Sámemusea Siida lea riikkaviidosaš vástumusea ja guovllulaš vástumusea kulturbirasbargguid oktavuođas sámiid ruovttuguovllus. Sámemusea doaibmabáiki lea Anáris Sámemusea ja Luondduguovddáš Siiddas. Siida lea okta Davvi-Lappi deháleamos galledanbáikkiin.
Museas leat 15 fástabargi ja sesoŋŋaáigge sullii 30 bargi. Sámemuseas leat čuovvovaš barggut: Čoakkáldatbargu, kulturbirasovttadat, čájáhus- ja dáhpáhusbuvttadeapmi ja guovlludoaibma, vuovdin- ja márkanastindoaibma, ekonomiija- ja hálddahus ja doarjjabálvalusat,.
Bargiidhoavda vástida Sámemusea Siidda bargiidhálddahusas ja -proseassain. Son vástida Sámemusea Siidda bargo- ja doaibmakultuvrra ja barggusveadjima ovddideamis.
Bargiidhoavdda bargguide gullet bargi- ja bálkástrategiija ovddideapmi, bargogovat, rekryteren, ođđa bargiid bagadeapmi, bálkkašeapmi ja bargogaskavuohtaáššit. Bargiidhoavda ovddida organisašuvdna- ja bargokultuvrra ja barggusveadjima. Son oassálastá aktiivvalaččat jođihanjoavkku bargui ja strategiijabargui.
Barggus gáibiduvvo heivvolaš bajit allaskuvladutkkus dahje eará vástideaddji skuvlejupmi ja bargovásáhus bargiidhálddahusa proseassain ja daid ovddideamis. Bargiidhoavddas vurdojuvvo vásáhus organisašuvdnakultuvrra ja barggusveadjima ovddidanvugiin ja daid heiveheamis.
Mii atnit árvvus buriid vuorrováikkuhan-, ovttasbargo- ja gulahallandáidduid. Sámegiela ja kultuvrra dovdámuš gehččojuvvo ovdun.
Bargu álgá 1.2.2023 dahje soahpamuša mielde ja dat bistá guokte jagi. Bálká mearrašuvvá Sámemusea bálkávuogádaga mielde, mii sihtat bálkásávaldaga. Barggus lea golmma mánotbaji geahččalanáigi.
Ohcamušat ja CV sáddejuvvojit maŋimustá 31.12.2022 čujuhussii: sari.valkonen(at)samimuseum.fi
Lassidieđut barggus: Sari Valkonen 040 767 1052, sari.valkonen(at)samimuseum.fi