Fitnut

Sámemusea Siidda searvvušlaš Ellos min árbi -fidnu čielggada, mo ruoktot máhccan sámedávvirat šaddet buoremusat oassin ealli sámekultuvrra. Fitnuin Siida nanne plánejuvvon álbmotlaš ja riikkaidgaskasaš repatriašuvnnabarggu, mas sámečoakkáldagat máhccet sámeservošii Sápmái.

Sámemusea Siidda Čoakkáldagat muitalit – fidnus buvttaduvvojit sámegielat digitála materiálapáhkat vuođđooahpahusa geavahussii. Páhkaid sisdoalut vuođđuduvvet Sámemusea Siidda Finna dávvirčoakkáldagaide ja čájáhussisdoaluide, muhto daid lassin páhkain ávkkástallojuvvojit maiddái eará Finna-organisašuvnnaid sámesisdoalut, nugo čuovgagovat, arkiivamateriálat ja girjjálašvuohta.

Sámemusea Siidda “Máhccan – sámedávviriid repatriašuvdnabargu” -fidnus koordineret sámedávviriid máhcahemiid sámemuseai. Jagi 2025 áigge museai ráhkaduvvo repatriašuvdnastrategiija, mii stivre proseassaid ollašuhttima, áigetávvala ja resurssaid čuoziheami. Dan lassin prošeavtta olis lágiduvvojit sámeservošii dilálašvuođat ja logaldallamat, main gieđahallo repatriašuvdnabarggu ovdáneapmi ja dávvirat, mat máhcahuvvojit.

Sámemusea Siidda Virtuála Sápmi (VISA)-pilohttafitnus gárgehuvvo museai 3D-skánnema doaibmamálle, mainna ávkkástallojuvvo dan maŋŋá musea kulturbiras- ja čoakkáldatovttadagaid vurken-, searvvuš- ja čájáhusbarggus.

Sámemusea Siidda nohkan fitnut