Sámemusea Siidda ja Kiasma oktasaščájáhus “Oktii Áidna – Sámi Dáidaga Áigi” boahtá Siidii

Sámemusea Siidda ja Kiasma oktasaščájáhus Oktii áidna čohkke ovtta sadjái sámi dáládáidaga ja sápmelaččaid gieđahalli dáládáidaga Suoma, Ruoŧa ja Norgga beale Sámis. Čájáhus rahpasa Siiddas 16.10.2026.

Sápmi, mii lea dán áigge njealji stáhta guovllus, lei leahkimin ovdal davviriikalaš stáhtaáddejumi dahje nationalismma. Oktii áidna -čájáhus ovdanbuktá dáládáidaga, mas dárkkodit Sámi ja sámevuođa nu, ahte sámit ieža muitalit. Čájáhusas leat mielde 17 dáiddára. Stuorámus oassi dáiddabihtáin leat 2000–2020-loguin, boarrásepmosat 1980-logus. Dáid jahkelogiid áigge sámi servodat lea čuollan alcces bálgá davviriikalaš láhkaásaheapmái ja riikkaidgaskasaš diđolašvuhtii.

”Mu mielas lea dehálaš, ahte Siida sáhttá ovdanbuktit čájáhusainis sámi dáládáidaga miehtá Sámi. Dalle mii bálvalit maid min sámeservošiid, amaset dárbbašit álo mannat geahččat min dáládáidaga guhkes mátkkiid duohkái oaivegávpogiidda”, dadjá Siidda museahoavda Taina Máret Pieski.

“Dáládáidda fállá bargoneavvuid dárkkodit iežamet áiggi ja gullat jienaid, mat eai álo boađe servodatlaš ságastallamis doarvái ovdan. Oktii áidna -čájáhus lea dás fiinna ovdamearka. Mii illudit Kiasmas, ahte čájáhus oažžu ođđa konteavstta Siiddas. Kiasma ja Siidda ovttasbargu čájeha, mot museat sáhttet ovttas hábmet dáládáidagii ođđa geinnodagaid ja mávssolaš deaivvademiid iešguđet geahččiiguin.”

“Kiasma čájáhusas dihttui juohku positiivvalaš ja negatiivvalaš temáide, go fas Siidii boađedettiin mii jurddašeimmet gitta álggu rájes, ahte mii háliidit buktit ruktoseamet namalassii positiivvalaš temáid”, gávnnaha čájáhusa kuráhtor Petra Laiti. “Helssegis čájáhusa bargu lei muhtin oassái muitalit sámiid birra dáládáidaga vugiiguin geahččiide, geat eai dovdda sápmelaččaid. Siiddas fas sáhttit ávvudit iežamet servoša dáiddáriid iežamet geahččiiguin.”

“Min ovttasbargu Kiasmain lea oppa lohkái leamaš hui buorre ja mávssolaš. Oktii áidna -čájáhus lei Helssegis bivnnut, mas illudan sakka. Sávan, ahte čájáhus juksá Siiddas seammá bures min iežamet servoša ja Siidda buot čájáhusguossiid boahttevaš dálvvi áigge”, Pieski lohká.

Oktii Áidna – Sámi Dáidaga Áigi lea oaidnin láhkai Siiddas 16.10.2026 – 3.4.2027