Vihtta giela, vuohkkasat oaidnit ja sisabeassanbileahtat neahtas – dá leat Siidda ođđa neahttasiiddut

Sámemusea ja Badje-Sámi luondduguovddáš Siida duste stuorra ođastusaid: viiddidanbarggut, divodeapmi, čájáhusa ođadeapmi ja čoakkáldagaid sirdin. Muhto ovdal dáid mii ođasmahtiimet www.siida.fi-neahttasiidduid. Siiddut leat ođđaáigásaččat, daid sáhttá geavahit mobiilarusttegiiguin ja dat lea viđa gillii. Dáid lassin neahttasiidduid bokte sáhttá oastit sisabeassanbileahtaid čájáhusaide.

Siidda neahttasiiddut leat viđa gillii. Ovdal siiddut ledje suoma-, eaŋgalas- ja davvisámegillii ja dál dat leat duoid lassin maid anáraš- ja nuortalašgillii. Sámegielat leat mis beaivválaš giellan ee. musea- ja luonddubajásgeassimis, čájáhusdoaimmain, fidnuin. Mii háliidat ahte gielat oidnojit maid min neahttasiidduin ja seammás lasihit ja movttiidahttet geavahit sámegielaid.

Siidda ođđa neahttasiiddut dolvot bileahttavuovdima ođđa áigái, internehttii. Mii leat Suoma musea- ja luondduguovddáš suorggis vuosttamuččaid siste lávkemin neahttabileahttavuovdima máilbmái. Neahttagávppi www.siida.fi-siiddus sáhttá oastit Siidda sisabeassanbileahtaid ovddalgihtii. Máksit sáhttá Suoma neahttabáŋkkuid bokte ja dábáleamos kredihttakoarttaiguin. Áššehasbálvaleaddjit mis liikká leat dás duohkoge. Sii oahpistit olbmuid čájáhusaide ja muitalit Siidda bálvalusain.

Sámemusea ja Luondduguovddáš Siidda ja restoráŋŋa Sarrida ođđa neahttasiiddut rahpasit Sámi giellavahkku gudnin duorastaga 24.10.2019. Siidduid lea ráhkadan Advertising Kioski.

Lassedieđut:

Vuovdin- ja márkanfievrrideami vástuolmmoš Minna Väisänen
tel. 040 581 6434, minna.vaisanen@samimuseum.fi

Divvojuvvon 29.10.2020: Siidda sisabeassanbileahtaid neahttavuovdinvuogádat molsašuvva. Min neahttagávpi lea dál gitta ja rahpasa ođđasit geasset 2021.