Ǩiõčč-tâma puuttâm haʹŋǩǩõõzzi tiuddlaž liist lääʹddǩiõllsaž seeidin
Tâʹvvsääʹmǩiõllsaž Puuttâm haʹŋǩǩõõzzid käunnʼje tâʹvvsääʹmǩiõllsaž seeidin.
Aanrõšǩiõllsaž Puuttâm haʹŋǩǩõõzzid käunnʼje aanrõšǩiõllsaž seeidin.
Norldõõǥǥ mušttle – Sääʹmǩiõllsa aunstõspaʹǩaat Sääʹm-museo Siida Finna-siiskõõzzin
Haʹŋǩǩõõzzâst puuʹtʼtet sääʹmǩiõllsaž digitaalʼlaž aunstõspaʹǩaatid vuâđđmättʼtõõzz ââʹnnma. Paʹǩaati siiskõõzz vuâđđâʹvve Sääʹm-museo Siida Finnast õlmstâʹttem täʹvvernorldõõǥǥid da čuäjtõs-siiskõõzzid, leâša lââʹssen tõin äuʹǩǩeet jeeʹres Finna-organisaatioi sääʹmsiiskõõzzid, mâʹte snimldõõǥǥid, arkiivaunstõõzzid da ǩeerjlažvuõđ.
Aunstõspaʹǩaatid puuʹtʼtet tâʹvv-, aanar- da nuõrttsääʹmǩiõʹlle di lääʹddǩiõʹlle, da tõid õlmstââʹttet Sääʹm-museo Siida Finna-seiddõõzzâst. Täävtõssân lij ravveed sääʹm kulttuurääʹrb kuâsttjemvuõđ da vuällamvuõđ mättʼtõõzzâst di oouʹdeed maall, koon veäkka sääʹmǩiõllsaž mättmateriaalid vueiʹtet puuʹtʼted hiâlpben še pueʹttiääiʹj. Haʹŋǩǩõõzz teäggat mättʼtõs- da kulttuurministeria.
Haʹŋǩǩõsäiʹǧǧ: 1.4.2025–31.5.2026
Mäccmõš – Sääʹmtäʹvvri repatriaatiotuâjj
Haʹŋǩǩõõzzâst koordinââʹstet sääʹmtäʹvvri maacctummšid sääʹm-museooʹje. Eeʹjj 2025 ääiʹj ǩeeʹrjtet museooʹje repatriaatiostrategia, kååʹtt ohjjad proseeʹssi čõõđ viikkmõõžž, äiʹǧǧtaauli piijjmõõžž di resuursi piijjâm âânnmõõžž årra. Lââʹssen projeeʹkt raami seʹst riâžžât sääʹmõutstõʹsse šõddmõõžžid da loǥlmid, koin ǩiõttʼtõõlât repatriaatiotuâj ouddnummuž da maʹcci täʹvvrid.
Repatriaatiost leʹbe sääʹmtäʹvvri mååust mäccmõõžžâst maaiʹlm museoin lij šõddâm meeraikõskksânji kõskksaž kõõččmõš kulttuurääʹrb suõjjlummšest. Repatriaatiost saǥstõõlât nuʹtt riikki kõõsk, alggmeerai pirrsest ko še meeraikõskksaž museomaaiʹlmest. Euroopplaž museo lie šõddâm aktiivân alggmeerai täʹvvri repatriaatiotuâjast. Tät ouddnummuš kuâsttai Sääʹm-museo Siidast miârkteei repatriaatioi ooudårra mõõnnmõššân.
Repatriaatiotuâjj kaiʹbbai čiõlgg strategia, koordinâsttmõõžž, määŋgaid ougglõs- da âʹlddsaǥstõõllmõõžžid, veerǥlaž äʹššǩiiʹrji jåårǥlõõzzid, jeeʹres riikki kulttuurääʹrb laaʹjji tobddmõõžž di maatkčummuž maaccteei museo norldõõǥǥi årra di sääʹmõutstõõzz vuässâttmõõžž repatriaatioproseeʹssi jeeʹres maaʹttin. Mäccmõš-haʹŋǩǩõõzzâst vueiʹtlvââʹstet ooudpeäʹlnn peäggtum tååimai teâuddjummuž Sääʹm-museo Siidast.
Haʹŋǩǩõs peštt eeʹjj 2025 ääiʹj da tõn teäggat Jenny da Arttu Wihuri fondd.
Õhttsallaš tuʹtǩǩeemhaʹŋǩǩõs nuõrttsäʹmmlai aazztummšest Lääʹddjânnmest 1939–1949
Õhttsallaš da määŋgtiõđlaž haʹŋǩǩõs tuʹtǩǩad nuõrttsäʹmmlai seerdalääiʹj (1939-49), tääʹrǩben seerdalääiʹj rajjum kõskkpoddsaž jälstemsõõʹjid. Haʹŋǩǩõõzzâst õhtteet äʹššǩeʹrjjteâttkääivain da jiõntõsarkiivin käunnʼjeei teâđ nuõrttsäʹmmlai jieʹlli moštt-tiõttu. Tuʹtǩǩummuž tuejjeet õõutstõõzz da jeeʹres tuåimmjeeʹji kõõsk. Sääʹmǩiiʹddi raajjâmnorldõõǥǥ dokumentââʹstet da tõid raajat ođđ vuäʹpstemkõõʹlbid. Uuʹccben tobddum kõskkpoddsaž jälstempaaiʹǩi paaiʹǩid meäʹrtet da dokumentââʹstet. Haʹŋǩǩõõzz poodd riâššât äʹrbbvuõttreeis da seminaar, raajat õõlmtõõzz da peeiʹvtet Sääʹm-muʹzei Sääʹmjieʹllem-neʹttčuäjtõõzz. Puåđõõzzin prääʹzkjet påʹrǧǧmannust 2019 prääzkjum nuõrttsäʹmmlai aazztummuž 70-eeʹjjprääʹzniǩ.
Haʹŋǩǩõõzz teäggat Muʹzeikoontâr. Õhttsažtuâjast: Nuõrttsääʹmkulttuurfondd, Meäʹcchalltõs Lapin Luontopalvelut, Suomen Akatemia teäggtam The Skolt Saami Memory Bank-haʹŋǩǩõs (Giellagas-instituutt) di Suomen Akatemia teäggtam Culturally and Socially Sustainable Museum. Reframing the Policies of Representing Indigenous Sámi Culture in the Sámi Museum Siida -haʹŋǩǩõs (LaY), Yle Sápmi, Sääʹmarkiiv.
Haʹŋǩǩõsäiʹǧǧ 1.1.2018-30.9.2019
Lååʹddkällsi ålggmuʹzei –haʹŋǩǩõs
Sääʹm-muʹzei Lååʹddkällsi ålggmuʹzei -haʹŋǩǩõõzz viiǥǥât čõõđ Muʹzeikonttâr haʹŋǩǩõsteäggtõõzz veäkka. Õhttsallaš haʹŋǩǩõõzz täävtõssân lij čuäʹjtõõllâd säʹmmlaž meäccjemkulttuuʹre kuulli šeeʹllemnaaʹlid da -mõõntõõllmid da tääʹvted ođđ äʹššneǩjooukid. Ålggmuʹzeeʹjest åårrai meäccjemjuâkkaz ǩiõlid oođeet da ođđ vuäʹpstemkõõlbid raajat. Ålggmuʹzeeja vuäǯǯat še ođđ meäccjemteäddsaž vuäʹpstemouddaz. Tääʹrǩes vueʹssen Lååʹddkällsi ålggmuʹzei -haʹŋǩǩõõzzâst lij še porrmõškulttuur. Muʹzei reäšš täʹlvvmannust šiilporrmõšjeäʹǩǩesveär da Poorrâmpäiʹǩǩ Sarritist lie äʹrbbvuõttporrmõšpeeiʹv.
Haʹŋǩǩõsäiʹǧǧ lij 1.4.2018-30.3.2019.
Visit Arctic Europe II-juätkkhaʹŋǩǩõs
Maatkčemhaʹŋǩǩõs, koʹst õhttsažtuâj Lääʹddjânnam, Taarrjânnam da Ruõccjânnam tâʹvv-vuuʹdin. Väʹlddkååʹdd raaji pâʹjjel mõõnni õhttsažtuâj da mäʹtǩǩpaʹǩeeʹtt.
Haʹŋǩǩõsäiʹǧǧ 9/2018 – 3/2021.