Sääʹmvuuʹd ruõkkâmsõõʹjin 1800–1900-lååǥǥain kuåivvum pokoiniiʹǩǩid maacctet blouslõvvum maddu 7.–8.8.2022 Aanar Vuäʹmmruõkkâmsââʹjjsuâllǥa, Uccjooǥǥ Pââʹss Ulriika ceerkav ruõkkâmsâjja da Njeäʹllem ortodookslaž ruõkkâmsâjja.
Pâʹsspeeiʹv Aanrest noorõõđât kåvvsa
Pokoiniiʹǩǩi mušttlempodd älgg 7.8.2022 čiâss 15 kåvvsest Sajoozz šeelljast. Programm âânn seʹst saaǥǥid da musiikk, da tõt peštt muäʹdd čiâss. Mušttlempoodd jååʹđat sääʹmtuâj piisar Erva Niittyvuopio. Mušttlempooddâst lij tuʹlǩǩummuš aanar-, nuõrtt- da tâʹvvsääʹm- di ruõccǩiõlid. Nuʹtt čiâss 17 ääʹljeeʹl taʹrjjeet ceerkavkaaʹfid.
Nuʹtt čiâss 17 rajjuum sättjoukk serdd Vuäʹmmruõkkâmsââʹjjsuâllǥa, koʹst ruõkkât maddu toʹben eeʹjj 1934 kuåivvum sääʹmpokoiniiʹǩǩid. Seremonia seuʹrrjet da tõõzz vuässõõđât kåvvsest striimvuõlttõõzz pääiʹǩ čiâss 18 ääʹljeeʹl. Sättjoukk lij occkaž õutstõõzz tuõivvi, jååʹđtemkapasiteeʹtt da staanvuõđ di suõllu eroosiovaar diõtt.
Mušttlempoʹdde jäʹrjstet säätt Njeäʹllmest Âʹvvel pääiʹǩ. Sattu âlgg iʹlmmtõõttâd ouddǩiõʹtte 5.8. čiâss 14 mõõneeʹst Aanar seäʹbrrkååʹdd pââimõspaapp veʹrǧǧkonttra (inarin.seurakunta@evl.fi, teʹl. 040 760 4202).
Vuõssarggtueʹlespeiʹvv Máttajääuʹr reeddast
Vuõssaarǥ 8.8.2022 čiâss 10 ääʹljeeʹl Uccjooǥǥ Máttajääuʹr reeddast, Pââʹss Ulriika ceerkav ruõkkâmsââʹjest ruõkkât maddu kõõččmõõžžâst åårrai ruõkkâmsââʹjest iiʹjji 1882–83 kuåivvum sääʹmpokoiniiʹǩǩid. Ruõkkmõõžž mâŋŋa kaaʹfstõõlât papp-põõrt ǩeʹddmääʹrǩest.
Ruõkkmõʹšše jäʹrjstet säättaid Nuorggmest di Pâʹjj-Tiânnust Guoldnást da Kaamâsmååʹǩǩest Gáregasnjaarǥ pääiʹǩ. Säättaid âlgg iʹlmmtõõttâd ouddǩiõʹtte 1.8. mõõneeʹst Arja Ollikainen nõmmsaž diakoniatuâjjliʹžže (arja.ollikainen@evl.fi, teʹl. 040 844 6259).
Vuõssarggjeäʹǩǩespeiʹvv Njeäʹllmest
Vuõssarggjeäʹǩǩespeeiʹv 8.8. čiâss 15 ääʹljeeʹl sääʹmpokoiniiʹǩǩid oʹđđest ruõkkât Njeäʹllem ortodookslaž ruõkkâmsâjja Saaʹmi siidsåbbar tuõivvi meâldlânji. Pokoineeʹǩǩ, koid ruõkkât, lie kuåivvum Peäccmest Paaččjooǥǥ vuuʹdest da siʹjjid haaʹleet maaccted blouslõvvum maddu ââlda Paaččjooǥǥ. Ruõkkâmsââʹjest serddjet Njeäʹllem kruuggpõʹrtte kaaʹfstõõllâd.
Ruõkkmõʹšše jäʹrjstet Njauddmest säätt. Sattu âlgg iʹlmmtõõttâd ouddǩiõʹtte Hanna-Maaria Kiprianoʹffe 6.8. mõõneeʹst (hanna.kiprianoff@gmail.com, teʹl. 045 342 5338).
Ruõkkmõõžžid vuäitt seuʹrrjed vuõiggvuõlttõssân
Yle Sääʹmm striiʹmai mušttlempoodd di ruõkkmõõžžid Yle Areenast, da tõid vuäitt ǩiõččâd še mââiǩiõʹtte. Vuõlttõõzzi liiŋkid jueʹjjet Yle Sääʹm (http://yle.fi/sapmi) da Sääʹm-museo Siida (http://siida.fi) seiddõõzzin, da teʹl mušttlempoodd da ruõkkmõõžžid vuäitt seuʹrrjed še põõrtâst teâttmašinain.
Aanar, Vuäʹmmruõkkâmsââʹjjsuâl https://areena.yle.fi/1-63150130
Uccjokk, Pââʹss Ulriika ceerkav ruõkkâmsââʹjj https://areena.yle.fi/1-63150301
Njeäʹllem ortodookslaž ruõkkâmsââʹjj https://areena.yle.fi/1-63150311
Lââʹssteâđ:
Eija Ojanlatva, vs. museojååʹđteei, Sääʹm-museo Siida, eija.ojanlatva@samimuseum.fi, teʹl. 040 167 6145 da Erva Niittyvuopio, sääʹmtuâj piisar, Oulu aaʹrhelkååʹdd duõmmkapituul, erva.niittyvuopio@evl.fi, teʹl. 040 769 0044