Sámeguovllu váinniid bázahusat hávdáduvvojit ođđasit

Sámeguovllu hávdeeatnamiin 1800–1900-loguin goivojuvvon váinnit máhcahuvvojit sivdniduvvon eatnamii 7.–8.8.2022 Anára Jaamišsuálui, Ohcejoga Bassi Ulriika girku hávdeeatnamii ja Njellima ortodoksalaš hávdeeatnamii.

Sotnabeaivve Anáris čoahkkanit lávvui

Váinniid muitodilálašvuohta álgá 7.8.2022 diibmu 15 Sajosa šilju lávus. Moatte diimmu guhkkosaš prográmmas leat sáhkavuorut ja musihkka. Dilálašvuođa láidesta sámebarggu čálli Erva Niittyvuopio. Dilálašvuohta dulkojuvvo anáraš-, nuortalaš- ja davvisámegielaide ja lassin ruoŧagillii. Diibmu 17 sulaid dilálašvuođas guossohit girkogáfe.

Diibmu 17 sulaid ráddjejuvvon mieđuštanjoavku sirdašuvvá Jaamišsuálui, gos luitojuvvojit eatnamii doppe jagi 1934 goivojuvvon sámeváinnit. Seremoniija sáhttá čuovvut ja dasa sáhttá searvat lávus stream-sáddaga bokte dmu 18 rájes. Mieđušteaddjiid joavku lea uhci servoša sávaldaga, sáhtu kapasitehta ja dorvvolašvuođa ja sullo erošuvdnaáitaga dihtii.

Dilálašvuhtii lea lágiduvvon Njellimis Avvila bokte sáhttu, masa sáhttá almmuhit iežas ovddalgihtii 5.8. dmu 14 rádjái Anára searvegotti girkohearrá virgedoaimmahahkii (inarin.seurakunta@evl.fi, p. 0407604202).

Mánnodatiđit Máttajávrri gáttis

Mánnodaga 8.8.2022 dmu 10 rájes Ohcejoga Máttajávrri gáttis, Bassi Ulriika girku hávdeeatnamis luitojuvvojit eatnamii dán hávdeeatnamis jagiid 1882–1883 goivojuvvon sámeváinnit. Dilálašvuođa maŋŋá gáfestallat páhpagárdina šilljobirrasis.

Dilálašvuhtii lea lágiduvvon Njuorggámis, Badje-Deanus Guolnnás ja Gámasmohkis Gáregasnjárgga bokte sáhttu, masa berre almmuhit iežas maŋemustá 1.8. diakoniijabargi Arja Ollikainenii (arja.ollikainen@evl.fi, p. 0408446259).

Mánnodatveaigi Njellimis

Mánnodatveaigin 8.8. diibmu 15 rájes nuortalašváinnit hávdáduvvojit ođđasit Njellima ortodoksalaš hávdeeatnamii Nuortalaččaid siidačoahkkima sávaldaga mielde. Váinnit leat dolin goivojuvvon Beahcáma Báhčaveaijoga guovllus ja sin háliidit máhcahit sivdniduvvon eatnamii lahka Báhčaveaijoga. Hávdeeatnamis sirdašuvvat Njellima searvevissui gáfestallat.

Dilálašvuhtii lea lágiduvvon Njávdámis sáhttu, masa sáhttá almmuhit iežas ovddalgihtii Hanna-Maaria Kiprianoffii 6.8. rádjái (hanna.kiprianoff@gmail.com, p. 045 342 5338).

Dilálašvuođaid sáhttá čuovvut live-sáddaga bokte

Yle Sápmi sádde dilálašvuođaid Yle Areenas, ja daid sáhttá geahččat maiddái maŋálgihtii. Sáddagiid liŋkkat juhkkojuvvojit Yle Sámi (http://yle.fi/sapmi) ja Sámemusea Siidda (http://siida.fi) siidduin, ja dilálašvuođaid sáhttá čuovvut maiddái iežas ruovttudihtoriin.

Jaamišsuálui https://areena.yle.fi/1-63150130

Ohcejoga Bassi Ulriika girku hávdeeana https://areena.yle.fi/1-63150301

Njellima ortodoksalaš hávdeeana https://areena.yle.fi/1-63150311

Lassidieđut:

Eija Ojanlatva, vs. museahoavda, Sámemusea Siida, eija.ojanlatva@samimuseum.fi, tlf. 040 1676 145 ja Erva Niittyvuopio, sámebarggu čálli, Oulu bismagotti duopmokapihttal, erva.niittyvuopio@evl.fi, p. 040 7690 044