Sääʹm-museo Siida da Kiasma õhttsažčuäjtõs “Oktii Áidna – Õʹhttešt Oʹdinakai – Sääʹm Čeäppõõzz Äiʹǧǧ” puätt Siidaaʹje

Sääʹm-museo Siida da Kiasma Oktii Aidna – Õʹhttešt oʹdinakai -õhttsažčuäjtõs nåårr õʹhtte sääʹm da säʹmmlaid ǩiõttʼtõõlli ânnʼjõžčeäppõõzz Sääʹmjânnmest Lääʹdd, Ruõcc da Taar peäʹlnn. Čuäjtõs ävvan Siidast 16.10.2026.

Ânnʼjõžääiʹj neellj riikk voudda vuällai Sääʹmm leʹbe Sääʹmjânnam leäi juʹn ouddâl tâʹvvjânnmallaš riikkfiʹttjõõzz leʹbe meersažjurddsi. Õʹhttešt oʹdinakai -čuäjtõs pohtt ouʹdde ânnʼjõžčeäppõõzz, mâʹst täʹrǩstõõlât Sääʹm da sääʹmvuõđ nuʹtt, što säʹmmla jiijj mušttle tõn. Čuäjtõõzzâst lie mieʹldd 17 čeäppõsneʹǩǩed. Väʹlddvueʹss tuejjõõzzin lie 2000–2020-lååǥǥain, puärrsummuz 1980-lååǥǥast. Täi eeʹǩǩlooʹjji ääiʹj sääʹmõhttsažkåʹdd lij tuärram čuõkku tâʹvvjânnmallaš lääʹjjšiõttummša da meeraikõskksaž tieʹttemvuõʹtte.

”Âânam täʹrǩǩen, što Siidast lij vueiʹtlvaž puʹhtted ouʹdde čuäjtõõzzines sääʹm ânnʼjõžčeäppõõzz pirr Sääʹm. Tõt lij še mij sääʹmõutstõõzzi kääzzkâsttmõš, što mij ânnʼjõžčeäppõõzz ij taarbâž pâi mõõnnâd ǩiõččâd kuʹǩes maaʹtǩi tuâkka vueiʹvvgåårdid”, särnn Siida museojååʹđteei Taina Máret Pieski.

”Ânnʼjõžčeäppõs taʹrjjad neävvaid täʹrǩstõõllâd mij ääiʹj da kuullâd jiõnid, kook jie pâi puäʹđ õhttsažkååddlaž saǥstõõllmõõžžâst nokk ouʹdde. Õʹhttešt oʹdinakai -čuäjtõs lij täʹst fiin ouddmiârkk. Rämmšep Kiasmast, što čuäjtõs vuäǯǯ ođđ konteeʹkst Siidast. Kiasma da Siida õhttsažtuâjj čuäʹjat, mäʹhtt museo vuäiʹtte õõutâst šõddeed ânnʼjõžčeäppõʹsse ođđ ǩeäinaid da miârktõõzzlaž kaaunõõttmõõžžid jeeʹres ǩiiččeeʹjivuiʹm.”

”Kiasma čuäjtõõzzâst vueiʹnneš juâǥǥ positiivlaž da negatiivlaž teeʹmid, ko däs Siidaaʹje puäʹđeen juurdčim aalǥ rääʹjest, što haaʹleep puʹhtted mij voudda jeäʹrben positiivlaž teeʹmid”, tuâtt čuäjtõõzz kuraattor Petra Laiti, ”Heʹlssnest čuäjtõõzz tuâjjan leäi vueʹzzi mušttled säʹmmlain ânnʼjõžčeäppõõzz kuånstivuiʹm ǩiiččeeʹjid, kook jie toobd säʹmmlaid. Siidast däs vueiʹttep prääzkjed mij õutstõõzz tuejjeeʹjid jiijjan oummuivuiʹm.”

”Mij õhttsažtuâjj Kiasmain lij leämmaž juõʹǩǩnalla samai oʹnnstam da pääʹlǩ uʹvddi. Õʹhttešt oʹdinakai -čuäjtõs leäi Heʹlssnest samai siâssum, mâʹst rämmšam čuuʹt. Tuäivam, što čuäjtõs ǩeäss Siidast seämma puârast mij õutstõõzz oummuid da pukid Siida čuäjtõõzzin kõʹllʼjeeʹjid pueʹtti tääʹlv ääiʹj”, Pieski särnn.

Oktii Áidna – Õʹhttešt Oʹdinakai – Sääʹm Čeäppõõzz Äiʹǧǧ lij vueiʹnnemnalla Siidast 16.10.2026–3.4.2027