Tuõddri Peeʹrel
25.9.2015 - 6.1.2016
Čuäʹjtõs tobddstad ǩiõčči nuõrttsäʹmmlai kulttuuʹre, ǩiõttʼtuâjaid da äʹrbbvuõʹtte. Nuõrttsäʹmmlai jieʹllempirrõõzz mooččâdvuõtt da kulttuur reeʹǧǧesvuõtt seʹrddjââvv ǩiiččeeʹjid mooʹččes snimldõõǥǥin. Snimldõõǥǥ poʹhtte ǩiiččeei vuäinnmõʹšše tääʹrǩes detaaljid nuõrttsääʹmpihttsin, čieʹppeld valmštum kääuʹnid da jieʹlli nuõrttsääʹmkulttuur. Čuäʹjtõõzzâst liâ vueʹinnemnalla še nuõrttsäʹmmlai ääʹrbvuâlaž ǩiõttʼtuâi.
Nuõrttsäʹmmlain lij aaibâs reeʹǧǧes da jiijjâsnaʹllšem sääʹmǩiõtt-tuâjjäʹrbbvuõtt, koʹst ouddmiârkkan liâ vuäʹddtuâj da sääʹmpihttsi heäʹrvvtummsest õnnum heäʹrvvǩeʹrjjõõzz. Tuõddri Peeʹrel -Tunturien Helmet -čuäʹjtõõzz mooʹččes kaʹrttmateriaal tueʹǩǩen liâ Tanja Sanila, Tarja Sanila, Satu Moshnikoff, Mervi Karjalainen, Ville-Riiko Fofonoff da Maria Porsanger.
Nuõrttsäʹmmla liâ säʹmmlai uuʹccbõõzz, koon sâddvuõđlaž jälstemvuuʹd lij leämmaž Lääʹddjânnam da Taarr Lappi ääppal pääiʹǩin di Ruõččjânnam Kuâlõõǥǥ vuuʹd Reddviõstâr pääiʹǩin. Mâŋŋa nuuʹbb Jõnn vääin nuõrttsäʹmmlaid aazzteš Aanar kååʹddest Čeʹvetjääuʹr, Njeäʹllem da Keväjääuʹr siidid. Ânnʹjõžääiʹjest Lääʹddjânnmest jälste jeeʹres aʹrvvõõzzi mieʹldd nuʹtt 600–700 nuõrttsäʹmmliʹžžed. Tän pooddâst nuõrttsääʹmǩiõll da kulttuur liâ vaarvuâlaž.
Čuäʹjtõs lij rajjum õhttsažtuâjast Nuõrttsääʹmkulttuurfoondin. Eeʹjjest 2008 vuâdduum Nuõrttsääʹmkulttuurfondd tuärjjad da jeällad nuõrttsääʹmǩiõl da nuõrttsäʹmmlai kulttuur, što tõk seeilči pueʹtti puõlvvõõǥǥid.