Albma olbmot – Olmâ ulmuuh

Säämimuseo Siida mulsâšuvvee čuovâkovečáitáldâh “Albma olbmot” piäjá uáinimnáál Pekka Sammallahti čapisvielgis olmooškuuvijd tave ulmuin argâpirrâsistis čiččâm ihelove ääigist, ain 1960-lovo rääjist. Kuávdáást láá Tiänu pellâst ässeeh, mutâ koveh láá meid ei. Anarist, Iänuduvâst, Suáđigilist, Käresavonist, Ruotâ Vääččirist, Varjâvuonâst já  Altavuonâst. Čáitálduv nommâ spejâlist maaŋgâi algâaalmugij vyevi nabdeđ jieijâs ulmuid olmâ olmožin. 

Pekka Sammallahti lii šoddâm tobdosin eromâšávt pargostis sämikielâiguin já -kulttuuráin. Sun lii Oulu ollâopâttuv emeritusprofessor, já ain noonâ vaikutteijee sämikielâi pyerrin. Sammallahti tobdosumoseh pargoh láá sämikielâi sänikirjeh. Sun lii meddâl Helsigist, mutâ lii aassâm pele eellimstis Ucjuv Veččâhist.  Čuovâkuvvim lii jottáám Sammallahti fáárust jo 50-lovvoost já arbâšuvá ááhust, ruávinjargâlii čuovâkovvejeijest Hildur Larssonist. Suu viljâ lii aalmugijkoskâsávt tobdos čuovâkovvejeijee Pentti Sammallahti. Kuvijnis Sammallahti lii toollâm privatčáitálduvâid Anarist (2013), Ruávinjaargâst (2015). Oulust (2015) já Hettaast (2016) sehe uásálistám ohtsâščáitálduvváid Münchenist (2011), Pariisist (2011), Helsigist (2016) já Kuopiost (2016). Toos lasseen Sammallahti lii oovdânpuáhtám kuvijdis Kuáccám Luontokuva -tábáhtusâst (2015) ja Camera Borealis -tábáhtusâst Anarist (2016). Tuojijn puoh merhâšitteemus lii oovtâst Antti Haatajain almostittum kirje “Tuulessa roihuaa maa” (Tammi 2017), mii finnij kunneemainâšume Vuoden luontokirja -kištoost ive 2017.  

Čáitálduv kuraattorin lii lamaš Marja Helander. Helander lii tubdâstum čuovâkovetaaiđâr, kote majemui iivij lii vijđedâm pargos uánihisfilmáid. Čáitálduv lii pyevtittâm Säämimuseo Siida.