Duodječájáhus rahpá Sámemusea Siidda čájáhusjagi 2019

Sámemusea Siidda jagi 2019 vuosttaš čájáhus lea duodječájáhus “Eatnama fámolaš jienat”. Čájáhus duojár Jouni S. Laiti dujiin lea geahčastat sámi duoji otnábeaivái. Čájáhus addá galledeaddjái vejolašvuođa beassat oaidnit dálá sámi duoji, sihke árbevirolaš hámis ja ođđaáigásaš dáiddaduodjin.

Dujiiguin Jouni S. Laiti muitala sámi čábbodatipmárdusas ja materiálageavaheamis otná diliin. Daid lassin Laiti duojit maid buktet ságastallamii duoji eallinvuoimmi otná máilmmis ja speadjalastet mii Sámis ja máilmmis sámiid birra dáhpáhuvvá. Muhtin dujiiguin Laiti váldá dihtomielalaččat oasi dálá servodatságastallamii. Duodji ii leat sámiide dušše vuohki buvttadit ávdnasis diŋggaid, muhto dat lea okta sámiid siskkáldas gulahallangaskaomiin, giella man ipmirdit dat, geat leat dán oahppan dulkot. Laiti vuohki searvat servodatságastallamii dujiid ja duddjoma bokte lea okta ovdamearkka sámi jaskes servodatságastallamis.

Duojár ja duodjeoahpaheaddji Jouni S. Laiti lea eret Ohcejoga siste. Son lea guhká oahpahan garraduoji Sámi oahpahusguovddážis Anáris ja lea barggustis leamaš beroštuvvan earenoamážit duodjeoahpaheami gárgemis ja duodjegiela seailluheamis. Son lea maid áŋgiruššan ovddidit duoji ealáhussan, movt duojár sáhtášii ealihit iežaset duddjomiin ja movt duoji ja duddjoma galggašii márkanfievrridit vejolaš osttiide.

Aiddobáliid Laiti lea gárveme duoji master dutkosa Sámi Allaskuvllas Guovdageainnus ja dát čájáhus lea oassi Laiti duodjemaster barggus. Laiti MA-loahppabarggu ja čájáhusa bagadallit leaba duodjeáššedovdit Tuula-Maija Magga-Hetta ja Sigga-Marja Magga.Okta čájáhusa mihttomeriin lea gulahallat gehččiiguin ja oažžut sis máhcahaga dovdduin ja vásáhusain maid dujiid oaidnin sis bohciidahttá. Danin čájáhusas Sámemusea Siiddas lea gažadeapmi mii lea čujuhuvvon čájáhusa gallededdjiide.  Gažadeami vehkiin čohkkejuvvon dieđut šaddet oassin Laiti čálalaš loahppabarggu váldogáldomateriála. Mii ávžžuhit buohkaid váldit áiggi ja vástidit moatti jearaldahkii čájáhussii oahpásnuvvama oktavuođas ja ovddidit duoji dutkamuša alimus oahppadásis.

Eatnama fámolaš jienat -čájáhusa buvttada Sámemusea Siida ja dasa beassá oahpásnuvvat 8.1.– 17.3.2019. Dálveáigge Siida lea rabas disdagas sotnabeaivái diibmu 10–17, mánnodagaid Siida lea gitta. Bures boahtin guldalit dujiid bokte eatnama fámolaš jienaid!

Lassedieđut:

amanueansa Áile Aikio, aile.aikio@samimuseum.fi

duojár Jouni S. Laiti, jouni.laiti@gmail.com
Sámi musea, Siida, Inarintie 46, FI-99870 Anár, tel. +358 (0)400 898 212, siida@samimuseum.fi, www.siida.fi

Govva: Máhtte Sikku Valio