Säämimuseo vyerkkee säämi kulttuuräärbi Suomâst

Säämimuseo Siida nurâldâhpalvâlem lii kiddâ 31.7.2023 räi nurâlduvâi uđđâ haldâšemvuáhádâhân sirdâšum keežild.  Kiddâ láá skeŋkkimij vuástáväldim, nurâlduvâi luoikkâm sehe tiätu- já kovepalvâlem, kuittâg tienuuvt, ete jo soppum aašijd mij hoittáp normaallávt.

Säämimuseo aalmuglâš pargon lii vuorkkiđ säämi kulttuuräärbi Suomâst. Pargo váimusist láá mii čuágálduvah, moid kuleh tiiŋgah, čuovâkoveh, taaiđâ, olgomuseo viäsuh já arkkâdâh- sehe kietâkirjerájuamnâstuvah. Mij siäiludep, paijeentoollâp, tipšop já oovdânpyehtip jieččân čuágálduvâid sehe porgâp toid lahtojeijee tutkâmuš.

Čuágáldâhtooimâ linjee já stivree Säämimuseo čuágáldâhpoolitlâš ohjelm. Čuágálduvah stuáruh iänááš skeŋkkimijguin já dokumentistmáin aktivlávt onnáá peeivi almonijd. Mij árvuštâllâp tárkká čuágálduvâi vijđedem, ko čuágálduvah láá jo maaŋgâi oosij uáli viijđáseh.

Čuágálduvváid puáhtá uápásmiđ Siidast já internetist

Mii čuágálduvváid, moh muštâleh jieškote-uv äigipaje sämikulttuurist já -uáinuin, piäsá uápásmiđ Siida váldučáitálduvâst já mulsâšuddee čáitálduvâin.  Säämimuseo čuágálduvâi aarnijd puáhtá še tutkâđ internetist Finna-tiätupalvâlusâst já tiiŋgâi 3D-maalijdkis Sketchfab-nettisiijđoin.

Äigikyevdilis tiäđu Säämimuseo čuágáldâhtooimâin káv ná Siida nettisiijđoin sehe sosial media oolijn.

Čuágálduvah láá kevttei várás

Mii čuágáldâhpargo kuávdáš árvu lii siärvuslâšvuotâ. Pargo vuáđuduvá vuáruvaiguttâsân sehe siärvus uásálistmân museopaargon, ton vuávámân já oovdedmân. Säämimuseo čuágálduvah láá nuuvt tiätuäŋgiris aalmug ko eromâšávt toi aktivlijd kevtteid – sämisiärvus jesânijd já totkeid – várás. Mij halijdep jieččân čuágáldâhpargoost huámášiđ eromâšávt sii táárbuid já tuoivuid.

Mii čuágáldâhpargeeh västideh čuágálduvváid lahtojeijee äššigâskoččâmuššáid šleđgâpostáin já puhelimáin. Čuágálduvváid kullee tiiŋgâid puáhtá tutkâđ muuneeld soppum ääigi, já tiiŋgâin puáhtá še tiiláđ čuovâkuuvijd. Mij luoihâttep museotiiŋgâid eres museoid já kevttimčuágálduv tiiŋgâid meiddei eres tuáimeid. Mij tuáivup, ete väldivetteđ tutkâm- já luoihâttemaašijn ohtâvuođâ puorijn aigijn!