Sämimuseo Siida ” Nurâlduvah muštâleh – Sämikielâliih materialpaketteh Sämimuseo Siida Finna siskáldâsâin” -haavâst pyevtittuvvojeh sämikielâliih digitaalliih materialpaketteh vuáđumáttááttâs kiävtun. Pakettij siskáldâsah vuáđuduveh tiŋgânurâlduvváid já čáitáldâhsiskáldâssáid, maid Sämimuseo Siida lii almostittâm Finnast, mutâ lasseen tain kiävttojeh eres Finna-ornijduumij sämmilâšsiskáldâsah, tego čuovâkoveh, arkkâdâhmaterial já kirjálâšvuotâ.
Materialpaketteh pyevtittuvvojeh orjâlâš-, anarâš- já nuorttâlâškielân sehe suomâkielân, já toh almostittojeh Sämimuseo Siida Finna-siijđoin. Ulmen lii nanodiđ sämmilii kulttuuräärbi oinum- já juksâmvuođâ máttátmist sehe ovdediđ maali, mon vievâst sämikielâlijd oppâmateriaalijd puáhtá pyevtittiđ älkkeebeht meid puátteevuođâst.
Máttáátteijei táárbuh já tuoivuuh láá kuávdášlâš vuolgâsaje materialpakettij vuáváámist. Haavâ ääigi lasettuvvoo meid tiäđulâšvuotâ máhđulâšvuođâin kevttiđ Finna-palvâlus máttátmist já uárnejuvvojeh tuoivui mield sämikielâláid máttáátteijeid čuosâttum tilálâšvuođah. Máttááttâs- já kulttuurministeriö ruttâd haavâ.
Hahâäigi: 1.4.2025–31.3.2026