Säämimuseo Siida já Kiasma ohtsâš čáitáldâh “Oktii Áidna – Sämmilii Taiđuu Äigi” puátá Siidan

Kiasma já Säämimuseo Siida ohtsâš čáitáldâh, Oktii áidna, čuákkee oohtân sämmilii já sämmilijd kieđâvuššee táálááštaiđuu Suomâ, Ruotâ já Taažâ peln Säämist. Čáitáldâh lekkâs Siidast 16.10.2026.

Táálááš Säämi lii neelji staatâ kuávluin. Sämieennâm lâi kuittâg lemin ovdil tave-eennâmlii staatâibárdâs tâi aalmuglâšjurduu. Oktii áidna -čáitáldâh oovdânpuáhtá táálááštaiđuu, mii läiđee tarkkuđ sämmilâšvuođâ sämmilij jieijâs muštâlusâi vuáđuld.
Čáitálduvâst láá fáárust 17 taidârid. Iänááš uási taaiđâtuojijn láá 2000–2020-lovoin. Fáárust láá meid muáddi puárásub taaiđâtyeje, moin puárásumoseh láá 1980-lovvoost. Tai iheluuvij ääigi sämmilâš siärvádâh lii äŋgiruššâm vâi piäsá uássin tave-eennâmlii lahâasâttem já šadda tobdosin almugijkoskâsávt.

“Mun anam tehálâžžân, ete Siidast lii máhđulâš oovdânpyehtiđ čáitálduvâin sämmilii táálááštaiđuu jieškote-uv kuávluin Säämist. Tot lii meid mii sämisiärvusij palvâlem, ete mii táálááštaiđuu ij taarbâš ain mađhâšiđ keččâđ kuhes maađhijd uáivikaavpugijd”, iätá Siida museohovdâ Taina Máret Pieski.

“Táálááštaaiđâ addel riäiduid tarkkuđ mii ääigi já kuullâđ jienâid, moh iä ain puáđi tuárvi oovdân ohtsâškodálâš savâstâlmist. Oktii áidna -čáitáldâh lii tast fiijnâ ovdâmerkkâ. Mij Kiasmast lep iloliih, ete čáitáldâh finnee uđđâ konteevstâ Siidast. Kiasma já Siida ohtsâšpargo čáittá maht museoh pyehtih oovtâst hammiđ táálááštaiđui uđđâ kiäinuid já merhâšittee kuáhtáámijd jieškote-uv keččeigijn.”

“Kiasma čáitálduvâst teemah lijjii juohhum positiivlijd já negatiivlijd. Mij jurdâččijm aalgâ rääjist, ete halijdep pyehtiđ mii päikkikuávlun, Siida čáitáldâhân, nomâlâssân positiivlâš teemaid”, pááhud čáitálduv kuraattor Petra Laiti. “Helsigist čáitálduv ulmen lâi uásild muštâliđ sämmilijn táálááštaiđuin tagarijd keččeid, kiäh iä tuubdâ sämmilijd. Siidast mij vist pyehtip ávudiđ mii siärvus tahheid oovtâst päikkikuávlu keččeigijn.”

“Mii ohtsâšpargo Kiasmain lii lamaš jyehináál eromâš luhostum já adelâm ennuv. Oktii áidna -čáitáldâh lâi uáli piivnoh Helsigist. Tast lam uáli ilolâš. Mun tuáivum, ete čáitáldâh juksá Siidast siämmáá pyereest mii siärvus já puoh Siida čáitáldâhkuosijd puáttee täälvi ääigi”, Pieski iätá.

Oktii Áidna – Sämmilii Taiđuu Äigi lii uáinimnáál Siidast 16.10.2026 – 3.4.2027