Sámemusea álbmotlaš bargun lea vurket sámi kulturárbbi Suomas. Barggu guovddážis leat min čoakkáldagat, maidda gullet dávvirat, čuovgagovat, dáidda, olgomusea ráhkadusat ja arkiiva- ja giehtagirjerájusmateriála. Mii seailluhat, bajásdoallat, dikšut ja ovdanbuktit min čoakkáldagaid ja dahkat daidda laktáseaddji dutkamuša.
Sámemusea čoakkáldatpolitihkalaš prográmma linnje ja stivre čoakkáldatdoaimma. Čoakkáldagaide čoggojit dávvirat eanáš skeŋkejumiid ja dálá áiggi áššiid viššalis dokumenterema bokte. Mii vihkkehallat dárkilit go háhkat čoakkáldagaide dávviriid ja materiála, dasgo čoakkáldagat leat juo viidát.
Čoakkáldagaide sáhttá oahpásmuvvat Siiddas ja interneahtas
Siidda váldočájáhusas ja molsašuddi čájáhusain sáhttá oahpásmuvvat čoakkáldagaide, mat muitalit sierra áigodagaid sámekultuvrras ja -áddejumiin. Sámemusea čoakkáldagaid sáhttá geahčadit maid Interneahtas Finna-diehtobálvalusas ja dávviriid 3D-hámiid fas Sketchfab-siidduin.
Áigeguovdilis diehtu Sámemusea čoakkáldatdoaimmain gávdno Siidda neahttasiidduin ja sosiála medias.
Čoakkáldagat leat geavaheaddjiid várás
Min čoakkáldatbarggu guovddáš árvun lea searvvušlašvuohta. Barggu vuođđun lea vuorrováikkuhus ja dat ahte searvvuš váldá oasi museabargui, dan plánemii ja ovddideapmái. Sámemusea čoakkáldagat leat olbmuid várás, eandaliige aktiivvalaš geavaheaddjiid – sámeservoša lahtuid ja dutkiid – várás. Mii háliidat čoakkáldatbarggus váldit earenomážit vuhtii sin dárbbuid ja sávaldagaid.
Min čoakkáldatbargit vástidit čoakkáldagaide laktáseaddji áššehasgažaldagaide e-boastta ja telefovnna bokte. Čoakkáldagaide gullevaš dávviriid lea vejolaš dutkat ovddalgihtii sohppojuvvon áigge ja dávviriin sáhttá maid diŋgot čuovgagovaid. Museadávvirat luikojuvvojit eará museaide ja geavahančoakkáldaga dávviriid maiddái eará doibmiide. Dutkamuš- ja luoikkahanáššiin sávvat, ahte olbmot váldet oktavuođa buriin áiggiin!