Sámi álbmotbeaivi 6.2.2019

Sámemusea ja Badje-Sámi luondduguovddáš Siida ja Restoráŋŋa Sarrit ávvudit sámi álbmotbeaivvi 6.2.2019 ja leat mielde Anára girkosiiddas ávvubeaiprográmmas. Iđđes dmu 9 geassit sámeleavgga Siidda leavgastággui ja dmu 9.30 auditorias álgá skeŋkendilálašvuohta. Fiinna Guovssahasat-dvd čájáhusaid sáhttá geahččat auditorias dmu 12 ja dmu 15. Siiddas leat rabas uvssat olles beaivvi ja mii bálvalat olbmuid dmu 9.15-17. Restoráŋŋa Sarrihis lea ávvubeaivvi gudnin gáffe ja sarritvuostágáhkku, haddi lea 6 euro.

Duojár Biret-Ánne Lehtola (1931-1996) duodječoakkáldat skeŋkejuvvo Sámemusea Siidii sámi álbmotbeaivve 6.2.2019. Sámeleavgga leavgastággui geassima maŋŋá auditorias álgá dmu 9.30 skeŋkendilálašvuohta, mas beassá oaidnit Biret-Ánne earenomáš fiinna duodječoakkáldaga ja su nieida Irma Lehtola muittaša eatnis ja dan makkár son lei duojárin

Siidda čájáhusain lea ollu maid oaidnit ja geahčadit. Láidehus- ja váldočájáhusa lassin leat álgojagis 2019 beanta vihtta molsašuvvi čájáhusa. Johan Nuorgam – Sámi gaskkusteaddji muitala namas mielde sámemusea vuođđudeaddji Johan Nuorgam birra. Birasdáiddačájáhus Viidon Sieiddit gieđahallá sámiid ođđa luonddugaskavuođa. Lahka – So close fas muitala báikkálaš kamerasearvvi miellahtuid luonddugovain. Sámemusea iežas čoakkáldagain lea čohkkejuvvon Sámefáhcat-čájáhus, mii muitala nuortalašfáhcain. Báikkálaš duojára Jouni S. Laiti čájáhus Eatnama fámolaš jienat váldá beali ja guoskkaha ja das leat máŋggat geahččanguovllut.

Bures boahtin! Tiervâpuáttim! Puä´đ tiõrvân!
Sámi musea, Siida, Inarintie 46, FI-99870 Anár, tel. +358 (0)400 898 212, siida@samimuseum.fi, www.siida.fi