“Vuolginbeaivvi iđđedis dievddut fitnet ealus njoarosteamen herggiid ja láidestit daid goađi lusa. Jos lea njázudan ja šovlon, de vurdojuvvo gitta maŋŋiteahkedii, goas áibmu čoasku ja cuoŋu guoddigoahtá. Reagaide ja gerresiida leat juo bardojuvvon gálvvut, mat galget fárrui duottarmáilbmái. Loahpas gaikojuvvo goahti, loavdagat gissojuvvojit čoahkkái ja biddjojuvvojit rehkii, goahtebealjit ja –muorat gárrojuvvojit maŋimuš rehkii. Ovdal vuolgima vuššojuvvo vel vuolginkáffe. Ja nu ráidu dolle davás duoddarii, boazosámiid duođalaš ruovttu guvlui.” (Nils-Henrik Valkeapää, Vuovjjuš – Johttit -čájáhus, Skierri, Duottar-Sámi luondduguovddáš ja Sámemusea, Heahttá, Eanodat)

Guottet leat miessemánus, vuosttas álddut guottadit Válbora birrasiin. “Toukokuu” lea davvisámegillii miessemánnu, ja guottehis álgá ođđa boazojahki. Fámolaš giđaboahtimii gullet luonddus maiddái muohttaga suddan ja giđđadulvvit sihke bárbmolottiid máhccan.