Ougglõs-šõddmõš: Õutstõsvitriin täʹvvri vaʹlljeemšõddmõš: Nuõrttsääʹm täʹvver
Vuõssargg 10.3.2025 čiâss 17:00
Sääʹm-museo Siida kåčč sääʹmõutstõõzz vaʹlljeed täʹvvrid väʹlddčuäjtõʹsse. Museo vaʹlljad sääʹmtäʹvvrid Siida väʹlddčuäjtõõzz õutstõsvitriiʹne õõutâst õutstõõzzin. Tän vuâra čuäʹjtemnalla peäʹsse Tâʹvv-Vuâđđmäädd museo sǩiâŋkkâm sääʹmtäʹvver, kook koʹlle Samuli Paulaharju noorrâm norldõʹǩǩe. Õutstõsvitriin täʹvvrid vaajtet huâllamkõõut ääiʹj vueʹssmannust 2025. Ouddvaʹlljummšid õutstõsvitriiʹne tuejjeet ougglõs- da hybriidšõddmõõžžin. Ougglõskaaunõõttmõõžž šâʹdde Teams-šõddmõššân, koin täʹvvrid puuʹtet ouʹdde hiâlpâld Sääʹm-museo Finna-seiddõõzz pääiʹǩ.
Vuõssaarǥ 10.3. čiâss 17:00 lij Teams-kaaunõõttmõš, koʹst puʹhttep ouʹdde nuõrttsääʹm täʹvvrid. Ääʹveep Teams-õhttvuõđ še Sääʹmpõõrtâst Čeʹvetjääuʹrest, koʹst ougglõs-šõddmõõžž peäss seuʹrrjed õhttsaž teâttikknest. Museo tuâjjlaž lij pääiʹǩ âʹlnn čiâss 16:00 ooudårra, õhttvuõđ Siidaaʹje ääʹveet čiâss 17:00.
Šõddmõõžž lie lääʹddǩiõllsa. Teams-liiŋkid šõddmõõžžid kaaunak täʹst di Siida sosiaalʼlaž media kanaalin.
Tiõrv pueʹttem mieʹldd tuejjeed täʹvvervaʹlljummšid da vaaikted Siida väʹlddčuäjtõõzz siiskõõzzid!
Lââʹssteâđ: Õutstõstuâjjvaʹstteei Pia Nikula, pia.nikula(at)samimuseum.fi, teʹl. 040 621 2663
Amanueʹnss, norldõõǥǥ Marjo-Riitta Rantamäki, marjo-riitta.rantamaki(at)samimuseum.fi, teʹl. 040 571 5670
Snimldõk: Sääʹm-museo Siida / Saara-Maija Pesonen