Pentti Kaitera dovddastusbálkkašupmi Sámemusea Siidii

Professor Pentti Kaitera ruhtafoanda lea mieđihan jagi 2026 dovddastusbálkkašumis. 20 000 euro sturrosaš Kaitera-bálkkašumi oaččui dán jagi Sámemusea Siida. Jagi 2026 Kaitera-bálkkašupmi juhkkojuvvui 20.11.2026 Oulu universitehtagálas, gos dan vuostáiválde museahoavda Taina Máret Pieski, intendeanta Anni Guttorm ja intendeanta Eija Ojanlatva.

 

Ruhtafoandda ulbmil lea gudnejahttit ja giitit doibmiid, geat ovddidit Davvi-Suoma ekonomalaš dahje fysalaš buresveadjima. Dán jagi bálkkašupmi addojuvvo Sámemusea Siidii, mii lea doaibman Anáris juo lagabui 70 jagi. Golmma ealli sámekultuvrra museas lea riikkaviidosaš ovddasvástádus sámi kulturárbbi vurkemis, ovdanbuktimis ja dutkamis.

 

“Ruhtafoandda stivra giitá Sámemusea Siidda gillilis barggus earenoamážit sápmelaččaid buorrin. Seammás dat lea ovddidan earenoamáš buori vugiin olles Davvi-Suoma vuoiŋŋalaš ja ekonomalaš buresveadjima. Siida lea máhcahan sámi kulturárbbi ruovttoluotta Sápmái ja huksen musea, gos sápmelaččat ieža muitalit iežaset muitalusa. Das lea šaddan Davvi-Suoma dehálaččamus mátkečuozáhat ja Eurohpa jagi musean bálkkašuvvon ovdamearka das, mot dehálaš ulbmila várás čujuhuvvon davvi báikkálaš máhttu sáhttá juksat riikkaidgaskasaš njunušdási”, ruhtafoandda stivrra ságajođiheaddji Katri Ervamaa dadjá.

 

Sámemusea Siidda čoakkáldagain leat 11 000 dávvira, 30 000 čuovgagova ja badjel 200 dáiddabihtá. Dán lassin Siida lea kulturbirrasa áššedovdi, mii addá jahkásaččat lagabui guoktečuođi cealkámuša virgeoapmahaččaide ja gielddaide iešguđetlágan eanangeavahanfitnuin. Siida lea ožžon bálkkašumi jagi eurohpalaš musean jagi 2024, jagi musean Suomas jagi 2024 ja maiddái Europa Nostra -bálkkašumi jagi 2022. Siidda olahus gallededdjiid mearis lea rasttilduvvon golbma jagi maŋŋálagaid, ja jagi 2025 museas fitne 84 000 galledeaddji oktiibuot 110 riikkas.

 

”Giittán lieggasit Pentti Kaitera ruhtafoandda dán árvvusatnimis, man mii leat ožžon. Dovddastusbálkkašumi lea čujuhuvvon Sámemusea Siidii, muhto vásihan, ahte bálkkašupmi lea viidásabbot dovddastus sámeservošii, mainna mii leat ovttasbargan. Dát bálkkašupmi guoskkaha máŋggačuođi olbmui, geat leat addán midjiide iežaset áiggi, máhtu ja árbedieđu. Searvvuš lea min fápmu, ja danin háliidan čujuhit iežan giitosiid musea bargoveaga lassin min sámeservošiid olbmuide, geaid dihtii musea eallá”, museahoavda Taina Máret Pieski dadjá.

 

Professor Pentti Kaitera ruhtafoanda lea mieđihan Kaitera-bálkkašumis guovtti jagi gaskkaid juo jagi 1988 rájes. Jagi 2026 rájes dovddastusbálkkašupmi mieđihuvvo juohke jagi. Bálkkašupmi addojuvvo vurrolagaid juogo Oulu universitehta dutkái dahje dutkanjovkui mearkkašahtti dutkanbarggus, dahje davvin Suomas váikkuhan olbmui dahje servošii mearkkašahtti barggu ovddas Davvi-Suoma ekonomalaš dahje vuoiŋŋalaš buresveadjima ovddideami várás.

 

Ovdal bálkkašumi leat ožžon ovdamearkka dihte Oulu universitehta professor Simo Saarakkala,  kapeallameašttir John Storgårds, bagadalli, dánsu Pirjo Yli-Maunula, Domestication in Action -bargojoavku, Polar Bear Pitching, ja professor Matti Latva-aho.

Loga eambbo: http://penttikaitera.fi/

Sámemusea Siidda bargit