Sámi iežas kulturbirasovttadat lea Siiddas

Kulturbiras dárkkuha huksejuvvon birrasa ja duovdaga, masa eanageavaheapmi ja huksema historjá ja vuogit leat guođđán luottaset. Sámiid geahččanguovllus maiddái árbediehtu guovlluin ja báikkiin – dego báikenamat, luođit ja iešguđetlágan muitalusat – leat oassi kulturbirrasis. Sámi kulturbirrasii gullevaš virgeoapmahašbarggut leat sirdon Musealágádusas Sámemusea kulturbirasovttadahkii, vai sámekultuvrra geahččanguovlu váldošii vuhtii bargguid barggadettiin.

”Duovdda leat sámiide dego historjágirji, mii muitala vássánáiggi dáhpáhusain. Duovdagis eallá olles searvvuš, mii eatnama alde ássit, ovddit sohkabuolvvat ja eatnanvuložat. Duovdagis leat mielde maid bassivuohta ja ipmilvuohta. Duovdagis lea ollu dakkár, man ii sáhte čilget.”
Päivi Magga, dutki

Mii bargat arkeologalaš kulturárbái ja kulturbirrasii gullevaš áššedovdi- ja virgeoapmahašbargguid

Kulturbirasovttadat vástida sámeguovllu arkeologalaš kulturárbbi ja huksejuvvon kulturbirrasa ja duovdaga áššedovdi- ja eiseváldebargguin. Dákkár barggut leat ee. lávvaplánen ja eará eanageavaheapmái laktáseaddji áššit, cealkámušat ja meahccedárkkisteamit, sámeguovllus gávdnon diŋggaid ja áiccuid vuostáváldin ja dološbázahusaid dikšun. Ovttadagas bargá okta dutki ja okta arkeologa.

Arkeologa bargguide gullet dološbázahusaid suodjalanáššit, arkeologalaš dutkamušat degomat dološbázahusaid inventeren ja roggan ja arkeologalaš kulturárbbi dovddusin dahkan. Arkeologalaš kulturárbbi galgá váldit vuhtii earret eará lávvaplánemis, meahccedikšumis ja eará eanangeavaheamis.

Dutki vástida sámeguovllus huksejuvvon kulturbirrasa áššedovdi- ja virgeoapmahašbargguin, omd. lávvaplánenbargguin. Museas lea maid lagaš ovttasbargu Lappi EJB-guovddážiin ja Musealágádusain kulturhistorjjálaččat divrras visttiid divvundoarjagiid gieđahallamis.

Oktavuođadieđut:

Cealkámušbivdagat: kirjaamo@samimuseum.fi
Arkeologa Eija Ojanlatva, eija.ojanlatva(at)samimuseum.fi, tel. 040 167 6145
Dutki Päivi Magga, paivi.magga(at)samimuseum.fi, tel. 040 180 1501