Oahpásmuva nuortalaččaid kultuvrii ja historjái Nuortalaččaid Árbevierrodálus

Sámemuseas leat doaimmat maid nuortalaččaid kultuvrra guovddážis Čeavetjávrris, gos lea Nuortalaččaid Árbevierrodállu. Árbevierrodálus ja olgomuseas dan šiljus mii muitalat nuortalaččaid historjjás ja ássan- ja huksenvugiin guovtti sierra áigodagas. Árbevierrodállu lea maid dehálaš deaivvadanbáiki gili ássiide.

Geat nuortalaččat leat?

Nuortalaččat gullet nuortasápmelaččaide sihke gielaset ja árbevieruideaset beales. Nuortalaččat leat ortodoksat. Nuortalaččaid álgoálgosaš ássanbáikkit leat dálá Ruošša bealde guovllus, man Suopma manahii nuppi máilmmisoađis Sovjetlihttui. Nuppi máilmmisoađi dihte Suõʹnnʼjela nuortalaččat gárte eváhkkui ja sin fárrehedje Čeavetjávrri ja Njávdáma guovlluide jagi 1949 áigge.
Lassedieđuid nuortalaččain gávnnat Nuortalašeallin-neahttačájáhusas.

Nuortalaččaid árbevierrodállu

Suoma stáhta huksehii eváhkkui gártan nuortalaččaide dáluid. Dain geahččaledje váldit vuhtii nuortalaččaid huksenárbevieruid. Nuortalaččaid Árbevierrodállu lea ođđasishuksenáigodaga eakti nuortalašdállu oktan olgovisttiiguin. Árbevierrodálu ráhkadusaid huksehedje álgoálggus Karehâšjávrái (Kirakkajärvi), muhto dállu bázii guorusin. Guoros visttiid sirde dálá báikái 1990-logu álggus.

Árbevierrodálus lea čájáhus, mas leat dávvirat, čuovgagovat ja duojit, mat muitalit nuortalaččaid historjjás ja otná beaivvis.

Olgomuseaguovlu

Árbevierrodálu šilljui huksejedje 2007 olgomuseaguovllu, mii lea rekonstrukšuvdna Suõʹnnʼjela áigásaš geassebáikkis. Museaguovllu visttit leat huksejuvvon eanáš čálalaš gálduid, seilon govaid ja muitalusaid vuođul. Olgomuseaguovllus leat oaidnin láhkai ee. ássanvisttit, njalla, suovvasávdni ja árbevirolaš nuortalaš vettiiguin gorrojuvvon fanas.

Museagávppáš

Árbevierrodálus lea unna museagávppáš, gos sáhttá oastit báikkálaš dujiid, čiŋaid, mátkemuittuid, girjjálašvuođa ja musihka. Gávppážis vuvdet maid buktagiid, mat laktásit ortodoksalaš oskui.

Gallestallan

Árbevierrodállu lea earenoamáš buorre báiki guovlladit Davvi-Norgii jođedettiin. Čeavetjávrái beassá árgabeivviid áigge Anáris bussiin.
Nuortalaččaid Árbevierrodállu lea rabas geassit 10.6.-20.9. dmu 10-17.
Árbevierrodállui beassá nuvttá sisa ja doppe lea vejolašvuohta oažžut oahpisteami.

Olgomuseaguovllus sáhttá fitnat maid dálvit, muhto guovllu eai omd. ploge dalle.

Árbevierrodálu oktavuođadieđut:

Nuõrttsaa’mi Ä’rbbvuõttpõrtt – Nuortalaččaid Árbevierrodállu
Fitnančujuhus: Nuortalaččaid Árbevierrodállu, Sevettijärventie 9041, 99930 ČEAVETJÁVRI
Tel. 0400 373015
E-boasta: kolttaperinnetalo(at)samimuseum.fi
Boastačujuhus: Nuortalaččaid Árbevierrodállu c/o Sámemusea Siida, Inarintie 46, FI-99870 ANÁR

Lassedieđut:
Sámemusea Siida, tel. 0400 898 212, siida(at)samimuseum.fi