Anára sámemusea álggahii doaimmas juo 1960-logus, dalle dat lei olgomusea. Jurdda ođđaáigásaš museadálus, mii deavddašii museadoaimma gáibádusaid, láddagođii 1980-logu álggus. Meahciráđđehus fas lei plánegoahtán luondduguovddáža Leammái. Sámemuseabargojoavku vuođđuduvvui 1987, ja dat ráhkadii vuođđudanplána Sámemusea ja luondduguovddáža oktasaš huksenfidnui. Juhani Pallasmaa sárgon Siida-dállu šattai gárvvisin 1997, ja olbmuide dat rahppui cuoŋománus 1998.
Siida-dálus leat Sámemusea ja luondduguovddáža lassin Siida Shop, restoráŋŋa Sarrit ja Anára gieldda turismarávven. Dán áigge mii leat okta Davvi-Lappi bivnnuhamos galledanbáikkiin. Jagis 2018 min gallededje 117 079 olbmo: čájáhus- ja dáhpáhusguossit, Meahciráđđehusa vánddardanrávvenbáikki ja Anára gieldda turismarávvema, Siida Shop ja restoráŋŋa Sarrida áššehasat.