Duojár Biret-Ánne Lehtola duodječoakkáldat Sámemusea Siidii

Duojár Biret-Ánne Lehtola, Niillasaš Biret Biret-Ánne (1931 – 1996) duodječoakkáldat skeŋkejuvvo Sámemusea Siidii Sámi álbmotbeaivve 6.2.2019. Iđđedis diibmu 9.15 loktet leavgga stággui Siidda šiljus ja dan maŋŋá auditorias álgá skeŋkendilálašvuohta diibmu 9.30, mas beassat oaidnit Biret-Ánne Lehtola fiinna duodječoakkáldaga ja Lehtola nieida Irma Lehtola muittaša eadnis duojárin.duodječoakkáldaga ja Lehtola nieida Irma Lehtola muittaša eadnis duojárin.

Biret-Ánne Lehtola duojit
Biret-Ánne Lehtola (i.g. Pieski) fárrii Gáregasnjárggas Anárii 1940 – 50-loguid molsumis ja bargagođii teavstta dárkkisteaddjin Sábmelaš-aviissa prentehusas. Seamma báikkis barggai maid anárlaš Teuvo Lehtola ja soai náitaleigga jagis 1952 ja oaččuiga njealje máná. Mánnábearraša árgga divššodettiin Biret-Ánne duddjui, son ovdamearkka dihte gođii fáhcaid ja čuolmmadii fiinna liinniid. Son lei maid mielde Sábmelaš Duoddjárat searvvi doaimmain dan vuođđudeami 1975 rájes ja lei searvvi ságádoalli jagiin 1990 – 1994.

Biret-Ánne Lehtola árbbolaččat vurkejedje eadnis duodječoakkáldaga Siidii jagis 2009 ja dál skeŋkejumi mielde čoakkáldat sirdása oassin Sámemusea čoakkáldagaid. Čoakkáldat sisttisdoallá 83 dávvira ja das leat earret eará liinnit, fáhcat, gahpirat, guvssit ja niibbit. Sámemusea Siidda čoakkáldagaid geahččanguovllus Biret-Ánne Lehtola dujiin erenomáš leage čeahpit ráhkaduvvon báhkke- ja dákteduojit, daningo čoakkáldagain eai jur leat nissoniid ráhkadan garraduojit.

Lassedieđut: amanuensa Anni Guttorm, tel. 0400 891 860, anni.guttorm@samimuseum.fi
Sámi musea, Siida, Inarintie 46, FI-99870 Anár, tel. +358 (0)400 898 212, siida@samimuseum.fi, www.siida.fi