Tuõddri Peeʹrel – Duoddariid Bearralat

Dán čájáhusas sáhttá oahpásmuvvat nuortalaččaid kultuvrii, dujiide ja árbevieruide. Nuortalaččaid eallinbirrasa čábbodat ja kultuvrra riggodat leahkkasit geahččiid čalmmiid ovdii fiinna čuovgagovain. Govain sáhttá oaidnit detáljaid gávttiin, čehpet duddjojuvvon dávviriid ja ealli nuortalaškultuvrra. Čájáhusas leat ovdan maiddái nuortalaččaid árbevirolaš giehtaduojit.

Nuortalačččain leat erenoamáš rikkis ja iešlágálaš duddjonvierut, main sáhttá váldit ovdamearkan veaddedujiid ja gávttiid čiŋaheamis adnojuvvon bearalhervenvuogi. Tuõddri Peeʹrel – Duoddariid Bearralat -čájáhusa fiinna govvamateriála leat háhkan Tanja Sanila, Tarja Sanila, Satu Moshnikoff, Mervi Karjalainen, Ville-Riiko Fofonoff ja Maria Porsanger.

Nuortalaččat lea uhca sámevehádat, mii lea álgoálggus ássan Suoma ja Norgga sámeguovllu nuortadavimus osiin ja Ruoššas Guoládatnjárgga oarjedavágeahčen. Nuppi máilmmisoađi maŋŋá nuortalaččat fárrehuvvojedje ássat Anára gieldda Čeavetjávrri, Njellima ja Keväjávrri giliide. Dán áigge Suomas árvalit ássat sullii 600–700 nuortalačča. Dán áigge sihke nuortalaččaid giella ja kultuvra leat áitojuvvon.

Sámemusea lea buvttadan čájáhusa ovttasráđii Nuortalaškulturvuođđudusain. 2008:s vuođđuduvvon Nuortalaškulturvuođđudus lea leamaš doarjumin ja ealáskahttimin nuortalašgiela ja nuortalaškultuvrra, vai dat seaillošedje boahttevaš buolvvaide.