Proojeekttooimah

Mii proojeekttooimâi ulmen lii ovdediđ säämimuseo siskáldâsâid já toimâmvuovijd sehe pyevtittiđ uđđâ tiäđu Suomâ sämikulttuurij pirrâ. Jieččân projektij lasseen mij lep mield ohtâsâšprojektijn tutkâmlájádâsâiguin já mađhâšemtuáimeiguin.

Lasetiäđuh projektij pirrâ:
Museohovdâ Sari Valkonen
sari.valkonen(at)samimuseum.fi
Puh. 040 767 1052

 

Tubdâmušhammim sämmilâš museokielâ šoddâdmist Sämimuseo Siidast

Suomâ kulttuurruttârááju ruttâdem Museovisio-haavâst rähtih váldučáitáldâhân tubdâmuščáitáldâhkietâčalluu, mon olášutteh sämitaiđârij oovdânpyehtimin. Tiäđulii tobdomaailm já draamatäävgi šoddâdmáin museo pyevtittem tiätu sämikulttuurist ovdeduvvoo kuásán pyerebeht. Haahâ lohtâs Sämimuseo já luándukuávdáš Siida čáitáldâhuđâstusân. Váldučáitálduv kulttuuruási lii Sämimuseo ovdâsvástádâs.

Haahâpaje: 1.1.2020–30.9.2022

 

Muštáđ – repatriaatiost revitalisaation sämmilâš museovuáháduvâiguin

Sämimuseo Siida lii uážžum Kone Siättusist ruttâdem “Muštáđ  – repatriaatiost revitalisaation sämmilâš museovuáháduvâiguin” -haahân. Museo já Oulu ollâopâttuv Giellagas-instituut ohtsâšhaahâ totká tom, maht sämmilii siärvuslii mušto macâttem já nonnim puáhtá tábáhtuđ museovuáháduvâin. Tutkâmnáál valdii kyehti teema: sämikuálvu ulguubeln uážžumnáál, sämmilijn jo uásild vájáldum amnâstuv siärvuslâžžân porgâm já sämikuávlu jieijâs kulttuurpirrâsân tâi enâdâhân lohtâseijee muštem, mii lii almolâšvuođâst pááccám távjá uáinimettumin. Ohtsâš mušto cuvnâm tiet haavâst irâtteh hammiđ já iskâđ uđđâ museovuáháduvâid, moh tiettuu já taiđuu lasseen vuáđuduveh sämisiärvusij jieijâs tiätutááiđun. Haahâ lii uássin Siida čáitáldâhuđâstusâst.

Haahâpaje lii 1.1.2020-31.12.2022

 

Muittut, muitalusat – the story of the Sámi by the Sámi

”Muittut, muitalusat – the story of the Sámi by the Sámi” –haavâst láá mieldi kulmâ sämimuseo; haavâ jođetteijee Sämimuseo Siida Anarist, Ruotâ tuodâr- já sämimuseo Ájtte Jokkmokkist já Maadâsämmilâšmuseo já -kulttuurkuávdáš Saemien Sijte Snåsast sehe Laapi ollâopâttâh já Luleå teknisâš ollâopâttâh. Haahâ olášuttoo 1.1.2020 – 30.09.2022, kuástádâsah láá ohtsis suullân 2M€  já haavâ ruttâd Interreg Pohjoinen.

Haavâst hämmejeh uđđâ sämmilâš museokielâ, moin sämikulttuur oovdânpuáhtoo museoin já čáitálduvâin ton jieijâs vuolgâsaajeest. Uđđâ čáitáldâhkielâ ovdeduvvoo kuulmâ piilootčuosâttuv peht, moi fáádáh láá Repatriaatio já rumbu, Sämimááccuh sehe Kielâ monâttem. Taam kulmâ fáádá ovdedeh siskáldâs peeleest já oovdânpyehtimteknisávt čapo ohtsâšpargoost haahâkuoimij já sämisiärvusij kooskâst pargopajijguin. Haavâ ulmen lii nonniđ sämmilâš identiteet.

Haavâ sämimuseoh uážžuh ohtsâš čáitáldâhkielâst adai sämmilâš museokielâst noonâ vuáđu puáttee ovdedempaargon já ohtsâšpaargon raajij paijeel. Ovdedemhaavâ pilotteh pääcih pisovávt uássin Saemien Sijte, Sämimuseo Siida já Ájtte čáitálduvâin. Museoh láá meiddei merhâšittee kollimsajeh kuávluinis, adai haavâst lii iäláttâselimân merhâšume.

Haavâ puátuseh juáhhojeh vijđáht almugijkoskâsii anon sämmilijguin, museosyergi tuáimeiguin já museokuállejeijeiguin. Ulmen lii, ete iäláttâseellim puáhtá ávhástâllâđ haavâ puátusijguin palvâlusâi já puohtui oovdedmist.

Haavâ proojeekthovdâ Sämimuseo Siidast lii FM Eeva-Kristiina Harlin,
eeva-kristiina.harlin(at)samimuseum.fi, tel. +358 (0)40 485 3017