Nuʹtt ââlda tõt mii kuʹǩǩen – Vuällamlaaǥǥan sääʹmkulttuuräʹrbb

Mäʹhtt sääʹm kulttuurääʹrb ruõkkât da ǩeäk tõn tuejjee? Mäʹhtt peäss tobdstõõttâd ruõkkum aunstõõzzid? A vuäitt-a ruõkkâmtuõjju vuässõõttâd jiõčč? Čõhččmannust noorõõđât mainsted jieʹlli sääʹm kulttuurääʹrb da tõn ruõkkmõõžž pirr. Šõddmõõžžâst lij vueiʹttemvuõtt tobdstõõttâd jeeʹresnallšem ruõkkâmhaʹŋǩǩõõzzid, mâʹte Sääʹm-museo Siida VISA – Virtuaalʼlaž Sääʹmm -haʹŋǩǩõʹsse da Finna.fi-ooccâmkääzzkõõzz tâʹvvsääʹmǩiõllsaž ââʹnnemõhttma. Lââʹssen lij vueiʹttemvuõtt kuullâd Oulu universiteeʹtt Giellagas-instituutt toiʹmmjummšest, Sääʹm kulttuurarkiivâst di Gieku-mättʼtõõttiaaunâsõhttõõzz ääiʹjpoddsaž aaʹššid. Sääʹm psykososiaalʼlaž tuärj juâǥǥas Uvjj – Uvjâ – Uvja, Oulu Sámit  -õhttõõzz di säʹmmlai tuõttvuõtt- da suåvâdvuõttkomissio oudsteei lie še pääiʹǩ âʹlnn. Pueʹtted tiõrvân Oulu čeäppõsmuseooʹje!

Oulu čeäppõsmuseo Satula-lõnnj, 1. riâdd
Šõddmõʹšše lij määusteʹmes sizz piâssâm da kuâsstep kaaʹfin.

Museojeäʹǩǩää reäʹšše õhttsažtuâjast Oulu kulttuurfoond Raajteʹmes sääʹmkulttuur -haʹŋǩǩõs, Oulu universiteeʹtt Giellagas-institutt, Sääʹm-museo Siida, Tâʹvv-Vuâđđmäädd museo di Oulu čeäppõsmuseo. Šõddmõš juätkk ođđeeʹjjmannust riâššum õutstõõzzlaž sääʹmjeäʹǩǩes-šõddmõõžž, kååʹtt alttii Oulu museoi, Oulu kulttuurfoond da sääʹmõutstõõzz kõskksaž vuârrmainstummuž da õhttsažtuâj.

Snimmõk: Sanna Krook/Oulu2026

Sääʹm-museo Siida lââʹssteâđ: Pia Nikula,040 621 2663, pia.nikula(at)samimuseum.fi

Oulu2026: Oulu lij Euroopp kulttuurvueiʹvvgåårad eeʹjj 2026. Kulttuurprograʹmme kooll še veiddsõs sääʹmkulttuur obbvuõtt, koon vueʹssen Oulu čeäppõsmuseo teâuddai sääʹmčeäppõõzzin da  -ǩiõtt-tuâjain tâʹlles ođđeeʹjjmannust 2026. Riikki da sääʹmvuuʹd raajid râstldeei sääʹmkulttuur kuõskki õhttsažtuâj leät alttääm eeʹjj 2023, da määŋgnallšem šõddmõõžžid riâžžât juʹn ouddâl kulttuurvueiʹvvgååradeeʹjj.

Oulu universiteeʹtt Giellagas-institutt lij Oulu universiteeʹtt juâǥǥas, mâʹst lij väʹlddkååddlaž vasttõs sääʹmǩiõl da sääʹmkulttuur mättʼtõõzzâst da tuʹtǩǩummšest Lääʹddjânnmest. Mättaunnsen lie nuõrttsääʹm-, aanarsääʹm- da tâʹvvsääʹmǩiõl di sääʹmkulttuur. Giellagas-instituuttâst toiʹmmai še Sääʹm kulttuurarkiiv, koʹst seeiltet veiddsõs kulttuur- da tuʹtǩǩeemaunstõõzz. Arkiiv kääzzkâstt sääʹmǩiõli da kulttuur mättʼtõõzz da tuʹtǩǩummuž, mõõn lââʹssen norldõõǥǥ tuärjjee sääʹmǩiõli da kulttuur jeälltummuž da ravvummuž.

Aanrest toiʹmmjeei Sääʹm-museo Siida lij väʹlddkååddlaž vasttõsmuseo, koon spesiaalsueʹrǧǧen lij sääʹmkulttuur. Väʹlddkååddlaž vasttõsmuseo tuâjjan lie jeäʹrbi mieʹldd čõõđ viikkâd väʹlddkååddlaž museotoiʹmmjummuž spesiaalsueʹrjstes; ooudâsviikkâd da oouʹdeed kulttuuräʹrbbtuâj da museoi õhttsažtuâj spesiaalsueʹrjstes; tåimmad spesiaalsueʹrjes kulttuurääʹrb väʹlddkååddlaž äʹšštobddjen di tuõʹllʼjed da oouʹdeed spesiaalsueʹrjes meeraikõskksaž õhttvuõđid. Sääʹm-museo Siida täävtõssân lij viikkâd õutstõõzzlaž tuâj sääʹmvuuʹd åålǥpeälla še. Taʹnni sääʹm-museo lij vaʹlljuum nuʹtt Eeʹjj euroopplaž museon ko še eeʹjj museon Lääʹddjânnmest.

Tâʹvv-Vuâđđmäädd museo lij Oulu vuuʹdest toiʹmmjeei kulttuurhistoriallaš museo da Tâʹvv-Vuâđđmäädd vooudlaž vasttõsmuseo. Tõn õhttvuõʹtte koʹlle še spesiaalmuseo. Museo tuâjjlažkåʹdd reâugg tän poodd kõskkpoddsaž sõõʹjin, da ođsmõttum čuäjtõõzzid ääʹveet Oulu Myllytulli gååradvuässa valmštõõvvi ođđ rajlmest eeʹjj 2026. Museo ParasRakas museo  -haʹŋǩǩõõzzâst määŋgnallšem oummu peäʹsse mieʹldd plaaneed ođđ museo toiʹmmjummuž. Museo täʹvvrid, koin lij sääʹmalggveärr, leät maacctam podd pooddi Sääʹm-museo Siidaaʹje 2024 ođđeeʹjjmannu rääʹjest.

Oulu čeäppõsmuseo prograammi õđđmest lie vooudlažvuõtt da ânnʼjõžčeäppõs. Čuäjtõsprograammi paaldâst lij jeeʹresâkksaž oummuid jurddum šõddmõšprogramm. Oulu čeäppõsmuseo tuõʹllai Oulu gåårad norldõõǥǥ di vaaldašm määŋgai uuʹccab sǩiâŋkknorldõõǥǥid. Vooudlaž vasttõsmuseon Oulu čeäppõsmuseo kääzzkâstt da vuäʹppast Tâʹvv-Vuâđđmäädd da Kainuu vuuʹdi kooʹddid da gåårdid, pääiklaž museoid, õutstõõzzid di oummuid kovvčeäppõʹsse da visuaalʼlaž kulttuurärbba õhttneei aaʹššin. Čeäppõsmuseo da Oulu2026 veʹǩǩe õhttsažtuâjast čõõđ sääʹm čuäjtõsobbvuõđ alggeeʹjj 2026.