Siida ain bivnnuhis galledanbáiki

Anára Siiddas leat olbmot galledan hui viššalit jagi 2018 áigge. Sámemusea, Badje-Sámi luondduguovddáš ja restoráŋŋa Sarrit, mat doibmet Siiddas, illudit sakka 2018 gallededdjiid mearis! Siidda 20 jagi ávvujagi áigge ledje miellagiddevaš čájáhusat ja máŋggabealat prográmma ja dat geasuhedje olbmuid.

Siidda olgouvssa uksalohkki coahkehii 117 079 geardde. Galledeaddjiid mearrái rehkenastojuvvojit buot olbmot geat gallededje Siiddas: olbmot, geat fitne čájáhusain ja dáhpáhusain, Meahciráđđehusa rávvenbáikkis, Anára gieldda turismarávvenbáikkis, Siida Shop -gávppážis ja restoráŋŋa Sarrihis.

Siiddas gallededje 59 178 čájáhus- dáhpáhusguossi, mii lea Siidda 20 jagi historjjá nubbin stuorámus gallededdjiidmearri. Ovddit jahki lei Siidda historjjá buoremus jahki.

Dušše moadde anus leamašan Museakoarta lea bivnnut ja dát oidno maid Siiddas, go olbmot geavahedje dan eanet go ovddit jagi. Museakorta-čájáhusgalledeaddjit ledje 1 821, dat lea 17% eanet ovddit jagi ektui.

Siidda ávvujagi áigge Siidda iežas jahkekoarta fállui báikkálaččaide vuoliduvvon haddái ja jahkekoarttalaččaid mearri lassániige 37% ovddit jagi ektui. Go jahkekoarta lei nu bivnnut, de dat vuvdo dás duohkoge báikkálaččaide beallehaddái.

Sámemusea Siiddas lea Čeavetjávrris Nuortalaččaid árbevierrodállu. Dat lea rabas 10.6.-20.9. ja doppe gallededje duon áigodagas 2 148 olbmo.

Dábálaččat galledeaddjit leat čielgasit eanet geassemánus gitta borgemánnui go dálvemánotbajiid áigge. Dálvemánotbajit leat goittotge geasuhišgoahtán. Guovvamánus gallededje eanet olbmot go čakčamánus ruškki áigge.

Čájáhusaid fitne geahččamin olbmot miehtá máilmmi ja olles áigge bohtet olbmot ođđa riikkain. Čájáhusgussiin suopmelaččat leat 40 % ja olgoriikalaččat 60 %. Suopmelaš gussiid mearri geahppánii 5,6 % jagi 2017 ektui. Eandaliige suoidne- ja borgemánus geahppáneapmi oidnui earenomážit, go Suomas lei dalle garra báhkat.

Jagi 2018 olgoriikalaš gussiin stuorámus oassi ledje frankriikalaččat ja duiskalaččat. Italialaš guossit ledje goalmmádin eanemusat. Njealjádin eanemusat ledje guossit Kiinnás ja Hongkongas. Buot buohkanassii jagi 2018 áigge oaččuimet statistihkaide 92 sierra ruovtturiikka/riikavulošvuođa. Áššehasat ieža almmuhit  man riikkas sii bohtet dahje man riikka riikkavuložat sii leat.

Áššehastiippaid geahčadettiin dábáleamos áššehas lea ovttaskas, olgoriikalaš ollesolmmoš. Dán buohta dilli lea rievdan mearkkašáhtti láhkai, dasgo ovddit jagiid mii leat vuovdán joavkobileahtaid olgoriikalaš joavkomátkkošteddjiide. Olgoriikalaš joavkomátkkošteaddjit ledje nubbin stuorámus áššehasat jagis 2018. Turismma rievdan oidno maid Siiddas. Olbmot mátkkoštit eanet ah eanet okto, ovttas guimmiin, ovttas bearrašiin ja dihto joavkkuin. Joavkomátkkit dahkkojit goittotge velge ollu.

Oahpistuvvon láidestemiid ordniimet diŋgojumiid mielde jagi 2018 áigge oktiibuot 270, dat lea 5,9 % eanet jagi 2017 ektui. Eanemus oahpistuvvon láidestemiid ordniimet eaŋgalasgillii.

Siidda mearkkašupmi Davvi-Lappi turismmas joatkašuvvá ain. Jagi 2019 áigge Siiddas álgá viiddidan- ja ovddidanprošeakta, mainna buoriduvvojit ee. Siidda čoakkáldat- ja áššehasbálvalansajit. Siida-dálu divodit ja dasa huksejuvvojit ođđa čoakkáldatsajit ja restoráŋŋa. Maid vuođđočájáhus ođaduvvo. Ođademiid birra juohkit dieđu maŋŋelabbos.