Ǩiõllneäʹttel * Kielâokko * Giellavahkku * Saamen kielten viikko*
20.-26.10.2025
Ǩiõllneäʹttel täävtõssân lij vuäǯǯad sääʹmǩiõlid vuâmmšõõzz, kuâsttjemvuõđ da kollʼjemvuõđ pukin õhttsažkååʹdd vueʹzzin Lääʹddjânnmest, Ruõccjânnmest da Taarrjânnmest. Sääʹmǩiõl liâ vääžnai oʹdinakai ǩiõllõõʹnnʼja, sääʹm-meeru da še lääʹdd õhttsažkådda. Sääʹmǩiõl tåimma saakkummuž neävvan da tõk liâ pieʹǩǩ identiteeʹtt, kulttuurääʹrb da õʹhttekuullmõõžž. Jiijjâs ǩiõl kuâsttjummuš arggpeeiʹvest lij vääžnai sääʹmǩiõli õõʹnnʼjid, sääʹmǩiõl sâjja, õʹhttekuullâmvuõđ tobddja.
Sääʹmǩiõli kuâsttjummuš čuäʹjat še ǩiõl priimmʼmõõžž õhttsažkååʹddest. Ǩiõllneäʹttel lij riõššum eeʹjjest 2019 ääʹljeeʹl, täʹl vieʹttješ ÕM meeraikõskksa alggmeerai ǩiõli eeʹjj. Ǩiõllneäʹttel lij riõššum kålggmannu poodd neäʹttlest 43 tâʹl ääʹljeeʹl juõʹǩǩ eeʹjj. Sääʹmteʹǧǧ veekk čõõđ Ǩiõllneäʹttel õhttsažtuâjast Ruõcc da Taarr Sääʹmtiiʹǧǧin.
Tiõrvpueʹttem mieʹldd sääʹmǩiõli neäʹttla!