Sámemusea Siida válljejuvvui jagi eurohpalaš musean!

Jagi eurohpalaš musea bálkkašupmi geigejuvvui otne miessemánu 4. beaivve Portugála Portimãos EMYA konfereanssas, man lea ordnen European Museum Forum.

Sámemusea háliida giitit EMYA duopmárgotti, European Museum Foruma, Portimão gávpoga ja ICOM Suoma bálkkašumi ovddas ja vejolašvuođas searvat jagi 2024 EMYA konferensii.

Mii leat hui ilus go Siidda ođastus ja máŋggabealat bargomet sápmelaš kulturárbbi ovdii lea ožžon fuomášumi miehtá Eurohpá.

”Sámemusea Siida eamiálbmotmusean lea vuosttažettiin sámiid iežaset várás. Muhto mii illudat sakka ahte sápmelaš muitalussamet guoskkaha olles Eurohpá museasuorggi ja olbmuid miehtá máilmmi.” dadjá museahoavda Taina Pieski giittossártnistis.

Giitosat dán bálkkašumi ovddas gulletge olles sámeservošii, eallilan olbmuide, geat dieđuideasetguin ja dáidduideasetguin leat dorjon bargomet ja maiddái buot Sámemusea bargiide áŋgiruššamis.

Mii giitit maiddái máttarvánhemiiddámet doarjaga, ráhkesvuođa ja fámuid ovddas.

Siidda ođđa váldočájáhusas sápmelaččat ieža muitalit iežaset muitalusaid. Ođđa čájáhusa huksemis ledje mielde badjel 300 sámeservoša lahtu.

Mii doaivut ahte dát bálkkašupmi addá midjiide návccaid joatkit min servošii dehálaš repatriašuvdnabarggu. Dán bargui mii dárbbašat olles eurohpalaš museasuorggi doarjaga, vai máttuideamet dávvirat máhccet ruoktot Sápmái.

Háliidat sávvat váimmolaš lihkusávaldagaid buot EMYA 2024 bálkkašuvvon museaide!

Giitu! Takkâ! Späʹsseb! Thank you!

Lassedieđut: Museahoavda Taina Pieski, taina.pieski(at)samimuseum.fi, +358 50 5351574

Govat: https://www.flickr.com/photos/siidainari/albums/72177720316701063/

Eaŋgalsgielat dieđáhus European Museum Forumis dáppe.