđ 2021 räjja.

Valmštõõllâp Siida Shop tooimtemkaaupšummuž da sõrgg vuäǯǯak vaalšum ouddsid še pååʹšt mieʹldd domoi. Teâđtep oođummuž ouddnummšest Siida Shop Instagraamâst da Siida Muâttǩeeʹrj seeidast.

Sarrit Restraantâst vuäitak jieʹlled virkkõõvvmen arggpeeiʹvin čiâss 9-16. Peiʹvvporrmõš lij taʹrjjeemnalla čiâss 11-14 da porrmõõžž vuäitak vuäʹstted še mieʹldd. Äʹššneǩpaaiʹǩi meäʹr leäʹp peäʹltam da teraass ääʹveep, ǥu šõŋŋ seänn da pakkan.

Sääʹm-muʹzei Siida tuõʹllʼjem Saaʹmi äʹrbbvuõttpõrtt Čeʹvetjääuʹrest lij äävai tän ǩieʹzz 1.7.-29.8. mâ-su čiâss 10-16. Äʹrbbvuõttpõʹrtte peäss määustaa. Čuäjtõõzzam da ålggvuʹvddpäiʹǩǩ čuäʹjte nuõrttsaaʹmi historia pirr. Äʹrbbvuõttpõõrt muʹzeikaaupâst kaaunak odm. pääiklaž ǩiõtt-tuâjaid.

Ǩeʹnnvânji tiõrv pueʹttem Siidaaʹje!

 

Puäʹđ Siidaaʹje pâi õudldõõzzteʹmes poddân.
Âânn staankõõsk 1-2 m jeeʹres kueʹssid da tuâjjlažkådda.
Âânn ǩiõtt-toiddi, ǥu puäđak sizz Siidaaʹje.
Ǩiõttpõõssâmpääiʹǩ liâ äʹššneǩnuuʹžnǩin.
Koossâm poodd leʹbe kâʹšnntõõllâm poodd suõjjâd järrsid ââʹneeʹl jiijjad njääʹlm da njuuʹn ooudâst põʹmmainozvaireeʹppiǩ leʹbe kõõnjârtaibbâz.
Spraavâp čiistummuž THL vuäʹpstõõzzi meâldlânji.
Späʹsseb ǥu jääʹǩǩtak staanvuäʹpstõõzzid paaiʹǩin!

Sääʹm-muʹzei da luâttkõõskõs Siida lij kattum äʹššneeʹǩǩin pâi 13.5.2020 räjja koronaepidemia diõtt. Še restrantt Sarrit lij kattum äʹššneeʹǩǩin pâi 31.5.2020 räjja.

Tuåimmjep valdiasåbbar vuäʹppõõzz mieʹldd. Praavâp mäʹhtt vueʹǩǩ mâânn ooudâs da jõs taarbâž juäʹtǩǩep kattum-ääiʹj.

Kaaunak vuõiʹǧǧes teâđ vueʹjjest meeʹst neʹttseeidi da Facebook-seeidi di instagram.

Sääʹm-muʹzei Siida tuâjjla tueʹjjee dååma, leâša vaʹsttee teâđstõõllmõõžžid  teʹlfooʹnivuiʹm da neʹttpååʹšt mieʹldd. Õhttvuõđteâđ kaaunak neʹttseeidin www.siida.fi/saamkioll/teatt-mij-pirr/ohttvuodtead/.

Luâttkõõskõs Siida vuäʹppast teʹlfoonin da neʹttpååʹšt mieʹldd. Aanar kååʹdd maatkčemvuäʹpstõõzz uuʹdet teʹlfoonin da neʹttpååʹšt mieʹldd. Äʹššneeʹǩǩ vuäiʹtte leeʹd õhttvuõđâst luâttkõõskõõzz takai teʹlfon-nââmrid da neʹttpååʹštid, koid kaaunak neʹttseeidi www.siida.fi/saamkioll/teatt-mij-pirr/ohttvuodtead/ . Hoʹhsse čoʹrstõkääiʹjid kääzzkõõzzâst (www.siida.fi/saamkioll/luattkooskos/luattkooskos-siida-aʹssneǩ-kaazzkos/).

Lââʹzzteâđ:

Sari Valkonen sari.valkonen@samimuseum.fi, puh. 040 767 1052
Pirjo Seurujärvi, pirjo.seurujarvi@metsa.fi, puh. 0400-125 782

Peiʹvvuum 31.3.2020: 13.5.2020 räjja –> 13.5.2020 räjja
Peiʹvvuum 31.3.2020: Še restrantt Sarrit lij kattum. –> Še restrantt Sarrit lij kattum äʹššneeʹǩǩin pâi 31.5.2020 räjja.
Peiʹvvuum 5.5.2020: äʹššneeʹǩǩin pâi 13.5.2020 räjja –> 31.5.2020 räjja
Peiʹvvuum 5.5.2020: äʹššneeʹǩǩin pâi 31.5.2020 räjja. –> 31.5.2020 räjja.

Sääʹm-muʹzei da luâttkõõskõs Siida lij mõõnnmen vuâstta jõnn oođummšid. Ooudâst lie veeidõs, vuâđđteevvmõš, čuäjtõsoođummuš, da norldõõǥǥi serddmõš. Ouddâl tõid čiistim põõʹlid Siida neʹttseeidin. Ååʹn www.siida.fi -seeid tuåimmje še mobiil-aparaattin da lie lookkâmnalla vitt jeeʹres ǩiõlin.

Siida ođđ neʹttseeid lie ååʹn še aanrõš- da nuõrtsääʹmǩiõlâz ǥu ääiʹjben seeidid lie pâi lääddas, tâʹvvsäämas da eŋglõsǩiõllân. Tuåimmjep aarǥâst pukin koumm Lääʹddjânnmest mainstum sääʹmǩiõlin jeäʹrbi mieʹldd muʹzei- da luâttšâddeeʹmest, čuäjtõõzzid da haŋggõõzzid. Haaʹleep što täk ǩiõl kuâsttje še mij neʹttseeidin da älšmâʹtte di lââʹzzte sääʹmǩiõlid äännmõõžž.

Siida neʹttseiddooudummuž mieʹldd še liipp vuästtmõõžž  ooʹnnast neeʹttest. Neʹttkaaupâst vuäitak vuäʹstted ouddǩiõʹtte liippid Siidaaʹje. Vuäitak mäʹhssed liippid dommjânnamla neʹttbaaŋkin da määŋg jeeʹres kredittkoortivuiʹm. Mij tuâjjlaid ääʹššlažkääzzkõõzzâst lie vueʹrddmen tuu ǥu puäđak da vuäʹpste tuu čuäjtõõzzid da Siida kääzzkõõzzid.

Siida Sääʹm-muʹzei da luâttkõõskõõzz di Sarrit restraant  ođđ neʹttseeid ääʹvee sääʹmǩiõllneäʹttel  cisttân nelljdpeiʹvven 24.10.2019 . Neʹttseeidid lij raajjâm Advertising Kioski.

Lââʹzzteâđ:

Kaaupšummuš- da markknâʹsttemvaʹstteei Minna Väisänen
Teʹl. 040 581 6434, minna.vaisanen@samimuseum.fi

Peiʹvvuum 29.10.2020: Siida sizzpiâssâmliippi neʹttkauppsysteeʹm lij vaajtõõvvmen. Neʹttlippkauppam lij ååʹn kättum da ääʹveet eʹpet ǩeäzzas 2021.

Sääʹm-muʹzei da Pâʹjj-Lappi luâttkõõskõs Siida oođeemnallšem takaičuäjtõõzz arkktehtplaaneeʹjen lij vaʹlljuum täävvai Harri Koskinen. Ânnʼjõž čuäjtõs oođeet Siida veeideem da vuâđđteevvam õhttvuõđâst. Ođđ čuäjtõs valmštââvv njuhččmannust 2022.

Harri Koskinen da suu põõrǥâs Teollisuuden Ystävät Oy tuâjjan lij oođeemnalla åårrai takaičuäjtõõzz čuäjtõsarkktehtuur- da graaflaž plaanummuš di čuäjtõõzz raajtummuš da raajjmõõžž vuåppmõš. Koskinen koon kuʹǩesäiggsa õhttsažtuâjjtaaurõõžž liâ jm. Iittala da Genelec. Son lij tuejjääm Tapio Wirkkala da Oiva Toikka mââimõs čuäjtõõzzi arkktehtuurid. Karriääʹres aalǥ rääʹjest Koskisest liâ leämmaž määŋg ålggjânnam ääʹššla ââldmõsân Japanist da Italiast. Tän eeʹjj looppâst Kiotost ävvan suu plaanuum hoteʹllkonseʹpt.

• Sääʹm-muʹzei da Luâttkõõskõs Siida čuäjtõsoođummuš lij sämmai mooʹččes da määŋgpeällsaž plaanummušvaʹǯǯtõs lij sääʹmkulttuur tääʹrǩmõs äʹšš. Vuârdam čuuʹt õhttsažtuâj määŋgi taaurõõžživuiʹm, särnn Harri Koskinen.

Siida čuäjtõsoođummuš lij kompaktt da miârkteei kuʹsǩǩ muʹzei- da luâttkõõskõspõõrt vuâđđteevvmõõžž da veeidõõzz pirr. Sääʹm-muʹzei šurr Sari Valkonen lij toođvaž, što pâʹjjel 20- eeʹǩǩed räjja kuâstam čuäjtõs oođeet, da što Koskinen vuäǯǯat tuõjju mieʹldd.

• Koskinen lij grååtnai vaʹlljummuš tuejjeet pueʹrmõs raamm čuäjtõs-siiʹsǩid, mäʹhtt Kansallismuʹzeist mååusat puõʹtti sääʹmkaauʹnid, koin lij jeäʹrben täʹrǩǩ rool ođđ čuäjtõõzzâst, särnn Valkonen.

Meäʹcchalltõõzz Luâttkääzzkõõzzi luâttmuõrrkaardâs šurr Pirjo Seurujärvi rämmaš, što čuäjtõõzz arkktehtplaaneeʹjen vuäǯǯat peäggtum täävvai, Harri Koskinen.

• Siida ânnʼjõž väʹlddčuäjtõõzz plaaneeʹjen 1990 lååǥǥast leʹjje ärvvsa arkkteeht Juhani Pallasmaa da Sami Wirkkala. Harri Koskinen šõõddi vaʹlljuum oođeemnalla åårrai Siida čuäjtõsarkktehten da tõt lij fiinâs da ärvvsaž juätkk Siida mainnsa. Koskinen rool puätt leeʹd kõskksaž čuäjtõõzz kulttuur- da luâttsiiskõõzzi õʹhttešiõttummšest.

Arkktehtplaaneei vaʹlljummuš čõõđteš õlmmsa haʹŋǩǩõsmõõntõõllmõõžž mieʹldd. Haʹŋǩǩõsmõõntõõllmõš leäi kueiʹtpooddlaž, da tõõzz siiʹsǩtõõvi nuuʹbb podd-a ouddnam taʹrjjeeʹjin annum tuâjjčuäjtõs.

 

Lââʹzzteâđ:

Muʹzeišurr Sari Valkonen                            040 767 1052 sari.valkonen@samimuseum.fi

Luâttmuõrrkaardâsšurr Pirjo Seurujärvi     040 767 1052 pirjo.seurujärvi@metsa.fi

Täävvai Harri Koskinen                                040 551 8160 harri@harrikoskinen.com

Lââʹzzteâđ Harri Koskisest:

http://www.harrikoskinen.com/

 

Siida lij Aanrest, da toʹben tuåimmje Sää´m-muʹzei da Pâʹjj-Lappi luâttkõõskõs Siida di Restrantt Sarrit. Sää´m-muʹzei Siida tuåimmjummust vaʹsttad Sää´m-muʹzeifondd. Pâʹjj-Lappi luâttkõõskõs Siida kooll Meäʹcchalltõõzz väʹlddkååddlaž luâttkõõskõs-säiʹmmõʹsse.

Eeʹjjest 1998 äävuum Siida-põrtt vuâđđteevat da veeideet. Veeidõsvueʹzzid sâjjdâʹtte Sääʹm-muʹzei norldõksââʹj di restrantt. Sääʹm-muʹzei da luâttkõõskõõzz õhttsaž takaičuäjtõs oođeet. Oođeep, leša kääzzkâʹsttep čõõđ vuâđđteevvam- da čuäjtõsoođummuš ääʹjj. Ääʹveep vuâđđtivvum da veeiduum Siida di ođđ čuäjtõõzz njuhččmannust 2022.

Leader Pohjoisin Lappi ry lij ouddam Sääʹm-muʹzei Siida teäggtõõzz Põrtt, äiʹtt, puʹvrr –nuõrttsaaʹmi raajjâmäʹrbbvuõtt -haʹŋǩǩõõzz vääras. Haʹŋǩǩõs kooll nuõrttsaaʹmi raajjâmäʹrbbvuõʹtte da haʹŋǩǩõõzz čõõđtemnalla Sääʹm-muʹzei Siida lij mieʹldd nuõrttsäʹmmlai aazztem 70-eeʹjj prääʹznǩest. Põrtt, äiʹtt, puʹvrr -haʹŋǩǩõs taʹrjjad määŋgnallšem vueʹjjid raajjâd da mättjed õõutsââʹjest nuõrttsaaʹmi raajjâmäʹrbbvuõđ pirr. Nuõrttsäʹmmla jälste peâđǥai veiddsõs Aanar kååʹddest. Tõn diõtt leäʹp tuʹmmjam, što mäʹhssep mäʹtǩǩkuulid tõid, kook puäʹtte mieʹldd tän tuåimmjummša.

Haʹŋǩǩõõzz diõtt riâššât koumm vuäʹppstempeeiʹv raajjâmäʹrbbvuõđ hoiʹddjem pirr da tõk lie äävai pukid. Vuäʹppstempeeiʹv ââʹnet Njeʹǯǯjääuʹr Luhttpõõđâst, Njeäʹllmest da Čeʹvetjääuʹrest. Njeʹǯǯjääuʹr vuäʹppstempeiʹvv ââʹnet piâtnâc 23.8.2019 čiâss 12-14. Ouddlâʹsttemvuuʹd ämmat-tuâjjlaž vuäitt jieʹlled tuu pääiʹǩ ǩiõččmen, håʹt mâka täättak da tuu päiʹǩǩ lij siid ââlda. Ko haaʹlääk äʹšštoobdi veäʹǩǩvuõđ tääl čââppvuõđ ärvvtõõllâm diõtt, ton õõlǥak vaʹrrjed ääiʹj ooudǩiõʹtte teʹlfooʹnin 040 1801501 leʹbe neʹttpååʹštin paivi.magga@samimuseum.fi

Haʹŋǩǩõõzz ääiʹj teevat Čeʹvetjääuʹr Äʹrbbvuõttpõõrt ålggmuʹzei põõrtid, mõõk lie Suõʹnnʼjelsiid maalli mieʹldd oʹđđest rajjum põõrt. Teevvmõõžž vuâlla šâʹdde aassâmpõrtt, sauʒʒpuʹvrr, määddvuâlaž ǩeâllar da tän voudda sirddum suõvvsäuʹnn. Jurddjen lij što teevvap Äʹrbbvuõttpõõrt põõrtid õõutsââʹjest nuʹtt, što juõʹǩǩkaž vuäitt vuässõõttâd mättjem diõtt leʹbe jiiʹjjes teâđaid jueʹjjeeʹl. Teevvmõõžž jååʹđteei lij ouddlâʹsttem-määstar Marko Korkeasalo. Raajjmõš Čeʹvetjääuʹrest altteet neäʹttlest 34. Haʹŋǩǩõõzzâst teâđtet sosial mediast da Čeʹvetjääuʹr iʹlmmtemtaauli âʹlnn.

Põrtt, äiʹtt, puʹvrr – nuõrttsaaʹmi raajjâmäʹrbbvuõtt -haʹŋǩǩõs reâugg õõutsââʹjest Čeʹvetjääuʹr škooulin, ǩeäʹst še lij 70-eeʹjjprääʹzniǩ. Riâššâp tuâjjpaaʹjid, koin škooulneeʹǩǩ še peäʹsse raajjâd äʹrbbvuõđlaž sauʒʒpuuʹr Äʹrbbvuõttpõõrt ǩeʹddmärkka.

Lââʹzzteâđ: tuʹtǩǩeei Päivi Magga, paivi.magga@samimuseum.fi, 040-1801501