Siidda vuođđočájáhusa ollašuhttimii ohcet arkiteaktaplánejeaddji

Siidda váldočájáhusat ođasmahttojuvvojit oassin Siida-ráhkadusa viiddideami ja vuođđodivvuma. Badjel 20-jahkásaš Siida gal duođaige dárbbaša divvuma, ja Sámemusea dárbbaša lasi čoakkáldatsajiid sámečoakkáldagaide, mat máhccet máilmmis. Lassin musea ja luondduguovddáža doaimma ovddideapmi gáibida nuppástusaid ja sturron galledeaddjimearit fas stuorát áššehassajiid.

Vuođđodivvuma ja viiddideami oktavuođas ođasmahttet Sámemusea ja Davvi-Sámi luondduguovddáža oktasaš vuođđočájáhusaid. Boares vuođđočájáhusaid leat liikon ja dain leat addon giitosat, muhto moattelogi jagi ahkásaš čájáhusa sisdoallu ja teknihka gáibidit ođasteami. Dál almmustahtton skáhppomiin ohcat čájáhusa arkiteaktaplánejeaddji. Siida ráhkadusa vuođđodivvun- ja viiddidanfidnu ollašuhttimis vástida Senaatti-kiinteistöt.

Viiddiduvvon ja vuođđodivvojuvvon Siidda ja ođđa čájáhusaid leat plánen rahpasit miessemánus 2022.

Siiddas doibmet Sámemusea ja Davvi-Sámi luondduguovddáš Siida ja Restoráŋŋa Sarrit ky. Siida-giddodaga oamasta ja dikšu Senaatti-Kiinteistöt Oy. Sámemusea Siida lea Suoma ja sámiid riikkamusea ja riikkaviidosaš sierramusea. Davvi-Sámi luondduguovddáš Siida gullá Meahciráđđehusa riikkaviidosaš luondduguovddášfierpmádahkii. Restoráŋŋa Sarritis kafea- ja restoráŋŋadoaimma jođiha fitnodatdoalli.

Siida rahpasii jagi 1998, goas Sámemusea ja Davvi-Sámi luondduguovddáš Siidda oktasaš doaibma álggii. Dán ovdal báikkis doaimmai Anára sámemusea olgomusea, mii rahppojuvvui álbmogii 1960-logu álggus. Olgomusea lea ain oktan oassin Siidda doaimmas, dievasmahtedettiin Sámemusea ja Davvi-Sámi luondduguovddáža oktasaš čájáhusaid.

Siiddas galledit jahkásaččat sulaid 120 000 guossi, main bealli fitná čájáhusain. Lassin Siiddas galledit earret eará dáhpáhus-áššehasat, gávppašeamen Siida Shoppas fitnan guossit, vánddardanrávvema gáibida áššehasat ja Meahciráđđehusa lohpeáššehasat. Luondduguovddáš Siida bálvala maiddái Anára gieldda turismarávvema dárbbašan olbmuid.

Lassidieđu

Meahciráđđehus, spesiálaplánejeaddji/prošeaktaoaivámuš Kirsi Ukkonen t. 0400 479 986