Anára kirkosiiddas lean Sámemusea ja Davvi-Sámi luondduguovddáš Siida lea stuorra nuppástusaid guovdu. Ráhkadusa viiddidanbarggut leat jođus ja giđđat 2021 álget dálá ráhkadusoasi vuođđodivvunbarggut. Viiddideami ja vuođđodivvunbargguid oktavuođas ođasmahtto maiddái Sámemusea ja luondduguovddáža oktasaš váldočájáhus.

Sámemusea, Davvi-Sámi luondduguovddáža ja Siidda restoráŋŋa badjel 20 jagi bálvalan Siida-ráhkadusa leat dál viiddideamen. Dálá váldoráhkadusa oktavuhtii huksejuvvojit Sámemuseai ođđaáigásaš čoakkáldatsajit, masa šihttet maiddái sámedávvirat, mat máhccet Suoma riikkamuseas. Restoráŋŋii huksejuvvojit áibbas ođđa ja buorebut doaimmalaš lanjat sierra ráhkadussoadjái. Viiddidanoasit gárvvásmuvvet giđđat 2021.

Dálá Siida-ráhkadusa vuođđodivvun álgá viiddidanosiid gárvvásmuvadettiin. Vuođđodivvumis earret eará viiddidat Siidda feaskára ja bargoveahka oažžu ođđa bargolanjaid. Dálá vuođđočájáhus burgojuvvo, ja sadjái huksejuvvo ođđa. Siidda ođđa vuođđočájáhus lea dáláža láhkai Sámemusea ja luondduguovddáža oktasaš, ja das ovttastuvvet kultuvra- ja luonddusisdoalut oktan ollisvuohtan.

Siidda ođđa čájáhus oažžu namman ”Enâmeh láá mii párnááh – Nämä maat ovat lapsiamme”. Namma boahtá anáraš Guovža Sámmola Máhte, Matti Morottaja, čállán divttas Enâmeh láá mii párnááh. Čájáhusa namma divttista luonddu- ja kulturfáttáid deháleamos dieđuid. Sámi árbedieđu muitu lea guoddán luonddu ja servodaga nuppástusaid badjel sohkabuolvvas nubbái. Eanadat min birrasis sisttisdoallá miljovnnaid jagiid luottaid. Makkár luonddu mii guođđit min maŋisboahttiide?

Sámemusea Siidda museahoavda Sari Valkonen muitala, ahte Siidda čájáhusa kultursisdoalus smiehttat, mo vássán áigi eallá mis – juohkehaččas eallá máŋggahámat eará áigemuttuid árbi, mainna vuogáiduvvat nuppástusaide min birrasis. Ođđa čájáhus lea Sámemusea muitalus sápmelaččain. Čájáhusbargui váldojuvvojit mielde nannosit maiddái sámeservošat.

Meahciráđđehusa álbmotmeahccehoavda Pirjo Seurujärvi muitala, ahte luondduguovddáš Siidda viŋkilis ođđa čájáhusas buktojuvvo ovdan eandalii maŋimuš jiekŋaáiggi maŋŋá lean dálkkádathistorjjá ja smiehttat mii dálkkádahkii dáhpáhuvvá boahttevuođas. Luonddufáttáid gieđahallat Davvi-Sámi suodjalanguovlluid ja dain dihtton earálágan luonddutiippaid ja ealánšlájaid bokte. Mii atnit ávvira luonddu máŋggahámatvuođas ja kulturárbbis, ja bargomet bohtosat ollet badjel sohkabuolvvaid. Ođđa čájáhus buktá fiidnát ovdan dán barggu, Seurujärvi joatká.

Ođđa čájáhusa váldoplánejeaddji lea Harri Koskinen Teollisuuden Ystävät Oy:s. Čájáhusa prošeaktaoaivámužžan doibmet Meahciráđđehusas Kirsi Ukkonen ja Sámemuseas Eeva Kyllönen. Darja Heikkilä doaibmá musea čájáhuskoordináhtorin.

Siidda váldočájáhusa kulturoasi ođasteami ruhtadit Kone Foanda, Suoma kulturruhtarádju(Museavišuvdna ja

Jenny ja Antti Wihurin ruhtarádju. Sámemuseas lea jođus čájáhusa ođasteapmái laktásan Muittut, muitalusat – the story of the Sámi by the Sámi -interregfidnu. Siidda váldočájáhusa luondduoasi ođasteapmái Meahciráđđehus oaččui ruhtadeami stáhta lassebušeahtas.

Lassedieđut:
Museahoavda Sari Valkonen, t. 040 767 1052 dahje sari.valkonen(at)samimuseum.fi
Álbmotmeahccehoavda Pirjo Seurujärvi, t. 0400 125 782 dahje pirjo.seurujarvi(at)metsa.fi
Prošeaktaoaivámuš Kirsi Ukkonen, t. 0400 479 986 dahje kirsi.ukkonen(at)metsa.fi

Siida lea Anáris, ja doppe doibmet Sámemusea ja Davvi-Sámi luondduguovddáš Siida ja Restoráŋŋa Sarrit. Sámemusea Siidda doaimmas vástida Sámemuseafoanda. Davvi-Sámi luondduguovddáš Siida gullá Meahciráđđehusa riikkaviidosaš luondduguovddášfierpmádahkii.

 Jagi 1998 rahppojuvvon Siida-ráhkadus viiddiduvvo ja vuođđodivvojuvvo. Viiddidanosiide bohtet sámemusea čoakkáldatlanjat ja restoráŋŋa. Sámemusea ja luondduguovddáža oktasaš vuođđočájáhus ođasmahttojuvvo. Bálvalat oppa ođastusa áigge. Viiddiduvvon ja vuođđodivvojuvvon Siida ja ođđa čájáhus rahppojuvvo cuoŋománus 2022.

Mii rahpat Sámemusea ja Luondduguovddáš Siidda bottoža maŋŋá vuo 1.6.2020 dmu 9.00. Seammás vuolgá johtui dálá Siidda maŋimuš doaibmajahki. Min ođadanbarggut leat dál viiddidanmuttus ja Siidda sáhttá galledit dego dábálaččat vel dán jagi gitta giđa 2021 rádjái.

Min dálus lea suohtas guovlladit, go beare mii buohkat muitit boahtit dearvvasin ja doalahit gaskka eará olbmuide. Mii leat ordnen gieđaid desinfiserenbáikkiid miehtá Siidda ja fuolahat das, ahte dállu čorgejuvvo Dearvvašvuođa- ja buresveadjinlágádusa (THL) rávvagiid mielde.

Geasse- ja čakčabajis 2020 mii leat rabas vehá eará láhkai go dábálaččat. 1.6.‒30.9.2020 mii leat rabas juohke beaivve dmu 9-17. Dállu manná gitta nappo diimmu árabut go maid ovdal leat muitalan. Golggotmánu álggu rájes mis leat dálveáiggit ja bálvalat maŋ-sot dmu 10-17.

Dalle go mii leat rabas, de beasat oahpásmuvvat min čájáhusaide ja galledit olgomusea. Siida Shop

-gávppážis sáhtát gávppašit ja luondduguovddáža áššehasbálvalanbáikkis oaččut lobiid ja rávvagiid ja doppe lea maid turismainfo. Olgomusea mii rahpat dalán go geassu ja muohta suddá.

Molsašuvvi čájáhusaid mii rahpat vehážiid mielde. Čakčamánu loahpa rádjái lea “Sámi árbbi gáhttemin” -čájáhus, mas leat ovdan konserverejuvvon dávvirat Sámemusea čoakkáldagain. Čakčamánu lohppii lea maid avvillaš luonddugovvideaddji Pertti Turunen “Deatnu” -čuovgagovvačájáhus. Mihcamáraid áigge fas rahppo Pekka Sammallahti čájáhusa ”Albma olbmot – Oikeita ihmisiä”, mas leat ovdan čáhppesvilges portreahtat.  Dát čájáhus lea oaidnin láhkai Siiddas gitta giđa 2021 rádjái.

Mii leat ráhkkaneamen doaimmahit muhtin Siida Shop -gávppáža buktagiid maid boastta bokte. Mii muitalat dán ođđa fálaldaga ovdáneamis Siida Shop Instagramas ja Siidda Facebook-siidduin.

Restoráŋŋa Sarridis sáhttá finadit gáfestallamin árgabeivviid dmu 9-16. Gaskabeaiborramuša fállat dmu 11-14 ja borramuša sáhtát oastit vai mielde. Áššehasaide oaivvilduvvon čohkkánsajiid mii leat geahpedan beliin ja veránda rahpat dalle go geassu.

Sámemusea Siidda geahču vuolde lea Nuortalaččaid árbevierrodállu Čeavetjávrris. Dállu lea rabas dán geasi 1.7.-29.8. maŋ-láv dmu 10-16. Árbevierrodállui beassá nuvttá sisa. Čájáhusat ja olgogárdi muitalit nuortalaččaid historjjás. Árbevierrodálus lea museagávppáš ja doppe gávnnat ee. báikkálaš dujiid.

Váimmolaččat bures boahtin Siidii!

 

Amma it boađe Siidii juos leat buohcci dahje dus leat dávdamearkkat.
Doalat 1-2 mehtera gaskka eará gallededdjiide ja bargiide.
Geavat giehtadesinfekšuvnna go boađát sisa Siidii.
Gieđaid sáhtát bassat áššehasaide oaivvilduvvon hivssegiin.
Gossal dahje gastte njunneliidnái dahje giehtagávvii, ná suddjet earáid. Bálkes njunneliinni geavaheami maŋŋá.
Mii čorget Dearvvašvuođa- ja buresveadjinlágádusa (THL) rávvagiid mielde.
Giito go čuovut dorvvolašvuođarávvagiid Siiddas!

Sámemusea ja Badje-Sámi luondduguovddáš Siidda divodan- ja viiddidanfidnu ovdána plána mielde. Fidnu hukseheaddjin lea Senaatti-giddodagat ja viiddidanbargguid váldohuksejeaddjin lea válljejuvvon Rakennusliike Rekonen Oy. Huksensoahpamuš vuolláičállui 11.5.2020. Huksenbarggut vulget johtui dalán.

Siida-dállu rahppui 1998 ja dat ođaduvvo dál dustet viidon doaimmaid ja lassánan gallededdjiid meari. Fidnus Siidii bohtet musea- ja luondduguovddáža lanjat ja sajit, mat teknihkalaččat ja doaimmaid geahččanguovllus vástidit dálá áiggi gáibádusaid. Viiddiduvvon oasit leat sullii 1400 m2, ja Siida viidu fitnus beliin dálážis.

Siidda divodan- ja viiddidanbarggut dahkkojit guovtti oasis. Dál huksenfálaldagat ledje bivdon vuosttas oassái, mas Sámemuseai huksejit ođđa čoakkáldatlanjaid ja restoráŋŋaoasi.  Čoakkáldatovttadaga viiddideame maŋŋá Sámemusea bastá doaibmat riikkaviidosaš vástumusean. Sámemusea oažžu Álbmotmuseas sámečoakkáldaga (badjel 2000 dávvira) dan maŋŋá go fidnu lea gárvvis. Dát čoakkáldaga máhcaheapmi lea maid riikkaidgaskasaččat mearkkašahtti dasgo dat sisttisdoallá nu ollu dávviriid. Siida bálvala viiddidanbargguid áigge áššehasaid dábálaččat.

Huksenbargguid nubbi muddu álgá geassemánus 2021 ja dalle ođadit Siidda bargolanjaid ja dahket huksen-, liggen-, čáhcebohcce-, áimmumolsun- ja elrávdnjeteknihkalaš divodan- ja ođadanbargguid. Earenoamážit giddejuvvo fuopmášupmi čuovggaide, akustihkka- ja dorvvolašvuođačovdosiidda, energiijabeaktilvuhtii ja sihkkarasto, ahte siste lea buorre bargodilli.

Sámemusea, luondduguovddáš ja restoráŋŋa bálvalit áššehasaid olles áigge. Doaimmat sirdojit divodanbargguid boddii dálu ođđa osiide.  Siida ja dan ođđa sajit, lanjat ja vuođđočájáhusat rahppojit 1.4.2022.

Siidda viiddidanfidnu váldo- ja arkiteaktaplánemis vástida Arkkitehdit Soini & Horto Oy Helssegis. Hukseheaddjin lea Senaatti-giddodagat. Liggen-, čáhcebohcce-, áimmumolsunteknihkalaš bargguid bargá fitnodat LVI-Vanhatalo Oy ja elrávdnjebargguin fas vástida fitnodat Keskus-Veljet Oy.

Senaatti-giddodagaid stivrra mearridii investeremis juovlamánus 2019. Sámemuseavuođđudus lea Siidda váldoláigolaš, mii fas láigoha lanjaid ja sajiid viidásabbot Meahciráđđehusa Badje-Sámi Luondduguovddážii ja Restoráŋŋa Sarridii.

Lassedieđut:
Senaatti-giddodagat: huksehanhoavda Miikka Teppo, miikka.teppo@senaatti.fi tel. 040 180 0929

  

Senaatti-giddodagat lea Suoma stáhtahálddahusa bargobirasovttasbargi ja doabmalanjaid- ja sajiid áššedovdi. Mii leat ođđa bargovugiid ja -birrasiid ofelaččat. Min ovtta sadjái čohkkejuvvon čovdosat veahkehit áššehasaid beavttálmahttit iežaset doaimmaid ja seastit doaibmalatnjagoluin. Senaatti máŋggasuorggi ámmátolbmot fuolahit stáhta giddodatopmodagas ja dan beaktilis geavaheamis. Senaatti vástun lea maid daid giddodagaid vuovdin ja ovddideapmi, mat leat eai leat šat stáhta geavahusas. Vásttolašvuohta lea guovddáš oassin Senaatti buot doaimmain. www.senaatti.fi Mii láhčit saji lihkotuvvamii.

Beaiváduvvon 18.2.2021: (2600 dávvira) –> (badjel 2000 dávvira)

Interreg Pohjoinen -prográmma Sámi hálddašankomišuvdna lea juolludan doarjaga ”Muittut, muitalusat – the story of the Sámi by the Sámi” -fidnui. Fitnus leat mielde golbma sámemusea; Sámemusea Siida Anáris fitnu jođiheaddjin, Ruoŧa duottar- ja sámemusea Ájtte Johkamohkkis, Máttásámimusea ja  -kulturguovddáš Sáemien Sijte Snåsas ja Lappi universitehta ja Luvlaja teknihkalaš allaskuvla. Fitnu ollašuhttináigi lea 1.1.2020 – 30.09.2022 ja árvvoštallon golut buohkanassii sullii 2 M€.

Museat, mat leat fitnus mielde, lea guovddáš doaibmit sámekultuvrra ovdabuktimis ja čájáhusgálvun bidjamis. Fidnus ráhkadit ođđa sámi museagiela, mainna sámekultuvra ovdabukto museain ja čájáhusain dan iežas vuolggasajis. Fitnu ulbmilin lea nannet sámi identitehta. Museat leat maid mearkkašahtti galledanbáikkit iežaset guovlluin ja fitnus lea fitnodateallima geahččanguovllus mearkkašupmi olles davvi guovllus. Ulbmilin lea, ahte fitnodateallin sáhttá atnit ávkin fitnu bohtosiid go ovddida bálvalusaid ja buktagiid.

Fitnus ráhkadit ođđa sámi museagiela golmma pilohtafitnu bokte. Daid fáttát leat Rumbu, Gákti ja Giela massin. Dáid fáttáid ovddidit sihke sisdoalu ja čájáhusteknihkálaččat ovttasbarggus fitnu ovttasbargoguimmiiguin ja bargobájiin sámeservošiin. Ovddidanfitnu pilohtat báhcet bissovaš oassin Sáemien Sijte, Sámemusea Siidda ja Ájtte čájáhusaid.

Fitnu sámemuseat ožžot ođđa sámi museagielas nana vuođu boahttevaš ovddidanbargui ja ovttasbargui riikkarájáid rastá. Dás čuovvu dat, ahte sámekultuvra ja árbevierru leat nannosabbot go ovdal. Fitnu bohtosat juhkkojit viidát rikkaidgaskasaš atnui sámiiguin, museasuorggi doibmiiguin ja museagalledeaddjiiguin.

”Muittut, muitalusat – the story of the Sámi by the Sámi” -fitnu prošeaktahoavdan Sámemusea Siiddas lea álggahan guovvamánu loahpas FM Eeva-Kristiina Harlin

Lassedieđut fitnus:
Sámemusea Siida: Sari Valkonen, Museahoavda tel. +358 40 767 1052, sari.valkonen@samimuseum.fi
Ájtte: Elisabeth Pirak Kuoljok, Museahoavda tel. +46 97117007, elisabeth.pirak-kuoljok@ajtte.com
Sáemien Sijte: Birgitta Fossum, Museahoavda tel. +47 940 17 020, birgitta.fossum@saemiensijte.no

Govva: Dohká gietkka 1920-logus. Ahola čoakkáldat/Sámemusea Siida

 
 

 

Sámemusea ja Luondduguovddáš Siida lea gitta 31.5.2020 rádjai koronavirusepidemiija leavvama goahcama ja riskajoavkkuid suodjaleami dihte. Maiddái restoráŋŋa Sarrit lea gitta  31.5.2020 rádjai.

Mii doaibmat Stáhtaráđi rávvagiid mielde. Mii čuovvut mo dilli ovdána ja dárbbu mielde Siida lea gitta guhkit áigge go bajábealde lea almmuhuvvon.

Áigeguovdilis diehtu dilis gávdno min neahttasiidduin www.siida.fi ja min Facebook-siiddus ja Instagramis.

Sámemusea Siidda bargit barget gáiddusin ja vástidit diđoštallamiidda e-boastta ja telefovnna bokte.Min oktavuođadieđut gávdnojit min neahttasiidduin www.siida.fi/davvisami/samemusea/samemusea-oktavuodadiedut/.

Luondduguovddáš Siidda rávve telefovnna ja e-boastta bokte. Maid Anára gieldda turismarávven rávve telefovnna ja e-boastta bokte. Áššehasat sáhttet váldit oktavuođa Luondduguovddáža dábálaš nummiriidda ja e-bostii, mat gávdnojit min neahttasiidduin www.siida.fi/davvisami/luondduguovddas/luondduguovddas-oktavuodadiedut/. Amma fuobmát bálvalusaid spiehkastatáiggiid (www.siida.fi/davvisami/luondduguovddas/luondduguovddas-siidda-assehasbalvaleapmi/).

Lassedieđut:
Museahoavda Sari Valkonen, sari.valkonen@samimuseum.fi, 040-767 1051
Álbmotmeahcihoavda Pirjo Seurujärvi, pirjo.seurujarvi@metsa.fi, 0400-125 782

Beaiváduvvon 31.3.2020: 13.4.2020 rádjai –> 13.5.2020 rádjai 
Beaiváduvvon 31.3.2020: Maiddái restoráŋŋa Sarrit lea gitta. –> Maiddái restoráŋŋa Sarrit lea gitta doaisttážii aŋkke 31.5.2020 rádjai.
Beaiváduvvon 5.5.2020: doaisttážii aŋkke 13.5.2020 rádjai –> 31.5.2020 rádjai
Beaiváduvvon 5.5.2020: doaisttážii aŋkke 31.5.2020 rádjai. –> 31.5.2020 rádjai.

Jagis 2019 Sámemusea ja Badje-Sámi luondduguovddáš Siidda gallededje 63 935 čájáhus- ja dáhpáhusguossi. Dat lea olahus. Vuosttas háve Siidda historjjás čájáhusaid gallededje badjel 63 000 olbmo. Mii dáppe Siiddas illudatge viiddideamis, divodanbargguin ja čájáhusaid ođasmahttimis, mat leat boahtimin. Ná mii sáhttit ain buorebut bálvalit min áššehasaid, mat orrot leamen jagis jahkái eanet ah eanet.

Siidda bálvalusaid geavahedje diibmá viššalit. Jagi 2019 áigge ledje buohkanassii 121 000 galledeami, mii lea nubbin stuorimus mearri Siidda historjjás. Siidda čájáhus- ja dáhpáhusgalledeaddjiid lassin lohkui leat rehkenaston Meahciráđđehusa bálvalanbáikki, turismarávvema ja restoráŋŋa Sarrida áššehasat.

Siidda galledeaddjiin badjel bealli, nappo 64 000, fitne geahččamin čájáhusaid dahje dáhpáhusaid. Dát lea Siidda 21 jagi historjjá stuorámus čájáhusgalledeaddjiid mearri. Mearri lea lassánan ovddit jagis olles 8%.

Árbevirolaččat olbmot galledit Siidda geassit eanet go dálvit. Siidda galledeaddjiid meari lassáneapmi oidno eandaliige dálvit. Jagi 2019 áigge eandaliige juovlamánus galledeadjiid mearri stuorui juobe 25% ovddit jagi ektui. Ođđajaggimánus galledeaddjiid mearri stuorui ovddit jagi ektui 16 %.

Siidda 2019 galledeaddjiin ledje 39% Suomas ja olgoriikkain 61%. Olgoriikalaččaid goralaš oassi olles galledeaddjiid mearis lea lassánan jagis jahkái. Ovdamearkka dihte jagis 2014 olgoriikalaš galledeaddjit ledje 55%. Maiddái ruovtturiikka galledeaddjiid mearri Siiddas lea lassánan 4,7% ovddit jagis.

Siida lea riikkaidgaskasaš deaivvadanbaiki. Siidda galledeaddjjit bohte jagi 2019 oktiibuot 87 iešguđet riikkas. Olgoriikalaččain eanemus ledje duiskalaččat (8,4% buot galledeaddjiin) ja nubbin eanemus fránskalaččat (7,7%). Duiskalaččat ja fránskalaččat leat leamaš juo guhkit áiggi allin Siidda galledeaddjiid statihkkalisttuin. Eará riikkat ledje Kiinná ja Hong Kong (4,7%), Itália (4,6%), Amerihkká (4,5 %) ja Hollánda (4%).

Turismma ođđa biekkat bosodit maid Siiddas. Joavkomátkkiid sajis leat eanet ovttaskas mátkeplánat. Diibmá Siiddas vuvde eanemus sisabeassanbileahtaid ovttas olgoriikalaš ollesolbmuide ja nubbin eanemus daidda olgoriikalaš ollesolbmuide, geat mátkkoštedje joavkku mielde.

Suomas Museakoarta lea bivnnut ja dat lea buktán maid Siidii eanet ja eanet galledeaddjiid. Jagi 2019 áigge Siidda gallededje Museakoarttain 2 707 olbmo, lohku lea 38% stuorát ovddit jagi ektui.

Vuođđočájáhusain, mat muitalit sámekultuvrras ja davvi guovllu luonddus, lea ollu diehtu mii geasuha galledeaddjiid. Jagi 2019 molsašuvvi čájáhusaid bivnnuhamos čájáhusat ledje Toovláš já tááláš anarâš kietâtyeji ja Nuppástuvvi dálvi. Lassin Siidda olles galledeaddjiid mearri lea stuoris viiddis bálvalanfálaldagaid dihte, go seamma dáhki vuolde oažžu dieđu, muosáhusaid, rávvagiid, skeaŋkkažiid ja restoráŋŋabálvalusaid.

Lassin Sámemusea Siidda guovlludoaibmabáikkis Nuortalaččaid Árbevierrodálus Čeavetjávrris regisserejedje 2 585 galledeaddji.  Nuortalaččaid Árbevierrodállu lea rabas geasse-čakčamánus ja ovddit jagi ektui dan gallededje 400 olbmo eanet. Stuorámus oassi galledeaddjiin ledje Suomas (82%). Olbmot galledit Árbevierrodálu viššalamosit suoidne- ja čakčamánus.

Siidda viiddidan- ja ovddidanfidnu álgá albma láhkai giđđat 2020. Viiddidanfidnu ollašuhttojuvvo osiid mielde. Vuosttas oasis 1.5.2020 rájes huksejit čoakkáldatovttadaga ja restoráŋŋaoasi. Go dat leat gárvásat de Siida-dállu manná gitta cuoŋománu 2021 rájes olles jahkái. Dan botta dálu divodit. Sámemusea ja luondduguovddáš ja restoráŋŋa bálvalit áššehasaid olles áigge gaskaboddosaččat ođđa huksejuvvon osiid bealde. Siidda huksenbargguid áigge čájáhusbáikin lea legendáralaš olgomusea. Siida lanjat ja vuođđočájáhusat rahppojit 1.4.2022.

Lassedieđut:
Vuovdin ja márkanfievrrideapmi Minna Väisänen, 040 581 64 34, minna.vaisanen(at)samimuseum.fi
Siida ođasmuvvá: Museahoavda Sari Valkonen, 040-767 1051, sari.valkonen(at)samimuseum.fi

Sámemusea ja Davvi-Sámi luondduguovddáš Siida divoduvvo ja viiddiduvvo jagiid 2020-2022 áigge. Senaatti-giddodagaid stivra lea dahkan fidnu investerenmearrádusa 18.12.2019. Senaatti giddodagat oamasta Siida-dálu. Sámemuseavuođđudus lea Siida-dálu váldoláigolaš ja láigoha sajiid ja lanjaid fas viidásabbot Luondduguovddážii ja Restoráŋŋa Sarrihii.

Siida-dállu rahppui 1998 ja dál dan ođadit go doaimmat lea lassánan ja viidon ja eanet eanet olbmot galledit Siidda. Fidnus Siidii bohtet musea- ja luondduguovddáža lanjat ja sajit, mat tehnikalaččat ja doaimmaid geahččanguovllus vástidit dálá áiggi gaibádusaid. Fidnu viidodat lea sullii 3000 m2 ja Siida viidu sullii beliin dálážis. Fidnu oktan deháleamos oassin leat ođđa čoakkáldatlanjat, mat huksejuvvojit Sámemuseai. Čoakkáldatovttadaga viiddideame maŋŋá Sámemusea bastá ođđa sajiiguin ja lanjaiguin doaibmat riikkaviidosaš vástumusean. Sámemusea oažžu Álbmotmuseas sámečoakkáldaga (badjel 2000 dávvira) dan maŋŋá go fidnu lea gárvvis. Dát čoakkáldaga máhcaheapmi nappo repatriašuvdna lea riikkaisgaskasaš dási geahččanguovllus mearkkašahtti.

Siidda viiddideapmi dahkko muttuid mielde. Vuosttas muttus 1.5.2020 rájes álget čoakkáldatovttadaga ja restoráŋŋaoasi huksenbarggut. Go dat leat gárvásat de Siida-dállu lea cuoŋománu 2021 rájes gitta olles jagi divodanbargguid dihte. Sámemusea ja luondduguovddáš ja restoráŋŋa bálvalit áššehasaid olles áigge go doaimmat leat gaskabottosaččat dálu ođđa osiid bealde. Siidda divodeame áigge čájáhusbáikin lea legendáralaš olgomusea. Siida ja Siidda ođđa sajit, lanjat ja vuođđočájáhusat rahppojit 1.4.2022.

Siidda viiddidanfidnu váldo- ja arkiteaktaplánemis vástida Arkkitehdit Soini & Horto Oy Helssegis. Senaatti huksehanhoavdan lea Miikka Teppo.

Siidda vuođđočájáhusat ođasmahttojit seamma áigetávvalis oktan viiddidanfidnuin. Čájáhusarkiteaktan lea Teollisuuden Ystävät Oy/Harri Koskinen.

Sámemusea ja luondduguovddáš Siiddas illudit viiddidanprošeavttas, mii dahká vejolažžan dan ahte doaimmat ođasmuvvet ja viidot. Seamma dáhki vuolde leat dás duohkoge Siidda máŋggabealat bálvalut ja doaimmat.

Siidda fidnus ordnejuvvo buohkaide rabas diehtojuohkindilálašvuohta 9.1.2020 dmu 17.00 Sámemusea ja luondduguovddáš Siiddas.

Lassedieđut:
Sámemusea Siida: Museahoavda Sari Valkonen, sari.valkonen@samimuseum.fi, 040-767 1051
Senaatti-giddodagat: Doaibmasuorgehoavda Tuomas Pusa, tuomas.pusa@senaatti.fi, +358 (0)50 390 2143

Huksengovvosat mediageavahussii: https://www.flickr.com/gp/siidainari/921165

 

Beaiváduvvon 18.2.2021: (2600 dávvira) –> (badjel 2000 dávvira)

Sámemusea ja Badje-Sámi luondduguovddáš Siidda vuođđočájáhusat ođasmahttojuvvojit. Sámemuseavuođđudus lea ožžon Suoma kulturruhtarájus 400 000 euro Museovisio- veahkkeruđa čájáhusaid kulturosiid ođasmahttimii. Sámemusea ođasmahttinfitnus sámedáiddárat ráhkadit vuođđočájáhusaide ja olgomuseai atmofearačájáhusgiehtačállosa iežaset dulkojumiid vuođul. Diđolaš atmosfeara ja dráma juona ovdáneami vugiiguin diehtu, man musea buvttada sámekultuvrras, gávdná buorebut galledeaddji.

Sámemusea ja luondduguovddáš Siidda oktasaš vuođđočájáhusa ođasmahttima olles bušeahtta lea sullii 2,5 miljovnna euro. Sámemusea lea ožžon čájáhusaid kulturoassái veahkkeruđa Suoma Kulturruhtarájus, Kone foanddas ja Wihuri foanddas oktiibuot 750 000 euro. Musea oassi čájáhusbušeahtas lea bealli. Luondduguovddáš lea ožžon iežas oassái veahkkeruđa Birasministeriijas. Fidnu laktása Siidda viiddidan- ja divodanfidnui. Fidnu ollašuhttojuvvo jagiin 2020-2022.

Sámemusea Siida illuda Suoma Kulturruhtaráju Museovisio-veahkkeruđas

Lassidieđut: Museahoavda Sari Valkonen, sari.valkonen@samimuseum.fi, puh. 040-767 1052

https://skr.fi/ajankohtaista/miljoonien-tuki-suomalaisten-museoiden-uudistumiseen

Sámemusea ja Dávvi-Sámi luondduguovddáš Siidda oktasaš vuođđočájáhusat ođasmahttojuvvojit. Sámemusea lea ožžon Kone foanddas 300 000 euro veahkkeruđa Siidda vuođđočájáhusaid kulturoasi ođasmahttinfidnui.

https://koneensaatio.fi/koneen-saatio-myonsi-yli-30-miljoonaa-taiteen-ja-tieteen-tekemiseen/

https://koneensaatio.fi/en/kone-foundation-awarded-more-than-eur-30-million-for-art-and-research/