Puoh mii nuuhâm hahhuuh kávnojeh mii suomâkielâlijn siijđoin.
Tavesämikielâliih nuuhâm hahhuuh kávnojeh mii tavesämikielâlijn siijđoin já nuorttâlâškielâliih nuuhâm hahhuuh vist nuorttâlâškielâlijn siijđoin.
Nurâlduvah muštâleh – Sämikielâliih materialpaketteh Sämimuseo Siida Finna siskáldâsâin
Haavâst pyevtittuvvojeh sämikielâliih digitaalliih materialpaketteh vuáđumáttááttâs kiävtun. Pakettij siskáldâsah vuáđuduveh tiŋgânurâlduvváid já čáitáldâhsiskáldâssáid, maid Sämimuseo Siida lii almostittâm Finnast, mutâ lasseen tain kiävttojeh eres Finna-ornijduumij sämmilâšsiskáldâsah, tego čuovâkoveh, arkkâdâhmaterial já kirjálâšvuotâ.
Materialpaketteh pyevtittuvvojeh orjâlâš-, anarâš- já nuorttâlâškielân sehe suomâkielân, já toh almostittojeh Sämimuseo Siida Finna-siijđoin. Ulmen lii nanodiđ sämmilii kulttuuräärbi oinum- já juksâmvuođâ máttátmist sehe ovdediđ maali, mon vievâst sämikielâlijd oppâmateriaalijd puáhtá pyevtittiđ älkkeebeht meid puátteevuođâst. Máttááttâs- já kulttuurministeriö ruttâd haavâ.
Hahâäigi: 1.4.2025–31.5.2026
Maccâm – Sämmilâštiiŋgâi repatriaatiopargo
Haavâst koordinistojeh sämmilâštiiŋgâi maacâtmeh sämimuseon. Ive 2025 ääigi ráhtoo museon repatriaatiostrategia, mii stivree proosees olášuttem, äigitaavlui rähtim já resursij čuosâttem. Lasseen haavâ ooleest uárnejuvvojeh sämisiärvusân tilálâšvuođah já luvâlduvah, main kieđâvuššojeh repatriaatiopargo ovdánem já tiiŋgah, moh mäccih.
Repatriaatiost ađai sämmilâštiiŋgâi pááikán maccâmist maailm museoin lii puáttám aalmugijkoskâsávt merhâšittee koččâmuš kulttuuräärbi suoijâlmist. Savâstâllâm repatriaatiost lii joođoost staatâi kooskâ, algâaalmugij juávhust já meid aalmugijkoskâsii museomaailmist. Euroopliih museoh láá aktivistum algâaalmugij tiiŋgâi repatriaatiopargoost. Taat ovdánem uáinoo Sämimuseo Siidast merhâšittei repatriaatioi ovdánmist.
Repatriaatiopargo váátá čielgâ strategia, koordinistem, maaŋgâid ráđádâlmijd káidusin já alda, virgálij äššikiirjij jurgâlmijd, sierâ enâmij kulttuuräärbi lahâtubdâmuš já mađhâšem macâtteijee museo nurâlduvâi piällás sehe sämisiärváduv uásálistittem repatriaatioprosesij sierâ muddoin. Maccâm-haavâst tahhoo máhđulâžžân ovdiibeln mainâšum tooimâi olášume Sämimuseo Siidast.
Haahâ pištá ive 2025 ääigi já tom ruttâd Jenny ja Antti Wihuri ruttârááju.
Muittut, muitalusat – the story of the Sámi by the Sámi
”Muittut, muitalusat – the story of the Sámi by the Sámi” –haavâst láá mieldi kulmâ sämimuseo; haavâ jođetteijee Sämimuseo Siida Anarist, Ruotâ tuodâr- já sämimuseo Ájtte Jokkmokkist já Maadâsämmilâšmuseo já -kulttuurkuávdáš Saemien Sijte Snåsast sehe Laapi ollâopâttâh já Luleå teknisâš ollâopâttâh. Haahâ olášuttoo 1.1.2020 – 30.09.2022, kuástádâsah láá ohtsis suullân 2M€ já haavâ ruttâd Interreg Pohjoinen.
Haavâst hämmejeh uđđâ sämmilâš museokielâ, moin sämikulttuur oovdânpuáhtoo museoin já čáitálduvâin ton jieijâs vuolgâsaajeest. Uđđâ čáitáldâhkielâ ovdeduvvoo kuulmâ piilootčuosâttuv peht, moi fáádáh láá Repatriaatio já rumbu, Sämimááccuh sehe Kielâ monâttem. Taam kulmâ fáádá ovdedeh siskáldâs peeleest já oovdânpyehtimteknisávt čapo ohtsâšpargoost haahâkuoimij já sämisiärvusij kooskâst pargopajijguin. Haavâ ulmen lii nonniđ sämmilâš identiteet.
Haavâ sämimuseoh uážžuh ohtsâš čáitáldâhkielâst adai sämmilâš museokielâst noonâ vuáđu puáttee ovdedempaargon já ohtsâšpaargon raajij paijeel. Ovdedemhaavâ pilotteh pääcih pisovávt uássin Saemien Sijte, Sämimuseo Siida já Ájtte čáitálduvâin. Museoh láá meiddei merhâšittee kollimsajeh kuávluinis, adai haavâst lii iäláttâselimân merhâšume.
Haavâ puátuseh juáhhojeh vijđáht almugijkoskâsii anon sämmilijguin, museosyergi tuáimeiguin já museokuállejeijeiguin. Ulmen lii, ete iäláttâseellim puáhtá ávhástâllâđ haavâ puátusijguin palvâlusâi já puohtui oovdedmist.
Haavâ proojeekthovdâ Sämimuseo Siidast lii FM Eeva-Kristiina Harlin,
eeva-kristiina.harlin(at)samimuseum.fi, tel. +358 (0)40 485 3017