Nurmeeʹss museo luõvti sääʹmtäʹvvrid Sääʹm-museo Siidaaʹje

Nurmeeʹss museo norldõõǥǥid kuullâm sääʹmtäʹvvrid luõvteš Sääʹm-museo Siidaaʹje piâtnâc 30.10.2026. Nuʹtt 30 ââʹnnem- da ǩiõtt-tuâjjtäʹvver obbvuõtt tiuddad Sääʹm-museo Siida norldõõǥǥid da mušttal jiijjâs vueʹzzeld mainnâz tõʹst, mäʹhtt sääʹmtäʹvvrid leät aaiʹji mieʹldd noorrâm da mäʹhtt tõk lie šõddâm museoi norldõõǥǥid pirr Lääʹddjânnam da maaiʹlm.

Lij fiinâs, što täk täʹvver puäʹtte ååʹn Siida norldõõǥǥi vueʹssen da âʹlddlab sääʹmõutstõõzzid, kooi kulttuurärbba tõk koʹlle. Leäʹp späʹssballaž Nurmeeʹss museooʹje šiõǥǥ õhttsažtuâjast da tõʹst, što leäʹp kaunnâm õõutâst täʹvvrid tõid suåppi pääiʹǩ. Täʹvvri puättmõš Siidaaʹje ij leäkku puuttâmsââʹjj, peʹce ođđ algg. Tuäivvap, što tõk vuäiʹtte eʹpet puʹhtted räämm di tõid õhttneei teâđ da tääid sääʹmõutstõõzzid da leeʹd jieʹlli sääʹmkulttuur vueʹss, ceälkk Sääʹm-museo Siida museojååʹđteei Taina Máret Pieski. 

Nurmeeʹss museo sääʹmtäʹvver kuʹlle Väinö Hämäläineeʹn (1883–1947) noorrâm veiddsõs norldõʹǩǩe, mâʹst lij leämmaž kõskksaž miârktõs Nurmeeʹss museo norldõõǥǥi nårrjummšest. Hämäläinen haʹŋǩǩii sääʹmtäʹvvrid suu norldõʹǩǩe Lappi maaʹtǩines 1930-lååǥǥast. 

Luõvtemvuâllsaž täʹvvrid koʹlle jeeʹrbi mieʹldd täk miõllǩieʹssi täʹvver: nuõʹrttsääʹm ǩiõtkâm di hiârvtum ǩeäiss Peäccmest. Obbvuõʹtte koʹlle še eeʹjj 1796 tuejjuum laukkčueʹrv di Purnumukkast norrum päʹǩǩ-koopp. 

Täʹvvrid vuäitt tobdstõõttâd Sääʹm-museo Siida Finna-kääzzkõõzzâst addrõõzzâst siida.finna.fi. Täʹvvri teâđaid da snimldõõǥǥid õlmstââʹttet kääzzkõõzzâst skamm-mannu ääiʹj. 

Nurmeeʹss museo museojååʹđteei Meri-Anna Rossandeeʹr mieʹldd museovuâđđeei Väinö Hämäläineeʹn nooreemäjšmummuž ohjjee äiʹǧǧpââʹj prääʹznkallaš juurdâsfiʹttjõõzz. Rossander åskk, što Hämäläinen rämmšeʹči sääʹmnorldõõǥǥ serddjummšest Siidaaʹje, koʹst täʹvvrid vueiʹtet tuʹtǩǩeed da puʹhtted ouʹdde tõi arvvu kuulli naaʹlin.  

Täʹvvri luõvtummuš vuâđđââvv Lääʹddjânnam museoi ruõkkâm- da norldõkõhttsažtuâjjsäimmõs TAKO koordinâʹsttem ruõkkâmtuâjj-juõkku. Tõn meâldlânji museo ohjjee norldõõǥǥeez kuulli täʹvvrid tõid ämmtallaš naaʹlin hoiddum museoid, kooi ruõkkâmvaʹstteemvoudda täʹvver koʹlle. Sääʹm-museo Siida lij sääʹmkulttuur väʹlddkååddlaž vasttõsmuseo.  

Luõvtemšõddmõõžžâst Nurmeeʹss museo oudste museojååʹđteei Meri-Anna Rossander, amanueʹnss Aleksi Eskelinen di museomäästar Marjaana Antikainen. Sääʹm-museo Siidast pääiʹǩ âʹlnn leʹjje intendeʹntt Anni Guttorm da amanueʹnss Marjo-Riitta Rantamäki. 

Lââʹssteâđ 

Sääʹm-museo Siida 

Taina Máret Pieski

Museojååʹđteei
teʹl. 050 535 1574
taina.pieski@samimuseum.fi 

Nurmeeʹss museo 

Meri-Anna Rossander 

Museojååʹđteei
teʹl. 040 104 5152
meri.rossander@nurmes.fi